Read Sangir MANGA IMANG 14 Bible Online

MANGA IMANG 14 - Sangir bible

MANGA IMANG 14

¹MAWU e nẹ̌gěllịu titanʼE tamai ini e si Musa

² hal᷊ẹ̌ u komol᷊ang u tundum pamamurěsi samuring kal᷊aul᷊e wọu sakị su pisị makạtatakụ. Su ěllo kụ tau ene sarung paul᷊ikangu kai wurěsi wue tangú, i sie harusẹ̌ itonda su anung imang,

³kụ imang e tangú mẹ̌bawạewe si sie sol᷊ong likudʼu pẹ̌darasengang. Kereu tumuhụewe pěmamarikěsane e tangú tau ene e sembeng naul᷊e,

⁴kụ imang e tangú rimolohʼi sie apẹ̌bẹ̌bawa manụ u winalangeng darua kụ biahẹ̌ dingangu tawe ipẹ̌tatělling, dingangu kalung cěmara sěmpědi, ringangu tal᷊i mahamụ sěmpotọ, dingangu kalung ěhe sělelang.

⁵Manụ u winalangeng sěmbaụ e harusẹ̌ potokang su wowong kuring ěntana lohong akẹ burěsi wọu simbul᷊u akẹ e.

⁶Arawe manụ u winalangeng sěmbaụ e wue ute ringangu kalung cěmara, tal᷊i mahamụ dingangu kalung ěhe sělelang kụ harusẹ̌ laehẹ̌ su ral᷊ungu raham manụ u winalangeng kụ seng bọu nipotọ.

⁷Imang e mapěměsị u raham manụ u winalangeng ene e pitu sul᷊e su taumata kụ seng nul᷊e, kụ maul᷊ị u i sie e wurěsi. Bọu e manụ u winalangeng kụ bědam biahẹ̌ e harusẹ̌ ipěllọ e su wimbaenge.

⁸Bọu ene tau ene harusẹ̌be mangunsạ pakeange, měngul᷊ụ kěbị dukụ u awạ e, ringangu měndenọ. Tangu nawurěsi e i sie, kụ botonge sumuẹ̌ su ral᷊ungu pẹ̌darasengang kaiso, karěngụeweng pitu ěllo e l᷊ai i sie reng tawe wotonge sumuẹ̌ su ral᷊ungu tentane hala e.

⁹Su ěllọ e kapitune, i sie hinong měngul᷊ụ kal᷊awọu utạ e, wianggụ e, kěngkondạ e, ringangkeweng kal᷊awọu rukụ u awạ e su wadange. Bọu ene i sie hinong měngunsạ pakeange ringangu měndenọ. Buhụewe wọu ene e sie e mawurěsi.

¹⁰Su ěllo kaual᷊une tau ene harusẹ̌ mẹ̌bawa pěgol᷊u domba esẹ darua, ringangu pěgol᷊u domba wawine sěmbaụ kụ umbure pẹ̌sěntaung mase sěmbaụ-sěmbaụ e tawẹ turạ e. Sul᷊iung ene tangú tapoěng těllung kilo kụ seng nikaugu lanang zaitun dingangu sěngkatěllung kapahiakengu lanang zaitun.

¹¹Bọu e imang harusẹ̌ mẹ̌bawa si sie ringangu manga sasěmbane e sol᷊ong těngon tukadu Tentam MAWU.

¹²Imang e harusẹ̌ mangal᷊ạ anạ u domba esẹ sěmbaụ, dingangu sěngkatěnggung kapahiakengu litere lanang zaitun baugu sasěmba laaweng dugi, ringangu maněmbang ene e kere sasěmba tinantu waugu MAWU e.

¹³Anạ u domba ene harusẹ̌ potokang i sie su tampạ e nitani waugu pěmamotokang binatang baugu sasěmbang ampungu rosa ringangu sasěmba tinongkạ. Domba ene harusẹ̌ potokang sene ual᷊ingu sasěmba laaweng dugi ringangu sasěmbang ampungu rosa e kai apạe susi tạ sihinge ringangu kai nakoạ buạ u manga imang.

¹⁴Imang e harusẹ̌ mangal᷊ạ kadodọ dahang anạ u domba e kụ bọu ene iwuha su tul᷊i koaneng, su iněngen lima koaneng, su iněngen laedẹ̌ koaneng u tau kụ sarung ilahẹ kai wurěsi.

¹⁵Bọu ene imang tangú kai něngal᷊ạ lanang zaitun kạdodọ dingangu naněbohu ene su pal᷊edu l᷊imane sẹ̌sane sěmběka kaihi.

¹⁶Bọu ene i sie nangunong tal᷊imědong limane koaneng su ral᷊ungu l᷊ana, kụ ipěsị e pitu sul᷊e su ral᷊ungu tentam MAWU.

