Read Sangir MANGA IMANG 23 Bible Online

MANGA IMANG 23 - Sangir bible

MANGA IMANG 23

¹MAWU e nẹ̌gěllịu si Musa

²kal᷊awọu tiahang pamamantugẹ̌ agama kụ hinong iwohang kere sěmbaụ ěllo masěllahẹ̌ hinong pẹ̌kal᷊iomanengang.

³ Ěnnung u ěllo e waugu ipěmunara, arawe su ěllo kapitune ute kai ěllong Sabatẹ̌, kụ kai ěllong pěngangirul᷊eěng nihae waugu MAWU e. Su ěllo ene i kamene harusẹ̌ mẹ̌koạ komol᷊angu mẹ̌kal᷊iomaneng, kụ tawe wotonge mẹ̌munara.

⁴Kụ kai ini e ěllo masasěllahẹ̌ kụ seng nitantuʼm MAWU kụ harusẹ̌ iwohang su tempone seng nipoěng ene.

⁵ Ěllong Kawantugu Paskah e wẹ̌bantughang baugu měngadatẹ̌ MAWU, manětạ bọu matangěllo sumědạ su tanggalẹ̌ kapul᷊o ěpạ e su wul᷊ang humotong.

⁶ Sěngkarịěllone, tanggalẹ̌ kapul᷊o l᷊imane, nanětạ e Pamamantugu Ěllong Borotẹ̌ Tawẹ Kabọ e, dingangu karěngụeweng pitu ěllo e i kamene tawe wotonge kumaěng borotẹ̌ kụ nikoạ piạ kabọ e.

⁷Karengụ u pitu ěllo ene e, i kamene harusẹ̌ mẹ̌gěllịu sasěmba kẹ̌kanengang baugu MAWU e. Su ěllo kahumotongange ringangu kapitune su pěmamantugẹ̌ ene e, i kamene harusẹ̌ měmpẹ̌komol᷊ẹ̌ mẹ̌kal᷊iomaneng dingangu tawe wotonge měmpěhal᷊ẹ̌ hal᷊ẹ̌ mawawěhạ.

⁹Kereu i kamene seng nahumpạ u wanua nionggọ u MAWU si kamene, ringangu měngomol᷊u ghẹ̌sing ěntana, běkisʼu gandung nipěnsạ i kamene kahumotongange harusẹ̌ ěntudẹ̌ su anung imang.

¹¹Su ěllo samuring ěllong Sabatẹ̌, imang harusẹ̌ maněmbang gandung ene e mẹ̌sul᷊ungu sasěmba papasilo su MAWU, tadeạu MAWU e mal᷊uasẹ̌ bue naungʼE si kamene.

¹²Su ěllo i kamene maněmbang gandung ene e, i kamene harusẹ̌ lai maněmbang sasěmba tinongkạ anạ u domba esẹ umbure sěntaung kụ tawẹ turạ e.

¹³Baugu sasěmba kẹ̌kanengang tangu pẹ̌gěllịko tapoěng duang kilo laụ su lanang zaitun. Dal᷊urung sasěmba ene e makạbinsana naungu MAWU e. Sěngkahindọ dingangu sasěmba ene tangú sěmbako l᷊ai anggorẹ̌ sěliterẹ̌.

¹⁴Kal᷊amonang mangěntudẹ̌ sasěmba ene su MAWU, i kamene tawe wotonge kumaěng sarang kadodọ-dodọ gandung buhu ene, baewe tamatạ arau seng nitapa arau nitongkạ makoạ borotẹ̌. Atorang ene e harusẹ̌ itukang u kal᷊awọu hěntong kamene sarang marěngụ-děngụ.

¹⁵ Menětạ bọu ěllo mal᷊iung Sabatẹ̌, su tempong i kamene maněmbang manga wěkisu gandung humotonge su MAWU, i kamene harusẹ̌ měndekeng pitung kamisa tiwatu.

¹⁶Su ěllo kal᷊imam pul᷊one, kụ suěllo tuhụ u Sabatẹ̌ kapitune, i kamene harusẹ̌ mapẹ̌bawa sasěmba sẹ̌sadiaěng su MAWU e.

