Read Sangir MANGA IMANG 13 Bible Online

MANGA IMANG 13 - Sangir bible

MANGA IMANG 13

¹MAWU e nẹ̌gěllịu manga titanʼE ini e si Musa rẹ̌duang Harun:

²Kereu pẹ̌sěngkatau e piạ manga karul᷊ine, arau wisul᷊e, arau rol᷊one mawawira su pisine kụ makakariading sakị u pisị makạtatakụ e, i sie hinong itonda su anung imang hěnton Harun.

³Imang harusẹ̌ mẹ̌marikẹ̌sa laesu wadang kụ masakị su pisin tau ene. Kereu rukụ u awạ e su sěmpalang ene e nawira, mase wadange sěmpalang masakị e kere luhudu limembong karal᷊unge wọu pisine mạngělikụ e, tangu tau ene piạ sakị e makạtatakụ. Imang e harusẹ̌ mělahẹ u tau ene e kai mal᷊amuhụ.

⁴Kaiso kamagengu laesu wadange masakị e kawe mawira awạ e mase wal᷊inewe limembong karal᷊unge wọu pisine mạngělikụ e, mase rukụ u awạ e su l᷊aese ene e mal᷊aing tawe makoạ mawira, ute tau ene harusẹ̌ iwembang karěngụ u pitu ěllo.

⁵Su ěllo kapitune e, imang harusẹ̌be saụ pěmarikěsa kapia. Kụ kereu tumuhụ ěbạ e kụ sakị ene wědang mẹ̌sul᷊ung kakakoạ e kụ tawe lai nẹ̌darakị, ute tau ene harusẹ̌be lai iwembang gěnangu pitu ěllo karěngụ e.

⁶Su ěllo kapitune imang e harusẹ̌ mẹ̌kakělla kạpia, kụ kereu laesu wadange masakị e sembeng nẹ̌papirul᷊e ringangu selain tawe nẹ̌darakị, tangú imang e harusẹ̌ mělahẹ u tau ene seng burẹ̌si. U ene e kai sakị u pisị we tawe makasilakạ. Tau ene harusẹ̌be mangunsạ pakeange sarangkewe mawurěsi.

⁷Kaiso kereu seng bọu nilahẹ burẹ̌si kahiang imang kụ sakị ene kawe nẹ̌darakị, ute i sie harusẹ̌ saụ mẹ̌sul᷊e sol᷊ong anung imang.

⁸Kụ imang e harusẹ̌ měmarikěsa kapia, kụ kereu sakị e mambeng nal᷊ahẹ u seng nẹ̌darakị, tangú tau ene harusẹ̌be ihabarẹ̌ u i sie kai makạdarěnting; kụ i sie kai nitanggaěngu sakị u pisị makạtatakụ.

⁹Pẹ̌sěngkatau kụ nirorokangu sakị e su pisị makạtatakụ e harusẹ̌ itonda su anung imang.

¹⁰Kereu tumuhụ pamamarikěsang imang su pisin tau ene e kai piạ sahěnụ e něhempang, mase rukụ u awạ e su sěmpalang ene e nawira,

¹¹tangú tau ene kai nirorokangu sakị u pisị makạtatakụ. Imang e harusẹ̌ maul᷊ị u kai makạdarěnting. Seng tawahal᷊uasu mamembang i sie, watụ u kai seng nal᷊ahẹ u i sie kai makạdarěnting.

¹²Kereu imang makạsilo u manga rol᷊one mawira e seng nẹ̌darakị bọu těmbọ sarang laedẹ̌,

¹³mase tumuhụewe pamamarikěsane e sakị ene kawe seng nẹ̌darěkẹ sol᷊ong kạguwạu wadang dingangu kasěllaheweng pisine e seng nawira, kụ tau ene e seng nilahẹ u i sie seng nawurẹ̌si.

¹⁴Kaiso kamagengu kawe něhempang ute, imang harusẹ̌ měmarikěsa kapia.

