Read Sangir MANGA IMANG 20 Bible Online

MANGA IMANG 20 - Sangir bible

MANGA IMANG 20

¹MAWU e rimolohʼi Musa e

²nẹ̌berang ini e su taumatang Israel, ”Apan taumata sutal᷊oarang kamene arau taumata raghị kụ apang nẹ̌banua sutal᷊oarang kamene kụ něnarakangu anạ e si Molokh, harusẹ̌ ěntungangu watu sarang mate kahiang patikụ kawanua.

³Taumata něnarakang u anạ e su mahang duata i Molokhẹ̌ e něndal᷊akị Tenta-Ku ringangu nakaral᷊akị areng-Ku susi e. I sie sarung Takụ ihukung kụ sen tawe irekeng umatẹ̌-Ku.

⁴Kereu kawanua e seng mẹ̌timbuta su kakanoạ u tau ene kụ tawe měndal᷊engu hukumang u papate si sie,

⁵ute Iạ sẹ̌saku e měhukung i sie, kal᷊awọu ral᷊ohong bal᷊ene, ringangu patikụewe taumata apang dingange naněntangu Iạ e kụ mẹ̌suba si Molokh. I sire seng tawe Takụ lai irekeng umatẹ̌-Ku.

⁶Taumata apang nakitěgu su manga tahahopa kụ piạ kal᷊ahěmpukange ringangu himukudʼu taumata nate, kụ sarung Takụ ihukung dingangu tawe Takụ lai irekeng umatẹ̌-Ku.

⁷Pakarariagạ bue i kamene tadeạu kạtatanạbe susi u Iạ e kai MAWU Ruatanu.

⁸Ituke wue manga tita-Ku, u kai Iạ e MAWU seng němile si kamene waugu Iạ e.”

⁹ MAWU e nẹ̌gěllịu manga tiahane ini e, ”I saing mangane si amang e arau si ninange harusẹ̌ ihukungu papate. I sie nate ual᷊ingu pẹ̌sasal᷊ane hala.

¹⁰ Kereu sěngkatau taumatang Israel e nawuang dingangu kawingu sěngkatau lawọ kawanua sěmbaụ e, i sie ringangu wawine ene e hinong ihukungu papate.

¹¹ Sěngkatau esẹ kụ mẹ̌sěngkapẹ̌tikị dingangu sěngkatau wọu kawingʼi amange, i sie nẹ̌kabasarang tataghuaneng i amange. Esẹ dingangu wawine ene e hinong ihukungu papate. I sire nate kahiang pẹ̌sasal᷊ang sire hala e.

¹² Kereu sěngkatau esẹ mẹ̌sěngkapẹ̌tikị dingangu anạ e wawine mirarating, irědua ene hinong ihukung u papate. I rẹ̌dua e sen nawuang, dingangu nate ual᷊ingu pẹ̌sasal᷊an sire hala.

¹³ Kereu sěngkatau esẹ mẹ̌sěngkapẹ̌tikị dingangu esẹ bal᷊ine, i sire kai nẹ̌koạ kakanoạ u tingkaị tạ sihinge ringangu nakararěnting, kụ irẹ̌dua e harusẹ̌ ihukung u papate. I sire něngkapate ual᷊ingu pẹ̌sasal᷊an sire hala.

¹⁴ Kereu sěngkatau esẹ mẹ̌kawingu sěngkatau wawine ringangu i ninang u wawine ene e, i sire těllu kěbị e harusẹ̌ tutung sarang mate, batụu i sire e kai němpẹ̌koạ kakanoạ i sire tawe nẹ̌tatahino. Kakanoạ kerene hinong tawe wotonge mariadi su tal᷊oarang kamene.

¹⁵ Kereu sěngkatau esẹ mẹ̌sěngkapẹ̌tikị dingangu binatang, taumata ringangu binatang ene e harusẹ̌ pateěng.

¹⁶Kereu sěngkatau wawine mẹ̌sěngkapẹ̌tikị dingangu binatang, bawine ringangu binatang ene e harusẹ̌ pateěng. I sire něngkapate ual᷊ingu sal᷊an sire hala.

¹⁷ Kereu sěngkatau esẹ mẹ̌sěngkapẹ̌tikị dingangu wawinene tamba i amang hae inang arau tamba inang hae amang, i sire mal᷊aing tawe i koạ kere ral᷊ohong kawanua-Ku. I sire kai seng němpẹ̌koạ kakanoạ tawe hinone ringangu harusẹ̌ měnal᷊udẹ̌ aị e.

¹⁸ Kereu sěngkatau esẹ mẹ̌sěngkapẹ̌tikị dingangu sěngakatau wawine rẹ̌dal᷊engangụ raha e, i sire tawe lai i koạ kere ral᷊ohong kawanua-Ku e.

¹⁹ Kereu sěngkatau esẹ mẹ̌sěngkapẹ̌tikị dingangu tuarin ninange, irědua kěbị e harusẹ̌ manal᷊udẹ̌ aị u ral᷊awang irědua ene e.

²⁰Kereu sěngkatau esẹ mẹ̌sěngkapẹ̌tikị dingangu kawingu tuaring amange, i sie mạnongkeang tuaring amange. Esẹ dingangu wawine ene e harusẹ̌ měnanggung hukumang irědua. Sarang tempom mate i sire tawe makahombang pělahite.

²¹ Kereu sěngkatau esẹ měmul᷊aho kawingu tuarine, i sie něhinakang tuarine ringangu i sie někoạbe hal᷊ẹ̌ tawe nẹ̌tatahino. Sarang mate i sire tawe makahombang pal᷊ahite.”

²²MAWU e něhengetang, ”Itukeko kal᷊awọu tita-Ku, ringangu laoro-Ku, tadeạu i kamene tawe iuserẹ̌ bọu wanuang Kanaan, su tampạ i kamene Takụ tondaěng.

²³Kumbahang mẹ̌těno tundun sire kawanua mẹ̌tanạ sene. I sire kai makapěmuta si Siạ ual᷊ingu kal᷊awọu kakanoạ i sire raral᷊akisẹ̌ e. Kai suwụ u ene i sire Takụ lěliwuaheng, tadeạu i kamene makakasuẹ̌ sol᷊ong banua ene.

²⁴Ěntana kụ kalạ dingangu matawa ene e seng Takụ nikědo si kamene, kụ Takụ nionggọ si kamene nakoạ tataghuaneng i kamene. Iạ e kai MAWU Ruatanu kụ namětang kamene wọu kal᷊awọu manga umatẹ̌ bal᷊ine e.

²⁵Ual᷊ingu ene i kamene harusẹ̌ mapẹ̌dal᷊ahae pakahino binatang ipẹ̌tẹ̌tělling bọu tawe ipẹ̌tatatělling. Kumbahang kuminạ binatang kụ ipẹ̌tẹ̌tělling. Binatang ene e seng Takụ nipaul᷊ị u kai ipẹ̌tẹ̌lling, kụ kamageng u i kamene měmpahungkinạ ute i kamene kai nakoạ taumata mal᷊amuhụ.

²⁶I kamene Takụ ihae wọu kawanua wal᷊ine tadeạu makoạ tataghuaneng-Ku. I kamene harusẹ̌be susi, kai Iạ e MAWU, kụ Iạ e kai susi.

²⁷Apang manga esẹ arau wawine kụ piạ kal᷊ahěmpukang e ringangu himukudʼu kal᷊awọu apang taumata nate tangu harusẹ̌ bahungem batu sarang pakapate. Tau ene mate ual᷊ingu sal᷊ane sẹ̌sane.”