Read Sangir MANGA IMANG 18 Bible Online

MANGA IMANG 18 - Sangir bible

MANGA IMANG 18

¹MAWU e něngoro si Musa

²pělẹ̌habarẹ̌ su tau Israelẹ̌ e kere ini, ”Iạ e kai MAWU Ruatanu.

³Kumbahang mẹ̌těno kakanoạ u tau Misirẹ̌, tampạ e nạung bọu pẹ̌tẹ̌tanakeng i kamene arau taumata su Kanaan, kai sarang apạ e i kamene Takụ ahakeng ini e.

⁴Itukeko kal᷊awọu tita-Ku ringangu pěmpěkoạko apan Takụ ilẹ̌oro. Iạ e kai MAWU Ruatanu.

⁵ Itukeko kal᷊awọu pělatorang dingangu kal᷊awọu tita Takụ nionggọ si kamene. Kereu i kamene mẹ̌koạ kerene, pẹ̌bawiahʼi kamene e masal᷊amatẹ̌. Iạ e kai MAWU.”

⁶MAWU e nangonggọu manga pělatorang ini e. Kumbahang mẹ̌těngkapẹ̌tikị dingangu sěngkatau wọu manga anạ u sěmbaụ u.

⁷Kumbahang mẹ̌sěngkapẹ̌tikị dingang i ninangu, kawing i amangu, batụu i sie kai tataghuaneng i amangu.

⁸ Kumbahang měhinakang si amangu kụ nẹ̌sěngkapẹ̌tikị dingangu sěngkatau wọu kawinge wal᷊ine.

⁹ Kumbahang mẹ̌sěngkapẹ̌tikị dingangu wawinenu arau tuarinu uatạ, baewe nipakasaria su wal᷊e sěmbaụ, arau l᷊ai nipakasaria su wal᷊e wal᷊ine.

¹⁰Kumbahang mẹ̌sěngkapẹ̌tikị dingangu pulungu; ene sarung mapakameang batangengu hala.

¹¹Kumbahang mẹ̌sěngkapẹ̌tikị dingangu wawinenu tamba i amang dingangu hae inang arau tamba inang hae i amang batụu i sie mal᷊aing anạ u sěmbaụ l᷊ai.

¹² Kumbahang mẹ̌sěngkapẹ̌tikị dingangu anạ u sěmbaụ u ghaghurangu, baewe i sie anạ u sěmbaụ i amangu arau anạ u sěmbaụ i ninangu.

¹⁴Kumbahang mẹ̌sěngkapẹ̌tikị dingangu kawing i emponu, batụu i sie mal᷊aing i emponu wawine.

¹⁵ Kumbahang i kau mẹ̌sěngkapẹ̌tikị dingangu anạ u mirarating

¹⁶ arau ringangu kawingu tuhangu.

¹⁷ Kumbahang mẹ̌sěngkapẹ̌tikị dingangu anạ arau pulungu sěngkatau wawine nạung lẹ̌hapikangu. Aramanung i sire kai mararěduhẹ̌ dingangu kụ ene mal᷊aing kakanoạ tawe nihino.

¹⁸Kumbahang mẹ̌kawingu anạ u sěmbaụ u kawingu karěngụeweng kawingu hala e wědam biahẹ̌.

¹⁹ Kumbahang mẹ̌sěngkapẹ̌tikị dingangu sěngkatau wawine karěngụ eweng tempon sie ral᷊engangu rahane, ual᷊ingu i sie su ral᷊ungu karal᷊amuhụ.

²⁰ Kumbahang mẹ̌sěngkapẹ̌tikị dingangu kawingu taumata wal᷊ine; kakakoạ kerene makạkariading kau e mal᷊amuhụ.

²¹ Kumbahang měnarakang u sěngkatau wọu manga anạ u pakisěmba waugu raralo si Molokh, batụu kakakoạ kerene e kai makạhinakang arengu Ruata, MAWUnu.

²² Manga esẹ tawe wotonge mẹ̌sěngkapẹ̌tikị lawọ esẹ; Mawu Ruata e měbẹ̌binsị u kakanoạ kerene.

²³ Manga esẹ arau lai wawine mambeng tawe wotonge mẹ̌sěngkapẹ̌tikị dingangu binatang; kakanoạ dal᷊akisẹ̌ kerene e makal᷊amuhụ si kamene.

²⁴Kumbahang mělamuhụ batangengu ringangu kal᷊awọu kakanoạ ene, batụu ual᷊ingu kakakoạ ene e patikụ umatẹ̌ apang mẹ̌tẹ̌tanạ su Kanaan kal᷊amonang i kamene seng nakal᷊amuhụ batangeng i sire. Ual᷊ingu ene i sire nitokol᷊u MAWU, tadeạu i kamene makapẹ̌tanạ su wanua ene.

²⁵I sire seng němpẹ̌koạ kal᷊awọu kakanoạ makạdarěnting e hakịu ěntanang sire e nakoạ mal᷊amuhụ. Tangú MAWU e němahang si sire kụ tawe napakawalang sire e niapẹ̌tanạ sene. Kai i kamene kumbahang-bahang měkoạ kal᷊awọu kakanoạ ene. I kamene kěbị taumatang Israel dingangu tau raghị kụ nangindunụ dingang i kamene harusẹ̌ mitụ atorang dingangu laorom MAWU,

²⁸tadeạu i kamene kumbahang pahangengʼE arau iapěngal᷊ing bọu ěntana ene kerẹewe taumata wěgang MAWU kụ matanạ sene kal᷊amonang kamene.

²⁹I kamene masingkạ u i saing mẹ̌kẹ̌koạ apang kakanoạ e makạdarěnting, seng tawe lai masowa surekenangu ral᷊ohong kawanuan Duata e.

³⁰Tangú MAWU e něhengetang u, ”Ituke wue kal᷊awọu tita seng Takụ nionggọ dingangu kumbahang mẹ̌těno kakanoạ u taumata apang měmpẹ̌tẹ̌tanạ su ěntanang Kanaan kal᷊amonang kamene. Kumbahang mělamuhụ batangengu hala ringangu kal᷊awọu kakanoạ tamai ene. Iạ e kai MAWU Ruatanu.”