¹⁵Kereu ene mambeng hempang ute tau ene harusẹ̌ paul᷊ikang u kai mal᷊amuhụ, u i sie kai nirorokangu sakị u pisị makạtatakụ.

¹⁶Kai kamagengu hempang ene napia, kụ saụ nẹ̌těngkawira, ute tau ene harusẹ̌ mẹ̌těngong imang,

¹⁷mědeạu saụ pakiparikẹ̌sa. Kereu hempang ene e mambeng seng nẹ̌těngkawira ute, imang e seng nělahẹ u tau ene e sembeng burẹ̌si.

¹⁸Kereu pẹ̌sěngkatau e piạ bisul᷊e kụ sen nul᷊e,

¹⁹kutẹu kai saụ nẹ̌karul᷊i arau nẹ̌dol᷊o mawira mahunggurang su ěnnạ e, tangú tau ene e harusẹ̌be pětěngong imang

²⁰mědeạu pakiparikẹ̌sa. Kereu rol᷊o tamai ene e kakěllaěng kawe limembong karal᷊unge wọu pisine mạngělikụ e ringangu rukụ u awạ e su sěmpalang ene e mal᷊aing seng nẹ̌těngkawira, ute imang harusẹ̌be maul᷊ị u tau ene e kai mal᷊amuhụ. Bisul᷊ẹ̌ ene ute kai panẹ̌takengu sakị u pisị makạtatakụ.

²¹Kai kamagengu tumuhụ pamamarikěsang imang e rukụ u awạ su sěmpalang ene tawe mẹ̌těngkawira, ringangu laesu wadang ene e tawe něngalembong karal᷊unge wọu pisine mạngělikụ e, kětạembeng awạ e něngalembong kangudạ e, tangú tau ene e harusẹ̌be wembang gěnnangu pitu ěllo karěngụ e.

²²Kereu rol᷊o mawira ene e nẹ̌darakị tangú imang harusẹ̌be maul᷊ị u tau ene kai mal᷊amuhụ batụu i sie kai nirorokangu sakị su pisị makạtatakụ.

²³Arawe kamagengu rol᷊o mawira ene e tawẹ pẹ̌bawal᷊uine ringangu tawe lai nẹ̌darakị, ute ene tumbạeweng ěnnạ u wisul᷊ẹ̌, kụ tau ene nal᷊ahẹ u mapia wue.

²⁴Kereu pẹ̌sěngkatau e nal᷊esẹ ual᷊ingu nal᷊oso, kụ bọu ene pising lesẹ ene e nẹ̌těngkawira arau mawira nẹ̌těngkawol᷊ahẹ̌ e, ute

²⁵imang harusẹ̌ mẹ̌kakělla kapia. Kereu rukụ u awạ e su sěmpalang ene e nẹ̌těngkawira arau lesẹ e limembong karal᷊unge wọu pisine mạngělikụ e, tangú sakị su pisị makatatakụ ene e seng dimakị su lesẹ u loso ene e, kụ imang e harusẹ̌ mělahẹ u tau ene kai mal᷊amuhụ.

²⁶Kai kereu rukụ u awạ e su sěmpalang ene e tawe nẹ̌těngkawira mase sěmpalang ene e tawe limembong karal᷊unge wọu pisine mạngělikụ e, kětạembeng limembong kangudạ e awạ e, tangú tau ene e harusẹ̌ iwembang gěnnangu pitu ěllo karěngụ e.

²⁷Su ěllo kapitune imang e harusẹ̌ měmarikẹ̌sa kapia. Kereu wukal᷊e mawira ene e němete, tangú tau ene e nirorokangu sakị e su pisị makạtatakụ, kụ harusẹ̌ paul᷊ikangu kai mal᷊amuhụ.

²⁸Kai kereu wukal᷊e mawira ene e tawe měbal᷊ui ringangu tawe lai němete, kụ kětạembeng mawira awạe, ute ene wal᷊inewe sakị u pisị makạtatakụ. Imang harusẹ̌ maul᷊ị u ene e mapia wue, u awạ e mawira ene e tumbạembeng bělạ u l᷊oso e.