¹⁷Apạeweng balagẹ̌ e harusẹ̌ maněmbang borotẹ̌ pẹ̌tahạ dua baugu sasěmba ipasilo su MAWU e. Apam borotẹ̌ harusẹ̌be koạ bọu tapoěng al᷊usẹ̌ duang kilo laukeng kabọ kụ harusẹ̌ isarakang su MAWU kere sasěmba ghẹ̌sing ěntana e humotong.

¹⁸Kụ dingangkeweng borotẹ̌ ene e tau Israel harusẹ̌ maněmbang anạ u domba pitumbaụ umbure sěntaung, sapi esẹ kawuhuang sěmbaụ dingangu kambing duambaụ. Sěngkatau-sěngkatau tawe wotonge piạ u piạ turạ e, ringangu harusẹ̌ isěmba waugu sasěmba tinongkạ baugu MAWU, dingangu sasěmba sẹ̌sadiaěng dingangu sasěmba akẹ u anggorẹ̌. Dal᷊urung sasěmba ene e makạl᷊uasẹ̌be naungu MAWU.

¹⁹Sěmbako l᷊ai kambing esẹ sěmbaụ baugu sasěmbang kal᷊aampungu rosa, ringangu domba esẹ duambaụ umbure pẹ̌sěntaung baugu sasěmbang pẹ̌darame.

²⁰Borotẹ̌ dingangu anạ u domba rarua ene e harusẹ̌ isěmbang imang kere sasěmba ipasilo su MAWU, kụ ene e ute wuạ u imang. Kal᷊awọu sasěmba ene e kai susi.

²¹Su ěllo ene i kamene harusẹ̌be pẹ̌koạ pẹ̌sasasombang baugu mẹ̌kal᷊iomaneng kụ tawe wotonge mẹ̌koạ hal᷊ẹ̌ mawawěhạ. Atorang ene e harusẹ̌be pakiraringihẹ̌ su hitenu e sarang marěngụ-děngụ, balạewe měnsang suapa i sire mạtanạ.

²² Kereu i kamene měměnsạ, kumbahangbe měměbasẹ̌ gandung apang měmpạhuntuwo su wiwihu manga rahaminu, kụ abe pẹ̌sul᷊e měngomol᷊ẹ̌ gandung lěmbeng bọu pinaměnsakeng. Balạekere ene waugu taumata kasiang dingangu tau raghị. MAWU e kai Ruatanu.

²³Tanggalẹ̌ humotong bul᷊ang kapitune hinong batughang kere ěllo nitani waugu pẹ̌ngangirul᷊eěng. Ěllo ene tẹ̌tialaěngu tingihʼu slompretẹ̌ kụ i kamene harusẹ̌ pẹ̌komol᷊ẹ̌ pẹ̌kal᷊iomaneng.

²⁵Pěgěllịko sasěmba kaěng su MAWU kụ kumbahang mẹ̌koạ hal᷊ẹ̌ mawawěhạ su ěllo ene.

²⁶ Su tanggalẹ̌ kapul᷊one wul᷊ang kapitune e kai ěllong komol᷊angu apan taung baugu kal᷊aampungu rosan tau Israel. Su ěllo ene e i kamene harusẹ̌ pěmpẹ̌tingkědang dingangu pěmpẹ̌komol᷊ẹ̌ baugu mẹ̌kal᷊iomaneng dingangu maněmbang sasěmba kẹ̌kanengang baugu MAWU.

²⁸Kumbahang měmunara, u ěllo ene e kai ěllong kal᷊aampungu rosa, tadeạu i kamene makahombang kal᷊aampung su těngon MAWU Ruatanu.

²⁹I saing kumaěng apa-apa su ěllo ene, tawe lai irekeng kawanuan Duata.

³⁰Dingangu i sai-saing měmpẹ̌koạ munarane su ěllo ene e, ihukung u MAWU hala e ringangu hukumang papate.

³¹Atorang ene e iparal᷊eng baugu patikụ hěntong kamene walạewe měnsang i sire e měmpẹ̌tẹ̌tanạ suapa.

