Read Sangir MANGA IMANG 22 Bible Online

MANGA IMANG 22 - Sangir bible

MANGA IMANG 22

¹MAWU něngoro si Musa

²pělẹ̌habaru tita ini si Harun dingangu manga anạ e, ”Koạko kere hinone apa nạung nikoạ sasěmba kahian tau Israel nihae samatang baugu Iạ, tadeạu i kamene tawe makasamedẹ̌ areng-Ku susi e. Iạ e kai MAWU.

³Kereu sěngkatau wọu hěntong kamene kai su ral᷊ungu karal᷊amuhụ kụ humaung kal᷊awọu sasěmba susi kụ nitaning tau Israel baugu Iạ, i sie tawe nipakawala lai waugu pẹ̌tangkiang su pananěmbaěng. Atorange ene e rụdal᷊eng sarang marěngụ-děngụ. Iạ e kai MAWU.

⁴Sěngkatau hěntong Harun kụ nirorokangu sakị e su pisị makatatakụ, arau piạ sakị e su wadang pělli kụ piạ nanane lụelehẹ̌, kumbahang kumaěng sasěmba kụ susi e, kereu i sie reng tawe nạl᷊ahẹ u kai sem burẹ̌si. Sěngkatau imang mạl᷊amuhụ kereu i sie měnenggehẹ̌ apa-apa nạung nal᷊amuhụ ual᷊ingu kinahinoěngu maietẹ̌. I sie mal᷊aing mal᷊amuhụ kereu akẹ u wadang e pělli e suměbang

⁵arau měnenggehẹ̌ binatang arau taumata mal᷊amuhụ.

⁶Sěngkatau imang balạewe měnsang kereapa kụ nal᷊amuhụ e, ute mang těbe mal᷊amuhụ sarang matangěllo sumědạ. Dingangu bouten sumědạ e i sie ren tawe wotonge kumaěng kaěng isěmba su MAWU e kereu i sie ren tawe nẹ̌děndenọ.

⁷Samuring matangěllo sumědạ e i sie wurẹ̌si kụ seng kumaěng, batụu kai ene e kaěnge.

⁸I sie isẹ̌sěding kuminạ gěsing binatang kụ nate sẹ̌sane arau nate nitěmboěngu binatang dul᷊u. Kereu i sie kuminạ, tangú i sie makoạ mal᷊amuhụ. Iạ e kai MAWU.

⁹Kal᷊awọu imang harusẹ̌ tumuhụ kal᷊awọu tita nạung seng Takụ nionggọ. Mangawe tala ute, i sire nẹ̌sal᷊a, kụ sarung mate, watụ u kai limampa kal᷊awọu tita kụ susi ene. Iạ e kai MAWU, kụ kawe Iạ e napakatěntaning sire e waugu Iạ.

¹⁰Sasěmba kụ nitani waugu Iạ e wotonge ipẹ̌biahu walagu manga imang ene hala; taumata wal᷊ine e tawe wotonge, manilaing tau ene wal᷊e sěmbaụ dingangu imang ene e arau taumatan sewa.

¹¹Arawe kal᷊awọu ěllang apang niwělliang u manga imang e ringangu roitʼi sire hala e arau apạeweng nikawantelẹ̌ su ral᷊ungu wal᷊ene, wotongewe kumaěng kaěng bahageang u imang ene e.

¹²Dariọ bawine anạ u sěngkatau imang kụ nẹ̌kawing u sěngkatau kụ bal᷊inewe imang e, tawe wotonge kumaěng sasěmba ene.

¹³Arawe rariọ bawine, ahusu imang kụ seng nawal᷊u arau nitěntang tawẹ anạ e kụ bọu ene mẹ̌bal᷊ị sol᷊ong bal᷊eng amange kụ makoạ tanggunange, botonge kumaěng kaěng bageang i amange. Kětạembeng balagu imang sẹ̌sane e wotonge kumaěng sasěmba ene.

¹⁴Kereu sěngkatau wal᷊ine ral᷊ohom balagu imang kụ bal᷊inewe pinẹ̌tatudẹ kimaěng kaěng kụ nisěmba su MAWU e, i sie harusẹ̌ mẹ̌gěllịu l᷊aawenge su imang timuangu l᷊ai ruam pul᷊o su kapahiakenge.

