Read Sangir MANGA IMANG 16 Bible Online

MANGA IMANG 16 - Sangir bible

MANGA IMANG 16

¹Ene wọuten anạ i Harun darua e nate, su tempong nẹ̌gěllị u sasěmba putung kụ tawe su kapulung MAWU, MAWU e něhengetang si Musa,

² angkuěngʼE, ”Paul᷊ịko su anạ u sěngkataunu i Harun, u kětạeng su tempo seng nitantu e i sie wotonge sumuẹ̌ su Huang Kasusiange kụ seng nisaraěngu ral᷊anse, u kai seng sene Iạ e nẹ̌těngkatodẹ u watangeng-Ku su ral᷊ungu winawa su wowon tatakạ Peting Pẹ̌dariandi. Kereu i Harun lumawang parenta ene e, i sie sarung mate.

³ Kětạembeng dingangu ral᷊enge mẹ̌gěllịu sasěmba sapi esẹ kawuhuang baugu sasěmbang ampungu rosa ringangu domba esẹ sěmbaụ baugu sasěmba tinongkạ, i Harun botongewe makakasuẹ̌ su Huange Kasusiange.”

⁴Tuhụe wue ute i Harun harusẹ̌ měnitị kal᷊awọu manga pělatorange ini e. Kal᷊imonang sumuẹ̌ Huang e Kasusiange i sie harusẹ̌ měndenọ kụ ene měluheng pakeangu imang, kụ kai lahaweng, sal᷊ana manimbụ, papehẹ, paporong, kěbị e wọu hekạ leneng.

⁵Mase umatʼu Israel harusẹ̌ mẹ̌gěllịu kambing esẹ darua si Harun waugu sasěmbang kal᷊aampungu rosa e ringangu domba esẹ sěmbaụ baugu sasěmba tinongkạ.

⁶I Harun harusẹ̌ mẹ̌gěllịu sapi esẹ sěmbaụ baugu sasěmbang kal᷊aampungu rosa baugu watangenge hala e ringangu ral᷊ohom bal᷊ene.

⁷Kambing esẹ darua wọu umatʼu Israelẹ̌ e harusẹ̌ tondaěnge sol᷊ong těngon tukadu Tentam MAWU.

⁸Sene i sie harusẹ̌ mẹ̌koạ l᷊ahurị kụ mẹ̌pakẹ u watu ruam baụ, kụ sěmbaụ e tialaěng ”baugu MAWU,” dingangu wal᷊ine lai ute, ”waugʼi Azazel.”[5]

⁹Kambing kụ napile waugu MAWU e harusẹ̌ isěmba waugu sasěmbang kal᷊aampungu rosa e.

¹⁰Kambing kụ napile waugʼi Azazel harusẹ̌ ipěllọ biahẹ̌ su těngom MAWU bọu e liwuaheng sol᷊ong kěhu l᷊inggi waugʼi Azazel, tadeạu manga rosan tau Israelẹ̌ e ipakarědasẹ̌.

¹¹Sarětạeng i Harun něgěllị dingangu němotọ sapi esẹ baugu sasěmbang kal᷊aampungu rosa waugu watangenge hala e ringangu waugu ral᷊ohom bal᷊ene,

¹²i sie harusẹ̌ měngal᷊ạ tampạ u putung bọu pananěmbaěng mẹ̌tahong tětuhẹ̌ pakapenẹ, dingangu wuwụ al᷊usẹ̌ dua hěngkung kụ iěntudẹ̌ su Huang Kasusiange.

¹³Buwụ ene tangú harusẹ̌ tawungang su těngom Petiʼm Pẹ̌dariandi, hakịu tipune měhěmbung tatakạ Peti ene kụ i Harun tawe makakasilo u, kamagengu i sie makasilo e, i sie sarung mate.

¹⁴Bọu e i Harun harusẹ̌ mangal᷊ạ kadodọ dahang sapi e, kụ dingangu tal᷊iměndone, i sie měnambusʼu raha ene su wowon tatakạ Petim Pẹ̌dariandi e ringangu pitu sul᷊e sol᷊ong těngom Peti.

¹⁵ Bọu ene i Harun harusẹ̌ měmotọ kambing baugu sasěmbang ampungu rosang kawanuang Israel. Dahang kambing ene e harusẹ̌ iěntudẹ̌ su Huang Kasusiange, mase itambusẹ̌ su těngon tatakạ Petim Pẹ̌dariandi dingangu sol᷊ong těngom Peti, kerẹewe seng nikoạ e ringangu rahang sapi esẹ e.

¹⁶Ual᷊ingu ral᷊enge kerene tangú i sie napakasusing Huang Kasusiange wọu karal᷊amuhụ u tau Israel, ringangu wọu kal᷊awọu karal᷊amuhụ i sire. Tentam MAWU e hinong ipakasusi ual᷊ingu kawe ene sutal᷊oarang pẹ̌darasengangu tau Israel dingangu nikahinoěngu karal᷊amuhụ i sire.