³²Manětạ bọu matangěllo sumědạ su tanggalẹ̌ kasione wul᷊ang ene sarang tempong matangěllo sumědạ su tanggalẹ̌ kapul᷊one, harusẹ̌ bantugheng kamene kere ěllong Sabatẹ̌, ěllọ e pinakatuntụ baugu pěngangirul᷊eěng. Kanandung ěllo ene i kamene harusẹ̌be pěmpẹ̌puasa.

³³ Sal᷊iwangu Selong Daukalu e nanětạ su tanggalẹ̌ mapul᷊o lima wul᷊angu ayerẹ̌ putị kadodọ dingangu karěngụ e pitu ěllo.

³⁵Karěngụ u pitu ěllo ene e, apang kal᷊aěllo i kamene harusẹ̌ paněmbang sasěmba kẹ̌kanengang. Su ěllo humotong dingangu kaual᷊une i kamene harusẹ̌ pẹ̌koạ pẹ̌sasasombang baugu mẹ̌kal᷊iomaneng dingangu maněmbang sasěmba kẹ̌kanengang baugu MAWU. Kumbahang měmpěhal᷊ẹ̌ mawawěhạ su ěllo ene.

³⁷U seng tamai ene kal᷊awọu ěllong agama masasěllahẹ̌ nitilakehu MAWU e ringangu harusẹ̌ bohangeng i kamene. Su apang ěllom pamamantugẹ̌ ene e, i kamene harusẹ̌ měmpěngadatẹ̌ MAWU ringangu pẹ̌koạ komol᷊angu mẹ̌kal᷊iomaneng dingangu maněmbang sasěmba kẹ̌kanengang, sasěmba tinongkạ, sasěmba sẹ̌sadiaěng, sasěmba binatang dingangu sasěmba akẹ u anggorẹ̌, kal᷊awọeweng gẹ̌gausang apạeweng kal᷊aěllo e.

³⁸Parahul᷊iagʼu pamamantugẹ̌ ene e, nakoạ kere tatimune su apang ěllon Sabatẹ̌ kere wiasa e, kụ apạeweng sasěmba ene ute mal᷊aing tatimu sasěmbang kamene wiasa, su sasěmbang kamene waugu ipanubusẹ̌ pẹ̌kakědo, arau sasěmba wal᷊ine nasihasa e nisěmbang kamene su MAWU.

³⁹ Nal᷊iung pamaměnsạ, nanětạ bọu tanggalẹ̌ mapul᷊o lima wul᷊ang ayerẹ̌ putị kadodọ, i kamene harusẹ̌ pẹ̌koạ parahul᷊uasẹ̌ karěngụ u pitu ěllo. Ěllo humotong dingangu kaual᷊une ute kai ěllo natuntụ baugu pěngangirul᷊eěng.

⁴⁰Su ěllo humotong i kamene harusẹ̌ pěmpěnipo manga wuane karal᷊ěnggihange wọu ral᷊ungu rahaminu, kerene lai manga raukalung palma ringangu manga hakondang kakaluang masasuhampạ, mase wọu ene panětạ e parahul᷊uasẹ̌ baugu mangadatẹ̌ MAWU Ruatanu.

⁴¹Parahul᷊uasẹ̌ ene e harusẹ̌be koạ i kamene karěngụ u pitu ěllo. Atorang ene e harusẹ̌be koạ u hiteng kamene sarang marěngụ-děngụ.

⁴²Pitu ěllo karěngụ e kal᷊awọu kawanuang Israel harusẹ̌ měmpẹ̌tanạ su ral᷊ungu manga selong daukalu,

⁴³tadeạu pal᷊ahiteng kamene e masingkạ u MAWU e rimolohʼu kawanuang Israel pẹ̌tanạ su ral᷊ungu manga selọ e wiasa, piạ i Sie napasěmbang i sire wọu Misirẹ̌. Kai i Sie MAWU Ruatanu.

⁴⁴Kerene i Musa něhabaru atorangu pẹ̌kakakoạ parahul᷊uasẹ̌ baugu měngadatẹ̌ MAWU e, su tau Israel.