²⁹Kereu sěngkatau esẹ arau wawine e kahinoěngu sakị u pisị su těmbọ e arau arene,

³⁰i sie hinong pakaparikẹ̌sa manga imang. Kereu sěmpalang masakị e kawe manga limembong karal᷊unge wọu manga pisine mạngělikụ e ringangu utạ e arau wianggụ e su sěmpalang ene e kawe nẹ̌těngkaririhẹ̌ masene něngkahondosẹ̌ e tangú tau ene e nirorokang u sakị e su pisị makạtatakụ kụ hinong ipaul᷊i u kawe makạdarěnting.

³¹Kereu tumuhụ parịkěsang manga imang e badange sěmpalang masakị e tawe ikasilowe limembong karal᷊unge wọu pisine mạngělikụ e, tawẹbe kinaěbakeng dukụ e arau wianggụ e mapia su sěmpalang ene, tangú tau ene e hinong iwembang gěnnangu pitu ěllo karěngụ e.

³²Su ěllo kapitune e, imang harusẹ̌be mamarikěsa kapia wadange masakị e, kụ kamageng u sakị e ene tawe němete ute, tawe apawe rukụ e arau wianggụ e kụ nẹ̌těngkaririhẹ̌ su sěmpalang ene e, kutẹu l᷊ai kakěllaěng e tawe limembong karal᷊unge wọu pisine mạngělikụ e,

³³kụ tau ene tangú harusẹ̌be měngul᷊ụ dukụ u awạ e arau wianggụ e su sěmpalangkewe matědụ mạngělikụ e. Kụ bọu ene i sie harusẹ̌be lai iwembang karěngụ u pitu ěllo.

³⁴Su ěllo kapitune, imang harusẹ̌ měmarikěsa kapia. Kereu sakị e tawe němete ringangu sěmpalang ene e tawe limemboweng karal᷊unge wọu pisine mạngělikụ e, tangú tau ene e ipaul᷊ibe mapia wue kụ i sie harusẹ̌ měngunsạ pakeange.

³⁵Kaiso kamagengu seng nipaul᷊ikangu mapia wue kutẹu sakị e kawe němete, tangú,

³⁶imang e hinong měmarikěsa kapia. Kereu sakị e ene mambeng němete, tangú seng tawahal᷊uasu lai imang e měmarikěsa měnsang dukụ u awạ e arau wianggụ u tau ene e nẹ̌těngkaeha, watụ u seng nal᷊ahẹ u i sie makạdarěnting.

³⁷Kaiso kereu tumuhụ pandaěngu imang, u sakị e tawe němete, mase nituwoěng rukụ u awạ e arau wianggụ e kụ mapia wue su sěmpalang ene, tangú sakị ene e seng naul᷊e, kụ imang harusẹ̌be maul᷊ị u i sie mapia wue.

³⁸Kereu sěngkatau esẹ arau wawine piạ lesẹ e piạ bukal᷊e mawira su pisine,

³⁹tangú imang e harusẹ̌ mamarikẹ̌sa tau ene. Kereu manga wukal᷊u lesẹ ene e sěngkakakělla kawe mawira piạ mal᷊ěbuhẹ̌, i sie tumbạeweng nikarěketang u kadọ u manụ kụ nipaul᷊ikangu mapia wue.

⁴⁰Kereu sěngkatau esẹ narol᷊ohẹ̌ su pol᷊ohe arau su wowon děhụ e, tangú rol᷊ohe ene tawe makal᷊amuhụ si sie.

⁴¹

⁴²Kaiso kamagengu lẹ̌toěngu sahěnụ e mawira mal᷊undaha su rol᷊ohe, ute nal᷊ahẹ u i sie nirorokangu sakị u pisị makạtatakụ.

