Read Sangir MANGA IMANG 1 Bible Online

MANGA IMANG 1 - Sangir bible

MANGA IMANG 1

¹Bọu TentanʼE, MAWU e mẹ̌kẹ̌kui si Musa ringangu měngẹ̌ngonggọ u kal᷊awọu tiahanʼE,

²hinong pakịtuhuke su tau Israel. Kereu pẹ̌sěngkatau mẹ̌gěllịu sasěmba binatang kụ tongkateng baugu MAWU e, i sie wotonge maněmbang sapi, domba, arau kambinge.

³Kereu isěmbane kawe sapi sěmbaụ binatang ene ute harusẹ̌be esẹ arau tawẹ apa turạ e. Sapi ene harusẹ̌be ěntudẹ̌ sol᷊ong tukadu Tentan MAWU, tadeạu MAWU e lụl᷊ahimpulu wue su tau ene.

⁴Bọu e i sie harusẹ̌be maměllọ u l᷊imane su wowon těmbọu binatang ene, tadeạu sasěmbane sarumbe raekang u MAWU waugu kal᷊aampungu rosane.

⁵Bọu e sapi ene hinong potokang su těngon tukadu Tenta. Dahane hinong i sěmbang manga imang hěntong Harun su MAWU, mase sẹ̌bohang su sěndihange ěpạ bọu pananěmbaěng su tengon tukadu Tenta.

⁶Mase tau ene harusẹ̌ měměnị binatang ene ringangu papotokang e.

⁷Manga imang harusẹ̌be pěmpěndikọ u putung su wowom pananěmbaěng e kụ mase pělěnsung kalu rarikọ e su wowone.

⁸Apạeweng kempang u gaghěllị e narekeng těmbọ e dingangu tawane hinong i pěllọ i sire su wowom putung.

⁹Mase tau ene harusẹ̌ měnguhasẹ̌ lohon tiang dingangu palangu sapi ene, ringangu imang kụ piạ hal᷊ẹ̌ e měnutung kěbị ene. Dal᷊urun sasěmba tẹ̌tutungang e kai makạl᷊ahimpulu naungu MAWU.

¹⁰Kamageng u isěmba kawe domba sěmbaụ arau kambing, ute binatang e harusẹ̌be esẹ dingangu tawẹ turạ e.

¹¹Tau ene harusẹ̌be pěmotọ binatang ene, su sěmběkang pananěmbaěng bọu pungu sawěnahẹ̌, mase manga imang e harusẹ̌ měněbohu rahane su wiwihe ěpạ bọu panananěmbaěng.

¹²Bọuten binatang ene pẹ̌papapotọ tangu, kěbịewe kempange, nasowa těmbọ e ringangu tawane, hinom pělokang u imang su wowom putung su pananěmbaěng.

¹³Bọu e tau ene hinong měnguhasẹ̌ dal᷊ohon tiange ringangu palang u binatang ene. Bọu e imang harusẹ̌ měnarakang u patikụ sasěmba ene su MAWU, kụ itutung su wowom pananěmbaěng. Dal᷊urung sasěmba nitutung ene e makạl᷊ahimpulu naungu MAWU.

¹⁴Kamagengu ikoạ sasěmba kawe manụ u winalangeng sěmbaụ ute kai hinong manụ těkukurẹ̌ arau paluma kawuhuang.

¹⁵Imang hinong mẹ̌bawa manụ u winalangeng ene sol᷊ong pananěmbaěng, kụ bọu ene měhěsạ lehẹ e, mase měnongkạ těmbọ e su wowon pananěmbaěng. Dahang manụ u winalangeng ene e hinong iapaelehẹ̌ sol᷊ong likude wọu sěndihang u pananěmbaěng.

¹⁶Karangane ringangkeweng kěbị dal᷊ohone hinong sẹ̌bangeng, mase irěmmẹ su sěmběkang pananěmbaěng bọu pungu rakị, su tampạ u awu.

¹⁷Bọu ene manụ u winalangeng ene hinong ighaghonaị su pungu papanide, kaiso papanide tawe wotonge sarang mahěnsị. Bọu e manụ u winalangeng ene e, kai hinong itutung su wowom pananěmbaěng. Arawe ral᷊urung sasěmba tẹ̌tutungang ene kai makạl᷊ahimpulu naungu MAWU.