Read Sangir MANGA IMANG 19 Bible Online

MANGA IMANG 19 - Sangir bible

MANGA IMANG 19

¹MAWU e rimolohʼi Musa

² něhabarẹ̌ suapang tau Israelẹ̌ tita kere ini, ”Pakasusiko i kamene, u Iạ e kai MAWU Ruatanu susi.

³ Apan taumata hinong mangadatẹ̌ si amange arau si ninange ringangu měmantugẹ̌ ěllon Sabatẹ̌ kerẹewe seng Takụ ilẹ̌oro. Iạ e kai MAWU Ruatanu.

⁴ Kumbahang měnemba mahan duata. Kumbahang i kamene mẹ̌koạ pakal᷊uang bọu manga wul᷊aeng, sal᷊aka arau wọu haghine wal᷊ine mase pẹ̌sal᷊eěng. Iạ e kai MAWU Ruatanu.

⁵Kereu i kamene mẹ̌gěllịu sasěmba binatang baugu sasěmbang pẹ̌darame, ute ituke wue apan tita kụ seng Takụ nionggọ e tadeạu manga sasěmba ene Takụ itarimạ.

⁶Gěsine harusẹ̌ kinaseng su ěllong binatang ene e potokang arau su sěngkariọěllone. Gěsine apang lěmbene su ěllo katěllune e hinong pakasue i tutung, u ghẹ̌si ene kai ipẹ̌tẹ̌tělling,

⁷kereu ghẹ̌si ene kinaseng lai e, ute sasěmba ene tawe Takụ daekang.

⁸I saing kuminạ gẹ̌si ene e limawang batụu tawe něngarěgang apan seng nihae waugu Iạ e. Tau ene tawe lai Takụ irekeng dal᷊ohong kawanua-Ku.

⁹ Kereu i kamene měměnsạ, kumbahang měhěnsị gandung kụ tụtuwo su manga rul᷊ungu rahaminu, ringangu kumbahang mẹ̌sul᷊e kapia kụ měnampung kal᷊awọu lěmbeng gandung bọu nipěnsạ.

¹⁰Kumbahang mẹ̌sul᷊e sol᷊ong baelu anggorʼu waugu měnampung kal᷊awọu wuang anggorẹ̌ apang nal᷊ěmbe wọu piněměnsakeng i kamene humotonge. Kerene lai apang buane nạung seng něngkahondosẹ̌ e kumbahang purukang i kamene. Těntangke ene e waugʼi sire kasiang dingangu taumata raghị. Iạ e kai MAWU Ruatanu.

¹¹ Kumbahang mẹ̌tako, měngakal᷊ẹ̌, dingangu mẹ̌konti.

¹² Kumbahang mẹ̌kědo su ral᷊ungu areng-Ku, kereu i kamene tawẹ karaki mapakasěhụ u kědo ene, u waugu ual᷊ingu ene e i kamene kai manongkeang areng-Ku. Iạ e kai MAWU Ruatanu.

¹³ Kumbahang mapakasigěsạ u sěndinganeng u ringangu měhampasẹ̌ apal᷊iwụ e. Tatendeng i sai-saing mělẹ̌hal᷊ẹ̌ anung kamene e, kumbahangbe uhungang i kamene, manilaing kětạeng sěhěbi.

¹⁴ Kumbahang měngane taumata wengelẹ̌, dingangu kumbahang měměllọu watu kasasangkonang su těngon tau wuta. Pakal᷊adatẹ̌ko i kamene, ringangu kěngkatakụkong Iạ e, watụ u Iạ e kai MAWU Ruatanu e.

¹⁵ I kamene harusẹ̌ pakatatul᷊idẹ̌ kereu měnawong hukumang; kumbahang manumběka taumata kasiang dingangu kumbahang matakụ u taumata kalạ.

¹⁶Kumbahang mẹ̌kakekeng lahinakang sutal᷊oarang taumata sěngkawanuanu, tadeạu i kamene tawe makakariading papate waugu sěndinganeng u e taumata. Iạ e kai MAWU.

¹⁷ Kumbahang mangune si sai-sai. Pakal᷊iuko pẹ̌dararendehu walạewe měnsang dingang i sai, tadeạu i kamene tawe nẹ̌baradosa ual᷊ingu taumata wal᷊ine.[7]

¹⁸ Kumbahang mamal᷊isẹ̌ une ringangu kumbahang mẹ̌binsị u taumata wal᷊ine, kaiso tal᷊ěntụkon sěndinganengu kerẹewe i kamene tumal᷊ěntụ u watangengu hala e. Iạ e kai MAWU.