⁴³Imang harusẹ̌ mamarikẹ̌sa tau ene, kụ kereu mambeng kahěngang piạ sahěnụ e mawira mal᷊undaha,

⁴⁴tangú imang harusẹ̌ maul᷊ị u i sie kai makạdarěnting ual᷊ingu nirorokangu sakị u pisị makạtatakụ su těmbọ e.

⁴⁵Sěngkatau kụ kinahinoěngu sakị u pisị makạtatakụ e harusẹ̌ měluheng pakeange naghaghonaị kụ mapakawalang utạ e karal᷊usune. I sie harusẹ̌ měhěmbung gatine watuhu wawa e kụ měmansagẹ̌ u, ”Mal᷊amuhụ, mal᷊amuhụ.”

⁴⁶Karěngụeweng i sie nirorokangu sakị ene e i sie mal᷊amuhụ, kụ i sie harusẹ̌ mẹ̌tanạ su l᷊ikudu pẹ̌darasengang, maghea marau wọu taumata wal᷊ine.

⁴⁷Kereu kaěbakeng henẹ e[4] su manga pakeang, arau hekạ wolẹ̌ arau leneng,

⁴⁸arau su pisị arau měnsang apạ e kụ nikoạ bọu pisị,

⁴⁹kụ awạ u kal᷊ahenẹ ene e ipẹ̌mẹ̌měllong e arau mahamụ mal᷊undaha, kụ apang nahenẹ e kai luhudu nědarakị kụ hinong itodẹ su imang.

⁵⁰Imang tangú harusẹ̌ měmarikẹ̌sa barang ene, kụ mamembang u ene ghěnnang u pitu ěllo karěngụ e.

⁵¹Su ěllo kapitune i sie harusẹ̌ měmarikěsa kapia kụ kereu kal᷊ahenẹ ene e mambeng těngadẹ̌ seng nẹ̌darakị ute barang ěndaị e mambeng mal᷊amuhụ.

⁵²Imang harusẹ̌ mẹ̌tongkạ u barang ěndaị e, watụ u kal᷊ahenẹ ěndaị ene ute kai saheng apang nẹ̌darakị, kụ harusẹ̌ ipakaupung putung.

⁵³Kai kereu tumuhụ pěmamarikẹ̌sang imang su kal᷊ahenẹ ěndaị tangú kai tawe nẹ̌darakị su barang ěndaị e, kụ

⁵⁴i sie nangoro tadeạu apa ěndaị e pakịuhasẹ̌ dingangu pakiwembang karěngụ u pitu ěllo e l᷊ai.

⁵⁵Bọu e imang harusẹ̌ mamarikẹ̌sa kapia. Kereu kal᷊ahenẹ ene e tawe nẹ̌darakị, kai awạ e měngkate těbe su ěnnạ e, tangú apa ene e wědang mal᷊amuhụ kụ harusẹ̌ tutungang maningbe kal᷊ahenẹ ene e tumbạeng kaẹ̌bakeng su sěmpalang su těngone arau su sěmpalangkewe su l᷊ikude.

⁵⁶Kaiso kereu tumuhụ pamamarikẹ̌sang imang kụ kal᷊ahenẹ ene e sembeng nailang, tangú su wahageangu hekạ arau pisị kụ piạ henẹ e ene e harusẹ̌ gědekang.

⁵⁷Kereu su samurine kawe suměpụ kapia, tangú kal᷊ahenẹ ene e kawe nẹ̌darakị, kụ taghuange harusẹ̌ měnutung barang ene.

⁵⁸Kamagengu seng bọuten niuhasẹ̌ awạu kal᷊ahenẹ su barang ene e kụ natadise, tangú barang ene e harusẹ̌ uhasẹ̌ kapia, mase wuhụewe rekeng burẹ̌si.

⁵⁹Kerene tiahang kal᷊ahenẹ kụ kaěbakeng su manga pakeang arau hekạ bọu leneng arau wolẹ̌, arau walạewe su apa sude kụ nikoạ bọu pisị.