Read Sangir MANGA IMANG 24 Bible Online

MANGA IMANG 24 - Sangir bible

MANGA IMANG 24

¹MAWU e nangoro si Musa

²apạngonggọu manga titanʼE ini e su taumatang Israel: Pěmpẹ̌bawako lanang zaitun burẹ̌si ringangu kal᷊ěnggihange waugu sol᷊o su ral᷊ungu Tentam MAWU, tadeạu wotonge ikarikọ harusẹ̌be rụděllị.

³I Harun harusẹ̌be měhundugẹ̌ manga sol᷊o ene reng dokeng bawěllo sarang mal᷊ukadẹ̌ e su tampạ karěntaěngu MAWU, sul᷊ikuʼu rarěndung nakal᷊indung Peting Pẹ̌dariandi su Huang Kasusiange. Parenta ene harusẹ̌be koạ sarang marěngụ-děngụ.

⁴I Harun harusẹ̌ mangurusẹ̌ manga sol᷊o su ral᷊aedu sol᷊o wọu wul᷊aeng sahị tadeạu tiniạbe rụděllị su ral᷊ungu Tentam MAWU e.

⁵ Pangal᷊ạko tapoěng kal᷊ěnggihange mapul᷊o dua su kilone kụ koạko borotẹ̌ mal᷊iwatu mapul᷊o dua su waụ e, sěmbaụ-sěmbaụ tapoěng pẹ̌sěngkilo.

⁶Lěnsungko borotẹ̌ ene kụ koạko ruang kamonaěng, kụ pẹ̌sěngkamonaěng e koạko pẹ̌taha ěnnung u waụ, su wowom meda niěmboěngu wul᷊aeng sahị su ral᷊ungu Tentam MAWU.

⁷Pěměllọkong kamania sahị su wowong kamonaěngu borotẹ̌ nipẹ̌dal᷊ěnsung tatialạeng borotẹ̌ ene e kai sasěmba kẹ̌kanengang baugu MAWU.

⁸Apang ěllong Sabatẹ̌ e harusẹ̌be piạ borotẹ̌ sẹ̌sadiaěng su ral᷊ungu Tentam MAWU e. Kai ene e kal᷊iandagu tau Israel sarang marěngụ-děngụ.

⁹ Borotẹ̌ ene e kai waugʼi Harun dingangu manga hitene. I sire kai harusẹ̌ měmpahungkaěng ene e su tampạ susi, batụu borotẹ̌ ene e kai nakoạ sasěmba kẹ̌kanengang kụ kasusine tawẹ sihinge isẹ̌sěmba su MAWU waugu manga imang.

¹⁰Su pẹ̌darasengang u tau Israelẹ̌ e piạko tau Israel esẹ sěngkatau. I amang e tau Misirẹ̌, arawe i ninange ute tau Israel kụ isẹ̌sẹ̌bạ si Selomit, anạ i Dibri bọu hěntom balagʼi Dan. Piạ su sahěllo tau ene mědẹ̌darendehʼu sěngkatau wọu Israel su pẹ̌darasengang. Kapẹ̌dẹ̌darendehe, i sie nangane Mawu Ruata. Ual᷊ingu ene tau Israel nanondan sie niapẹ̌těngon Musa e,

¹²kụ něngampang si sie apidu kạpangampal᷊e putusang u MAWU e mạanụeweng měnsang apạ e koateng i sire waugʼi sie.

¹³MAWU e něhengetang si Musa,

¹⁴”Ěntudẹ̌ko tau ene sol᷊ong likudu pẹ̌darasengang. Apạeweʼn taumata kụ sen dimaringihẹ̌ si sie kụ kai měngane e, harusẹ̌be měněllidu l᷊imane su wowon těmbọu tau ene mědeạu makasahidi u i sie nẹ̌sal᷊a. Mase kal᷊awọu umatẹ̌ e harusẹ̌ mamahangu watu si sie sarangkewe mate.

¹⁵Bọu ini e wohangko su tau Israel: I sain mangane Mawu Ruata e harusẹ̌ měnal᷊udẹ̌ aị e

¹⁶ringangu ihukungu hukumang papate. Balạewe měnsang i sai kụ měngane MAWU e harusẹ̌ bahungang u watu sarang pakapate kahiang kěbị dal᷊ohong jamaatẹ̌ e. Tita ene kẹ̌koateng baugu tau Israel arau lai waugu taumata raghị kụ seng nangindunụ nẹ̌tanạ su Israel.

¹⁷ I saing mamate taumata wal᷊ine harusẹ̌be ihukungu papate.

¹⁸I saing mamate binatang u taumata wal᷊ine, harusẹ̌be měngaweng. Bal᷊ane ute kai ’niawa laawenge niawa’.

¹⁹Kereu pẹ̌sěngkatau e makakal᷊esẹ taumata wal᷊ine ute walạewe měnsang apa nikoạ e, mal᷊aing harusẹ̌ mariadi si sie.

²⁰ Kereu i sie makapědi ruhi, tangú ruhine lai sarung pědiang. Kereu i sie makawuta matan taumata wal᷊ine sěmběka e, tangú matane lai sěmběka e sarung lai ipakawuta. Kereu i sie měngoka taumata wal᷊ine sarang isine mapědi, tangú isine mal᷊aing sarung pědiang. Balạewe měnsang apa koateng e sarung badangu taumata wal᷊ine e piạ gainge, ute harusẹ̌ lai koateng bawal᷊ise si sie.

²¹I saing mamate binatang ute harusẹ̌be mangaweng, arawe i saing mamate taumata ute harusẹ̌ ihukungu hukumang papate.

²² Hukumang ene tangu mihino si kamene kěbị dingangu lai waugu taumata raghị kụ nẹ̌tumanạ sutal᷊oarang kamene, u Iạ e MAWU Ruatanu.”

²³Samuring Musa e něhabaru wawera ene su tau Israel, i sire němaringang u tau něngane Mawu e sol᷊ong likudu pẹ̌darasengang, bọu ene němereng u watu si sie sarang nate. Ual᷊ingu kakoạ kerene ute tau Israel němpẹ̌koạewe seng niorom MAWU e si Musa