¹⁹ Tuhukeko kal᷊awọu tita-Ku e. Kumbahang měngawingu binatang kụ gahị e nẹ̌tatěntang. Kumbahang mẹ̌suangu wine haghine rarua su ěntana sěmbaụ. Kumbahang měluheng pakeang kụ nikahiwuang bọu banaěng haghine rarua.

²⁰Kereu sěngkatau esẹ nẹ̌kědo sarung mẹ̌bal᷊ụ u ěllange wawine su esẹ bal᷊ine mědeạu koateng dokạ e, kụ taumata apang mapulu měměllị ěllang ene e wědang tawe měmaehẹ̌, bọu e taghuange humotonge nẹ̌sěngkapẹ̌tikị dingangu ěllange wawine ene, tangú irědua e hinong i hukung,[8] kai tawe wotonge irědua e hukunang sawukang su singongone, u maningbe kereapa bawine ene e wědambeng ěllange.

²¹Tau esẹ ene e hinong mẹ̌bawa domba esẹ sěmbaụ su těngon tukadu Tenta-Ku waugu sasěmba laeweng dugi.

²²Imang harusẹ̌ měnarakangu domba ene su ral᷊ungu komol᷊angu pananusi, takadeạu rosan tau ene e ampungang. Tangú Iạ e Ruata sarung mangampung i sie.

²³Kereu i kamene seng masuẹ̌ su soang Kanaan kụ mẹsuangu haghing kakaluang mẹ̌bẹ̌bua sene e, tangú karěngụ u těllu taung humotong manga wuane harusẹ̌be pẹ̌tělling i kamene ringangu tawe wotonge kanengang i kamene.

²⁴Su taung kaěpạ e kal᷊awọu wuane harusẹ̌ isěmba tatialang tatarimakasẹ baugu Iạ MAWU.

²⁵Su taung kal᷊imane wuhụewe i kamene wotonge kumaěng buane. Kereu i kamene mẹ̌koạ kal᷊awọu atorange ene, kakaluangu wua-buanu e sarung mẹ̌bua limembong kal᷊awọu lai. Iạ e kai MAWU Ruatanu.

²⁶ Kumbahang kuminạ daha. Kumbahang měngguru kal᷊awọu l᷊ahopa.

²⁷ Kumbahang i kamene měmerosẹ̌ utạ susěndihang u těmbọu, arau měngul᷊ụ bianggụ u.

²⁸Kumbahang měndal᷊esẹ pisinu kụ mẹ̌koạ tatọ arau mapakal᷊esẹ u wadangu kere tatialang mělutu waugu tau nate. Iạ e kai MAWU.

²⁹ Kumbahang mapakanawong kawantugu manga anạ u wawine kụ mapakariading sire tahapẹ̌sundal᷊ẹ̌ su manga pangkunang.[9] Kụ ual᷊ingu pẹ̌kakoạ kerene tangu i kamene nakatongkeang banuang kamene, ringangu kakanoạ dal᷊akisẹ̌ e sarung mẹ̌dahenesang sene.

³⁰ Bantugeko ěllon Sabatẹ̌ e ringangu arěgai wue tampạ kụ nihae waugu mẹ̌dalo si Siạ. Iạ e kai MAWU.

³¹ Kumbahang tamai mẹ̌dorong těgu su manga tahahopa kụ mang piạ kal᷊ahěmpukange ringangu rohkẹ̌ u taumata nate. Kamagengu i kamene mẹ̌koạ ene, ute i kamene měngkal᷊amuhụ. Iạ e kai MAWU.

³²Tatěngkang bue ringangu pěngadatẹ̌ bue taumata maghurang. I kamene e kěngkatakụ beng Iạ, u Iạ e kai MAWU.

³³ Kumbahang mẹ̌koạ dal᷊akisẹ̌ su taumata raghị su soanu.

³⁴Miěbạ i sire tangu i kamene koạbe kere miěbạ u lawọ kawanuang kamene ringangu kěndagẹ̌ beng sire, kerẹewe i kamene kuměndagu watangengu e hala. Pẹ̌tahěndungu i kamene e mal᷊aing bọu měbẹ̌biahẹ̌ kere sěngkatau raghị su Misirẹ̌. Iạ e kai MAWU Ruatanu.

³⁵ Kumbahang měngakal᷊ẹ̌ taumata wal᷊ine ringangu sasukạ, arau timbangeng arau sasupa tawe hinone.

³⁶Pẹ̌pakẹkong sasukạ, arau timbangeng dingangu sasupane kahěngang. Iạ e kai MAWU Ruatanu, kụ naněbang i kamene wọu Misirẹ̌ e.

³⁷Ituke wue kal᷊awọu tita ringangu hengetang-Ku. Iạ e kai MAWU.”