Read Sangir YESAYA 9 Bible Online

YESAYA 9 - Sangir bible

YESAYA 9

¹ Bansa kụ mẹ̌bẹ̌biahẹ̌ su ral᷊ungu kararěndung makasilo tualagẹ̌ simarang. Apang mạtanạ su ral᷊ungu kěngkaum papate nisarameng u tualagẹ̌ maghěnang.

² MAWU, i Kau něngonggọu ral᷊uasẹ̌ masaria,[18] kinoạ u e i sire nahul᷊uasẹ̌ ore nahul᷊iagẹ̌. I sire maral᷊uasẹ̌ ual᷊ingu kapia-Nu, mẹ̌sul᷊ungu taumata mạhul᷊uasẹ̌ su tempong měngomol᷊u pěnsạ arau mẹ̌pẹ̌papahiạ u apal᷊iwụ hampasẹ̌.

³I Kau e seng něngal᷊ạ bawawaěnge mawěhạ dingangu kalung papasanengange bọu wěmbange. I Kau e napakawatạ u bansa měnanědạ ene e kụ měmẹ̌měha umatʼU e. Mẹ̌sul᷊ungu kere su tempo nal᷊iu piạ i Kau němatạ sordadom Midian.

⁴Sapatun sordado kụ mẹ̌tatarangkal᷊ẹ̌ e ringangu pakeangu kụ nělapusu raha e sarung masueng kaěnge su putung.

⁵Sěngkatau rariọ e seng nawantelẹ̌ baugʼi kitẹ e; kụ i kitẹ e seng nighěllirangu sěngkatau ahusẹ̌. I Sie sarung makoạ těmbonang i kitẹ, I Sie isěbạ: ”Měnanasa Pelesa”,[19] ”Duata Mahuagatẹ̌”, ”I Amang Kakalẹ̌”, ”Datum Pẹ̌darame”.

⁶I Sie mẹ̌parenta kere ratu hěnton Daud, kawasane masaria tawẹ sihinge. Banuane měngkate sěntiniạ mal᷊unsemahẹ̌, kararatuange niwala su pělatorange ringangu kạadilẹ̌ e orasẹ̌ ini sarang marěngụ-děngụ. MAWU Limembong Kawasa e mang sarung mẹ̌koạ ene.

⁷ MAWU e seng něnawong hukumang baugu kararatuangu Israelẹ̌ e.

⁸Kakěpal᷊u tau Israel dingangu tumanạu Samaria e sarung masingkạ u kai seng MAWU e nẹ̌karadiahang ene. Orasẹ̌ ini e i sire kai naobotẹ̌ dingangu naung i sire e něngkarangẹ. Angkuěng i sire,

⁹”Manga ghodoěng bọu tela e seng naopehẹ̌, kaiso i kami e sarung mẹ̌koạ manga ghodoěng buhu wọu watu. Manga kalung ara e seng nituwang, kaiso sarung awengang i kami ringangu kalun cěmarang Libanon kụ kal᷊ẹ̌nggihange.”

¹⁰MAWU e seng něnganoạ sědụ i sire[20] kụ ipěndokạ si sire.

¹¹Tau Siria su sěmběkan daki ringangu tau Pilistin su sěmběkam bahẹ němul᷊aho Israel. Kaiso MAWU e wědang lụlangehẹ̌ dingangu těbe mělẹ̌hukung.

¹²Tau Israelẹ̌ e bědalaing tawe nẹ̌sasěsilẹ̌ manimbe seng nihukungu MAWU Limembong Kawasa; i sire wědang tawe lai nẹ̌tẹ̌tobatẹ̌ si Sie.

¹³Ual᷊ingu ene tumbạeng su ral᷊ungu sahěllo MAWU e měhukungu manga těmbonangu Israel dingangu kawanuane. I Sie němusạ dingangu něnděmmẹ těmbọe mase němědi tol᷊ene.

¹⁴Těmbọe ute kai nạung matatimadẹ̌ dingangu matatuhasẹ̌ e, tol᷊ene ute kai manga nabi kụ mẹ̌gẹ̌gěllịu manga těntiro makạpal᷊idẹ̌ e.

¹⁵Manga těmbonangu wansa ene e seng nakapal᷊idẹ̌ dingangu nakagholang kawanua.

¹⁶Bansa ene e seng nẹ̌tul᷊a, ringangu naral᷊akisẹ̌ lulune dingangu kal᷊awọu waweran sire e sen tawẹ dusule. Ual᷊ingu ene su tal᷊oarang manga mangangudạ e tawẹ sarang sěngkatau relaing ipakal᷊iwiru MAWU. I Sie tawe kiměndagu manga wawine wal᷊u, ringangu kasisi ěndusẹ̌. Kaiso MAWU e wědang pědu ringangu tatapẹ̌ měhukung.

¹⁷Karal᷊akisu wansa ene měhěngisẹ̌ kere putung kụ makaupu sumpinị. Děllị e kere kěhu natutung kụ mapatiowol᷊u tipu.

¹⁸MAWU Limembong Makawasa e limangehẹ̌ tawẹ sihinge, ringangu papahange kere putung mẹ̌dẹ̌daraẹ dingangu wansa ene ute kai kalune ipakasue. Tawẹu sarang sěngkatau kụ seng kuměndagu anạu sěngkataune.

¹⁹Su kạguwạu wanua ene taumata e něhampasẹ̌ dingangu měngkate kụkaeng manga apạe apang ikakaěng, kaiso mang tawe makapěndang mal᷊aedẹ̌. Tapeng u lai i sire kawe kụ kinạewe manga ringang i sire hala e!

²⁰Tau Manasye ringangu tau Efraim mẹ̌kẹ̌kakinạ, bọu ene sěngkapěndokạ Yehuda. Arawe MAWU wědang piạ dal᷊angehe ringangu měngkai těbe mẹ̌mahang.