¹⁷Bọu ene lana kadodọ su l᷊imane e harusẹ̌ iwuha suapạeweng tampạ kụ sem bọu niwuhaěngu raha, kụ nạung su tul᷊ine koaneng, su iněngen lima koaneng, iněngen tal᷊imědong laedẹ̌ koaneng u taumata kụ ilahẹ u kai wurěsi.

¹⁸Lana lěmbene e harusẹ̌ isěbohẹ̌ su pusigu těmbọu tau ene. Ual᷊ingu kerene tangú manga imang e mamangung komol᷊angu pananusin tau ene e su těngon MAWU e.

¹⁹Bọu ene imang e harusẹ̌ maněmbang sasěmbang ampungu rosa tadeạu taumata mal᷊amuhụ ene e mawurěsi. Bọu e i sie harusẹ̌ měmotọ binatang baugu sasěmba tinongkạ

²⁰dingangu maněmbang ene e sěngkasěmba ringangu sasěmba sẹ̌sadiang su wowom pananěmbaěng. Dingangu kerene tangú imang e namangung komol᷊angu pananusi waugu tau ene, kụ i sie nakoạ burěsi.

²¹Kereu tau ene e kasiang dingangu tawa makaumal᷊ẹ̌, waugu sasěmbang awengu kararugi tangú i sie wotonge mẹ̌bawa anạ u domba esẹ sěmbaụ sěmatang baugu sasěmba tinantu waugu MAWU. Sul᷊iung ene tangú, tapoěng sěngkilo ikaugu lanang zaitun baugu sasěmba sẹ̌sadiaěng, dingangu sěngkatěllung literu lanang zaitun.

²²I sie harusẹ̌ lai mẹ̌bawa manụ paluma kawuhuang darua arau těkukurẹ̌ kawuhuang: sěmbaụ baugu sasěmbang ampungu rosa e ringangu sěmbaụ ewe lai waugu sasěmba tinongkạ.

²³Kal᷊awọu sasěmba ene e harusẹ̌ iwawane su anung imang su těngon Tentam MAWU e su ěllo kaual᷊luneng komol᷊ang u pamanusim batangenge.

²⁴Imang něngal᷊ạ e anạ u domba ringangu lanang zaitun ene e ringangu maněmbang ene kere sasěmba tinantu waugu MAWU, kụ ene e tangú kai wuạ u imange.

²⁵Bọu e imang harusẹ̌ měmotọ anạ u domba ene ringangu měmuhang daha kadodọ su tul᷊ine koaneng, iněngen lima koaneng dingangu iněngen laedẹ̌ koanengu tau sarung ilahẹ u kai wurẹ̌si.

²⁶Imang harusẹ̌ maněbohu l᷊ana kadodọ su pal᷊edu l᷊imane kaihi,

²⁷kụ dingangkewelain tal᷊imědon limane koaneng e i sie něměsị u l᷊ana ene e pitu sul᷊e su ral᷊ungu Tentam MAWU.

²⁸Mase lana kạdodọ su l᷊imane e harusẹ̌ iwuha su apan tampạ kụ buhaěngu raha, kụ su tul᷊ine koaneng, su iněngen limane koaneng dingangu iněngen laedẹ̌ koaneng u tau sarung ilahẹ u kai wurẹ̌si.

²⁹Lana lěmbene harusẹ̌ isěbohẹ̌ su wowon těmbọ u tau ene waugu komol᷊angu pananusim batangenge su těngon MAWU e.

³⁰Bọu ene imang harusẹ̌ mẹ̌gěllị u sasěmba manụ paluma sěmbaụ arau těkukurẹ̌ kawuhuang,

³¹baugu sasěmbang ampungu rosa, dingangu sěmbaụko l᷊ai ghahị e wal᷊ine waugu sasěmba tinongkạ sěngkasěmba ringangu sasěmba sẹ̌sadiang e. Dingangu kerene tangú imang e mẹ̌koạ komol᷊angu pěnanusing tau ene e su těngon MAWU e.

³²Ene tangú kai tiahang hal᷊ẹ̌ komol᷊angu pananusi mal᷊iu wọu sahindạ u sakị u pisị makạtatakụ baugu taumata kụ tawe makatatohạ.

³³MAWU e nẹ̌gěllị si Musa nẹ̌duang Harun

³⁴kal᷊awọu tita-Ne mạanung bal᷊e kụ kinarěketangu kal᷊ahupadẹ̌ nẹ̌darakị. Kal᷊awọu tita-Ne ini e nariadi samurin tau Israel nahunsuẹ̌ sol᷊ong banuang Kanaan, banua e nionggọu MAWU e si sire.

³⁵I saing nakahombang kal᷊ahupadẹ̌ su ral᷊ungu wal᷊ene, harusẹ̌ měhabaru ene su imang.