¹⁵Manga imange tawe wotonge mapakal᷊amuhụ u sasěmba kụ nitani waugu Iạ e

¹⁶kụ iwala pakikaěng su taumata kụ tawe hinong piạ hakẹ̌ e kumaěng. Hal᷊ẹ̌ kerene kai makawodaị tau ene nẹ̌sal᷊a ringangu makakarěntang hukumang si sie. Iạ e kai MAWU, ringangu kai Iạ e mapakasusing sasěmba ene.”

¹⁷MAWU e rimolohʼi Musa

¹⁸apěgẹ̌gěllị si Harun, manga anạ e, ringangu patikụ taumatang Israelẹ̌ e kal᷊awọu atorang e tamai ini e. Kereu sěngkatau tau Israel arau sěngkatau raghị kụ matanạ mạngindunụ su Israel mạněmbang sasěmba tinongkạ baugu ipěmaehẹ̌ pẹ̌kakakědo e, arau waugu sasěmba wọu naung tawe nisihasa, binatang ene ute harusẹ̌be esẹ, kụ tawe wotonge piạ turạ e mědeạu wotongewe itarimạ.

²⁰ Kumbahang maněmbang binatang kụ piạ turạ e, batụu MAWU e tawe mapulu rumaẹ ene.

²¹Kereu pẹ̌sěngkatau maněmba su MAWU sasěmbaʼm pẹ̌darame waugu ipěmaehẹ̌ kědone arau waugu sasěmba wal᷊inewe nasihasa, ute binatang ene e tawe wotonge piạ turạ e, tadeạu wotonge itarimạ.

²²Kumbahang maněmba su MAWU kụ kawe maněmbang sasěmba binatang kụ buta, ruhine napědi, arau nal᷊esẹ, piạ bisul᷊e měnẹ̌nanạ, nirorokangu sakị u pisị arau kěheěng. Binatang kerene abe koạ sasěmba waugu sasěmba kẹ̌kanengang su wowom pananěmbaěng.

²³Baugu sasěmba tawe nisihasa e, i kamene wotongewe maněmbang binatang kụ tawe nawangung luhude; kaiso waugu ipěmaehẹ̌ pẹ̌dariandi e, binatang kerene e tawe ikawal᷊i.

²⁴Kumbahang mẹ̌gěllịu sasěmba su MAWU binatang kụ batune nararul᷊ẹ ual᷊ingu nahepesẹ̌, nipotọ, lesẹ e nawawunal᷊ẹ̌ arau niremmẹ. Hal᷊ẹ̌ kerene tawe wotonge mariadi su wanuanu.

²⁵Binatang kụ kinahombangeng bọu tau raghị e tawe wotonge ikoạ sasěmba kẹ̌kinaseng. Binatang ene e kai seng narekeng piạ turạ e kụ seng tawe hinong ipakẹ̌.

²⁶Anạ u sapi, anạ u domba arau anạ u kambing kụ buhu ral᷊ěpụ e harusẹ̌ kạtatanạ dingangʼi ninange karěngụ u pitu ěllo. Buhụ ewe wọu ene binatang ene e wotonge itarimạ makoạ sasěmba kẹ̌kinaseng.

²⁸Kumbahang měnarakang u iněngen sapi arau domba arau kambing sěngkaonggọ dingangu anạ su ěllo sěmbaụ.

²⁹Kereu i kamene mẹ̌gěllịu sasěmba tatarimakasẹ su MAWU e, ute koạko tamai ene tuhụ tiahane, tadeạu sasěmbanu e raekang.

³⁰Kaěngke sasěmba ene su ěllo ene lai kụ abe sarang mal᷊ambe manga sěngkodọ baugu sěngkariọěllone.

³¹MAWU e něhengetang, ”Tuhuke wue kal᷊awọu hengetang-Ku; Iạ e kai MAWU.

³²Kumbahangbe mapakal᷊amuhụ u areng-Ku susi e, patikụ kawanuang Israel harusẹ̌ mẹ̌suba maněmba si Siạ Duata Kasusiange. Iạ e MAWU ringangu kai Iạ něndiadi si kamene nakoạ susi.

³³Iạ naněmbang i kamene wọu Misirẹ̌ e, tadeạu Iạ makoạ Duatang kamene. Iạ e MAWU.”