Read Sangir MANGA IMANG 10 Bible Online

MANGA IMANG 10 - Sangir bible

MANGA IMANG 10

¹Piạ su sěhěllo i Nadab děduang Abihu, manga anạ i Harun, něngal᷊ạ tampạ u putung i sire sěngkatau-sěngkatau kụ nitahoěngu tětuhẹ̌. Bọu ene i sire nẹ̌tahong buwụ su ral᷊ungu putung ene kụ nisěmba su MAWU. Kaiso putung ene e kai wal᷊inewe hinone watụ u MAWU e tawe nangoro si sire pěnẹ̌němban sasěmba ene.

²Tangú MAWU e naparěntam putung piněnutung si sire sarang nate su Tentam MAWU e.

³Bọu e i Musa nẹ̌bera si Harun, ”Kai ene su tahuěnnang MAWU e piạ i Sie něhengetang u, ’Patikụ apang němpẹ̌tangkiang si Siạ e hinong měmantugẹ̌ kasusi-Ku. Iạ e sarung mělahẹ u kawawantugẹ̌-Ku supatikụ bansa-Ku.’ ”[3] Kaiso i Harun měngkate marěmasẹ̌.

⁴Bọu ene i Musa e nẹ̌kui e si Misael dẹ̌duang Elsafan, manga anạ i Uziel, i empong i Harun. Angkuěng e si sire, ”Mahịe sol᷊ong ini, kụ al᷊ạko maietʼu anạ u sěmbaụ u ghaghurangu e wọu Tentam MAWU e kụ pěllọko su l᷊ikudu pẹ̌darasengang.”

⁵I sire němpẹ̌děntạ e kụ němpẹ̌tatimbangke manga maietẹ̌ kụ bědang piạ pakeange ene sol᷊ong likudu pẹ̌darasengang, kerẹewe seng niorom Musa e.

⁶Bọu e i Musa nẹ̌berạ e si Harun dingangu manga anạ e wal᷊ine kụ i Eleazar dẹ̌duang Itamar, ”Abe wala utạ u nasasuigẹ̌ e, ringangu abe ghaghonaị pakeangu e kụ kai mạnodẹ u i kamene kawe lụl᷊ahunsusa ringangu mělẹ̌lutu. Kereu i kamene měmpẹ̌koạ kerene, i kamene kai sarung mate, kụ kakěpal᷊u taumatang Israelẹ̌ e sarung makapěndang dal᷊angehu MAWU e. Arawe kal᷊awọu tau Israel bal᷊ine e wotonge wue mělutu waugu irẹ̌dua kụ něngkapate ual᷊ingu putung bọu anung MAWU e.

⁷Kumbahang maněntang u Tentam MAWU e tadeạu kumbahangbe i kamene mate, batụu i kamene kai seng nial᷊amateng kụ nilanisang u l᷊anan dal᷊anisẹ̌ mědeạu pẹ̌tangkiang MAWU.” I sire nẹ̌koạ kerẹewe seng niwerang Musa e.

⁸MAWU e něhengetang si Harun,

⁹”Nasuẹeng inunge anggorẹ̌ arau inumang makětị e, i kau ringangu manga anạ u e tawe wotonge sumuẹ̌ su ral᷊ungu Tenta-Ku. Kereu i kamene e lumampa tiahane ini e, i kamene sarung mate. Tita ene harusẹ̌be itukangu kal᷊awọu hitenu e.

¹⁰I kamene harusẹ̌be makakoạ mapẹ̌dal᷊ahaedu apang nitani waugu Mawu Ruata ringangu tawe nitani, wọu tal᷊oarang dal᷊akisẹ̌ dingangu mapia.

¹¹Kal᷊awọu tita nạung Takụ nionggọ si kamene limiung Musa e harusẹ̌be těntirong kamene su tau Israel.”

¹² I Musa e nẹ̌bera si Harun dingangu su anạ e rarua, i Eleazar rẹ̌duang Itamar, ”Al᷊ako gandung lěmbene wọu laidopẹ̌ kụ nisěmba su MAWU e. Pẹ̌koạko borotẹ̌ bọu tapoěng ene kụ manịeng tawẹ kabọ e mase kaěngke ene su sěndihang u pananěmbaěng, watụ u sasěmba ene kai enẹ e kasusine.

¹³Borotẹ̌ ene harusẹ̌ kaěng su tampạ susi, watụ u wọu laidopẹ̌ kụ nisěmba su MAWU e, borotẹ̌ ene e nakoạ bageangu ringangu manga anạ u esẹ. Kai ene parentang MAWU e si siạ.

¹⁴ Arawe i kamene ringangu manga anạ i kamene esẹ dingangu wawine e, wotonge kuminạ dokom binatang sasěmba ghaghěllị dingangu palange sasěmba nitani e. U kai ene wuạ u manga imange wọu sasěmbang pẹ̌daramen tau Israel. I kamene e wotongewe měmpangidopu ene e waewe su tampạ sude asal᷊eweng tawẹ sungkal᷊ene.

¹⁵Palangu binatang sasěmbạewe těntani e ringangu rokom binatang sasěmba titantu e harusẹ̌ bawa sěngkawawa ringangu tawane waugu sasěmba tinongkạ kụ kai sasěmba nitani waugu MAWU e. Apạeweng tamai ene tangú makoạ tataghuanengu ringangu manga anạu sarang marěngụ-děngụ, kerẹewe seng niorong MAWU e.”

¹⁶Mase i Musa e nakiwal᷊ong kambing baugu sasěmbang ampungu rosa e. I sie nipaul᷊ikang u kambing ene e seng nitongkạ. Hal᷊ẹ̌ ene e kai nakaral᷊akị naung i Musa e si Eleazar dẹ̌duang Itamar, kụ i sie nẹ̌bera si sire,

¹⁷ ”Kawe unụe sasěmba ampungu rosa e tawe nịlaidopʼi kamene su tampạ susi tangu? Sasěmba ene e kai susi tạ sihinge; MAWU e nẹ̌gěllị si kamene, tadeạu rosan tau Israelẹ̌ e ampungang.

¹⁸Dahang kambing ene e, tawe niěntudẹ̌ su Tentam MAWU kụ tuhụ hinone sasěmba ene kai ipẹ̌biahʼi kamene sene kerẹewe seng takụ nioro.”

¹⁹Sasimbang i Harun, ”Mambeng kerene, ěllo ini e tau Israel seng naněmbang sasěmba ampungu rosa ringangu sasěmba tinongkạ baugu MAWU. Manịeng kerene, kai silakạ ini e kawe himombang si siạ. Mangạewe sahěllo ini iạ nangidopẹ̌ lai sasěmba ampungu rosa ene, kai mal᷊uasẹ̌ bue MAWU e lẹ̌ěnnaěng tangu?”

²⁰I Musa mambeng natarimạ naunge su sasimbang ene.