Read Sangir MANGA IMANG 21 Bible Online

MANGA IMANG 21 - Sangir bible

MANGA IMANG 21

¹MAWU e nangoro si Musa pěhabaru parenta ini e su manga imang hěntong Harun, ”Sěngkatau imang tawe wotonge mẹ̌těngkal᷊amuhụ u watangenge, ual᷊ingu tumol᷊e mělahampugu manga anạ u sěngkataune,

²diluaru nate ene e kawe i ninang e arau i amang e, arau anạ e, arau anạ sěmbaụ e esẹ,

³arau anạ u sěmbaụ e wawine kụ bědang tawe nẹ̌kẹ̌kawing, kụ mạtanạ su wal᷊e sěmbaụ dingange.

⁴I sie tawe wotonge mẹ̌těngkal᷊amuhụ u watangenge kụ tumol᷊e mělahampugu manga anạ u sěngkataung kawinge.

⁵ Sěngkatau imang tawe wotonge mělungguhẹ̌ těmbọ e sarang manga sěngkempang arau sěmpalang dingangu tawe wotonge měngul᷊ụ bianggụ e arau mapakal᷊esẹ u wadange ringangu sạbarang mal᷊ahoro mạnodẹ u i sie kai kapẹ̌lẹ̌lutune.

⁶I sie kai tataghuaneng-Ku e hala ringangu tawe wotonge makatongkeang areng-Ku. I sie nẹ̌gěllịu sasěmba kẹ̌kanengang si Siạ e, kụ i sie harusẹ̌be susi.

⁷Sěngkatau imang tawe wotonge mẹ̌kawing dingangu sěngkatau wawine nạung bọu nawuang arau sěngkatau wawine kụ bal᷊inewe parawang arau seng bọu nẹ̌tal᷊ei, ual᷊ingu imange kai tataghuaneng-Ku.

⁸Tau Israel harusẹ̌be mangakung imang e kai kere sěngkatau nitani waugu Iạ e ual᷊ingu nẹ̌gěllịu sasěmba kẹ̌kanengang si Siạ e. Iạ e kai MAWU; Iạ ini e kai susi, ringangu Iạ e mapakasusing umatẹ̌-Ku e.

⁹Kereu anạ bawine wọu sěngkatau imang kawe makoạ tahasundal᷊ẹ̌ e, i sie makatongkaeng si amange, kụ hinong ipakahěngisẹ̌ sarang mate.

¹⁰Imang Mawantugẹ̌ e seng nial᷊amateng dingangu kakakoạ e tuhụ tundung měněbohu l᷊ana su pusige ringangu mapěluheng pakeangu imang mawantugẹ̌ e si sie. Ual᷊ingu ene i sie tawe wotonge mapakawalang utạ e naral᷊usu arau měnggaghonaị pakeange tialang mělẹ̌lutu.

¹¹I sie seng nisěmba si Siạ baugu makoạ tataghuaneng-Ku, kụ tawe wotonge mapakal᷊amuhụ u watangenge. I sie tawe wotonge lai mapakal᷊amuhụ u Tenta-Ku e kụ suměbang bọu ene kụ sumuẹ̌ su wal᷊e kụ piạ maiete; manilaing ene kai maietʼi amange arau maietʼi ninange hala e.

¹³I sie kětạeng botonge mẹ̌kawing dingangu sěngkatau wawine parawang bọu kawanuane hala e. I sie tawe wotonge mẹ̌kawing dingangu sěngkatau wal᷊u arau sěngkatau wawine kụ seng nitěntang arau sěngkatau wawine kụ nạung tahapẹ̌sundal᷊ẹ̌.

¹⁵Kereu i sie lumampa atorange ene e, tangú manga anạ e kụ nạung hinong susi e sarung mal᷊amuhụ. Iạ e kai MAWU ringangu Iạ seng něhaeng sie nakoạ Imang Mawantugẹ̌.”

¹⁶MAWU e něngoro si Musa

¹⁷waugu pěhabaru ini e si Harun, ”Sěngkatau wọu hitenu wadange piạ turạ e tawe wotonge mẹ̌gěllịu sasěmba kěkanengang baugu Iạ e. Ene e mariadi waugu sarang marěngụ-děngụ.

¹⁸Taumata kụ mẹ̌gěllịụ sasěmba e tawe wotonge wadange piạ turạ e, kụ i sie kai wuta, arau peosẹ̌, taumata kụ gatine piạ manga witạ e arau wal᷊unange piạ manga ghainge,

¹⁹takiahe nipatene arau laede kempal᷊ẹ̌,

²⁰kụ běkung arau katẹ, piạ sakị e su mata arau sakị e su pisị ringangu i sain seng bọu nikabiri.

²¹Apang pal᷊ahiteng Imang i Harun kụ badange piạ kurange tawe wotonge měnarakang u sasěmba kẹ̌kanengang si Siạ e.

²²Kaiso i sie wotonge kumaěng kaěng kụ nikoạ sasěmba, waẹbe sasěmba kẹ̌kanengang kụ susi arau waẹbe lai sasěmba kẹ̌kanengang kụ něngalembongkeweng kasusine.

²³Batụu taumata ene e wadange kai piạ turạ e, kụ i sie tawe wotonge mẹ̌těngkaraning darěndung sasara Huang Kasusiange arau pananěmbaěng. I sie tawe wotonge mapakal᷊amuhụ u kal᷊awọu manga apal᷊iwụ kụ seng nihae waugu Iạ, u kai Iạ e MAWU ringangu kai Iạ e něhae kal᷊awọu apal᷊iwụ tamai ene.”

²⁴Seng tamai ene e kal᷊awọu tita nihabarʼi Musa si Harun dingangu manga anạ e ringangkeweng patikụ taumatang Israelẹ̌ e.