¹⁷Nanětạ bọu piạ i Harun simuẹ̌ Huang Kasusiange baugu mẹ̌koạ komol᷊angu pananusi sarang i sie masěbang, manilaing sarang sěngkatau tawe wotonge piạ u ene su ral᷊ungu Tenta ene. Ene nasuẹeng koạ e munaram pananusi waugu watangenge hala, waugu ral᷊ohom bal᷊ene ringangu waugu kal᷊awọu kawanuang Israel,

¹⁸i Harun harusẹ̌ suměbang dingangu makoạ sol᷊ong pananěmbaěng u sasěmba tinongkạ baugu mapakasusing pananěmbaěng ene. I sie harusẹ̌ měngal᷊ạ dahan sapi kadodọ dingangu rahang kambing, kụ iwuhane su manga sunge su manga wukung pananěmbaěng.

¹⁹Dingangu tal᷊imědone, i sie harusẹ̌ manambusʼu raha ene kadodọ pitu sul᷊e su wowom pananěmbaěng. Dingangu ral᷊enge kerene i sie napakasusing pananěmbaěng bọu karal᷊amuhụ u tau Israel tadeạu makoạ susi.

²⁰Samuring nẹ̌koạ komol᷊ang u pananusing Huange Kasusiange ringangkewelain manga tatakide wal᷊ine wọu Tentam MAWU e ringangu pananěmbaěnge, i Harun harusẹ̌ mẹ̌gěllịu sasěmba kambing biahẹ̌ su MAWU kụ nipile waugʼi Azazel.[6]

²¹I sie harusẹ̌ měměllọu l᷊imane ruamběka su wowon těmbọu kambing ene, apidu kạpẹ̌ngakune kal᷊awọu pẹ̌sasal᷊a, rosa ringangu ral᷊awang u tau Israel. Ual᷊ingu kerene tangú kal᷊awọu pẹ̌sasal᷊an tau Israelẹ̌ e nial᷊ing su wowon těmboụ kambing ene. Bọu ene piạ sěngkatau kụ niapěmunara waugu měliwuahẹ̌ kambing ene sol᷊ong kěhu l᷊inggi.

²²Kambing ene e nẹ̌bawa kěbị dosan tau Israel sol᷊ong banua l᷊inggi kụ tawe pẹ̌tatanakeng dingangu i sie harusẹ̌ ipěllọ su wanua l᷊inggi.

²³ Bọu ene i Harun harusẹ̌ sumuẹ̌ sol᷊ong dal᷊ungu Tenta, měluạ pakeangu imang kụ niluhene su tempong simuẹ̌ su Huang Kasusiange, kụ naněntangu pakeang ene e sene.

²⁴Mase i sie harusẹ̌ měndenọ su tampạ sěmbaụ kụ nitani, ringangu mẹ̌pẹ̌pakẹ pakeange hala e. Bọu ene i sie harusẹ̌ suměbang kụ mẹ̌gěllịu sasěmba tinongkạ baugu kal᷊aampungu rosane hala e ringangu rosan tau Israel.

²⁵Tawang binatang baugu sasěmba ampungu rosa e harusẹ̌ tongkateng su pananěmbaěng.

²⁶Taumata kụ maměllọu kambing baugʼi Azazel su wanua l᷊inggi e harusẹ̌be pěngunsạ pakeange ringangu pěndenọ kal᷊imonang i sie mẹ̌sul᷊e sol᷊ong pẹ̌darasengang.

²⁷ Sapi esẹ dingangu kambing baugu sasěmbang ampungu rosa e, kụ dahane nisuẹ̌ su Huang Kasusiange waugu ampungu rosa e, harusẹ̌ sẹ̌bangeng sol᷊ong likudu pẹ̌darasengang, bọu e i tongkạ. Pisine, ghẹ̌sine ringangu lohon tiangu binatang darua e harusẹ̌ tongkạ kěbị.

²⁸Taumata kụ měnongkạ tangú harusẹ̌be pěngunsạ dingangu pěndenọ těntal᷊ang tawe nạpul᷊ẹ sol᷊ong pẹ̌darasengang.

²⁹ Kal᷊awọu tiahane ini e harusẹ̌ ituke sarang marěngụ-děngụ. Su tanggalẹ̌ kapul᷊one wul᷊angu juli, tau Israel dingangu taumata raghị kụ něngindunụ nẹ̌tanạ dingang i sire tangú harusẹ̌be pẹ̌puhědang dingangu kumbahang měmpemunara, batụu ěllo ini e kai ěllo susi tạ sihinge. Su ěllo ene harusẹ̌be pẹ̌koạ komol᷊ang baugu manusi tau Israel bọu kal᷊awọu rosan sire tadeạu i sire wurěsi.

³²Imang Mawantugẹ̌, kụ seng nial᷊amateng dingangu nitani waugu Ruata apěngaweng si amange, harusẹ̌ mẹ̌koạ komol᷊angu pananusi ene. I sie harusẹ̌ mẹ̌koạ pakeange tani,

³³bọu ene mẹ̌koạ komol᷊angu pananusi Huang Kasusiange, manga wageangewe lai wal᷊ine wọu Tentam MAWU, pananěmbaěng, manga imang dingangu patikụ taumatang Israel.

³⁴Komol᷊ang ene e harusẹ̌ koateng sěnsul᷊e sěntaung baugu mapakasusing tau Israel bọu kal᷊awọu rosan sire. Kụ kai tamai ene kal᷊awọu atorange harusẹ̌ pakịituke sarang marěngụ-děngụ. I Musa nẹ̌koạ e kere niorong MAWU e si sie.