³⁶Kal᷊imonang imang den tawe nạděnta němarikẹ̌sa kal᷊ahupadẹ̌ ene e, i sie harusẹ̌ mẹ̌parenta tadeạu patikụ sabarang e pakisěbang bọu wal᷊e ene. Kereu tala ute, balạewe měnsang apa su ral᷊ungu wal᷊e tangú makoạ mal᷊amuhụ. Bọu ene tangú imang e harusẹ̌ duměnta,

³⁷mědeạu měmarikẹ̌sa kal᷊ahupadẹ̌ ene e. Kereu piạ manga rol᷊one mal᷊aělong arau maral᷊undaha e kụ kakěllaěng kere manga rụl᷊ěnạ su ral᷊ungu maselẹ̌ e,

³⁸ute imang harusẹ̌ měněntang u wal᷊e ene e kụ pakawala kakakunsị e karěngụ u pitu ěllo.

³⁹Su ěllo kapitune i sie harusẹ̌ duměnta kụ saụ mamarikẹ̌sa kapia. Kereu kal᷊ahupadẹ̌ ene e nẹ̌darakị,

⁴⁰tangú i sie harusẹ̌ mangoro tadeạu apam batum meselẹ̌ kụ kinahinoěngu kal᷊ahupadẹ̌ ene e pakiloẹ sarạeweng kasěllahu meselẹ̌ sol᷊ong dal᷊unge pakasue pakịkikisẹ̌. Mase awune ringangu manga watu e harusẹ̌ pakịděmmẹ su tampạ mal᷊amuhụ sěmbaụ sul᷊ikudu soa e.

⁴¹

⁴²Mase apạewem batu kụ nisẹ̌bang e harusẹ̌ awengangu watu wuhu. Kal᷊awọu meselu wal᷊e ene e hinong ěmboěngu ral᷊ěnone spesi wuhu.

⁴³Kereu kal᷊ahupadu wal᷊e ene saụewe mahěsang, sěmbal᷊iau manga watum bal᷊e ene e seng niawengangu manga mesele seng bọu nịtatatětụ kụ sem bọu nịdal᷊ěno kapia,

⁴⁴kụ imang harusẹ̌be rěnta kụ pěmarikěsa wal᷊e ene e kapia. Kamagengu kal᷊ahupadẹ̌ ene mambeng nẹ̌kakeke, tangu wal᷊e ene e seng dal᷊akị

⁴⁵kụ harusẹ̌ goghaheng. Manga watu, kalu, ringangu kal᷊awọu awul᷊u maselẹ̌ e hinong iěntudẹ̌ sol᷊ong tampạ kụ mal᷊amuhụ sul᷊ikudu soa.

⁴⁶Kal᷊imonang ene e walạewe měnsang i sai kụ sumuẹ̌ su ral᷊ungu wal᷊e ene e makoạ mal᷊amuhụ sol᷊ong matangěllo sumědạ.

⁴⁷I sain-saing měmpẹ̌tikị arau měmpẹ̌kaěng su wal᷊e ene harusẹ̌be pěngunsạ pakeange.

⁴⁸Arawe kamagengu imang e ruměnta ringangu tumuhụ pěmamarikẹ̌sane kụ semben tawe něliapuhẹ̌ e tangú, i sie harusẹ̌ měhabarẹ̌ u wal᷊e ene e sem burěsi, batụu apang henẹ e seng nailang kěbị.

⁴⁹Baugu apakasusing bal᷊e e, imang harusẹ̌ mangal᷊ạ manụ u winalangeng duam bạu, kalun cěmara, tal᷊i mahamụ dingangu kalung ěhe sělelang.

⁵⁰Manụ u winalangeng sěmbaụ e harusẹ̌ potokang su wowong kuring lohong akẹ biahẹ̌ bọu enggesang u akẹ.

⁵¹Mase kalun cěmara, tal᷊i mahamụ, ěhe, dingangu manụ u winalangeng kụ dem bědam biahẹ̌ e, harusẹ̌ laeheng su ral᷊ungu raham manụ u winalangeng kụ seng nipotọ kụ su ral᷊ungu akẹ biahẹ̌. Bọu ene wal᷊e ene harusẹ̌ tambuse pitu sul᷊e.

⁵²Manụ winalangeng kụ bědang biahẹ̌ e harusẹ̌ pěllọ su wurase su l᷊ikudu soa. Dingangu kerene tangú imang e mẹ̌děndal᷊eng u komol᷊ang u pananusim bal᷊e, e kụ mědeạu wal᷊e ene e mawurěsị.

⁵³

⁵⁴Kai ene kal᷊awọu atorang u hal᷊ẹ̌ u sakị su pisị makạtatakụ,

⁵⁵karul᷊i, hempang, arau manga rol᷊o mawawira, arau manga sahěnụ su wadang, dingangkeweng henẹ u manga pakeang arau wal᷊e.

⁵⁶

⁵⁷Tiaha tamai ene e gunane ute waugu mapakasahẹ u tamai ene měnsang burěsi wue arau mal᷊amuhụ.