Read Sangir MANGA IMANG 25 Bible Online

MANGA IMANG 25 - Sangir bible

MANGA IMANG 25

¹ Dasị su wowom Bul᷊udu Sinai e MAWU nẹ̌bisara si Musa ringangu nangoro si sie,

²piněhabaru manga tita ini su tau Israel. Kereu i kamene sumuẹ̌ su soa kụ sarung ionggọ u MAWU e si kamene tangú i kamene harusẹ̌be pěngadatẹ̌ MAWU kụ dal᷊enge kere ini: Apạewen taung kapitune i kamene tawe wotonge měhal᷊ẹ̌ ěntana arau mahěnsinuang.

³Karěngụ u ěnnungu taung i kamene harusẹ̌ měmpẹ̌suang su rahaming kamene, měmpěmosọ baelʼu anggorʼi kamene ringangu měmpangomol᷊ẹ̌ kal᷊awọu ghẹ̌sing ěntanang kamene.

⁴Arawe apan taung kapitune kai nipakatuntụ baugu MAWU. Kụ kanandụeweng taung ene tangu ěntana ene harusẹ̌ iwala kerene kụ tawe wotonge hal᷊ěkang. Kumbahang mẹ̌suang manga rahami arau měmpěmoso manga waelu anggorʼi kamene.

⁵Sarangkewe lai gandung kụ timuwo sẹ̌sane arau anggorẹ̌ wọu kalung anggorʼi kamene kụ tawe niposọ e, tawe wotonge tampungang i kamene mase resokang, batụu taung ini e kai taungu pěngangirul᷊eěng baugu ěntana.

⁶Maningbe kerene, ěntana ene sarungbe lai měngonggọu ghẹ̌sine kụ makoạ pẹ̌bawiahʼi kamene, manga ěllang i kamene, taumatang kamene sẹ̌sewaěng, dingangu apạewen tau raghị kụ mạtanạ dingang i kamene.

⁷Kerene lai manga binatang lahikinang i kamene ringangu manga binatang dul᷊u su wanuang kamene. Kal᷊awọu ghẹ̌sing ěntana ene e wotonge kanengang i kamene.

⁸Dekengko pitu sul᷊e pẹ̌tahạpitu su taunge, kal᷊awọe ěpạ u pul᷊o sio su taunge.

⁹Mase su tanggalẹ̌ kapul᷊one su wul᷊ang kapitune, kụ kai su ěllong kal᷊aampungu rosa e, pěngoroko taumata apěniụ napiri suapan tampạ su kěbị soa.

¹⁰I kamene harusẹ̌ paněntaning taung kal᷊imam pul᷊one ene, kụ pěhabaru karal᷊iwirẹ̌ su kakěpal᷊eweng kawanua. Su ral᷊ungu taung ene kal᷊awọu arětạ tataghuanengu apan seng niwal᷊ụ harusẹ̌be isul᷊e su taghuange humotong arau su manga hitene. I saing niwal᷊ụ kere ěllang e harusẹ̌ isul᷊e kapia su manga anạ u sěmbaụ e.

¹¹Kumbahang mẹ̌suang manga rahaminu e. Gandung kụ timuwo hala e arau wuang anggorẹ̌ su waelu anggoru e kụ tawe nipẹ̌posọ e tawe wotonge komol᷊ang i kamene kụ desokang.

¹²Taung ini e kai nakoạ kere taung susi waugʼi kamene. I kamene tumbạeng botonge kumaěng apạeweng němpahuntuwo hala e su rahaming kamene.

¹³Su ral᷊ungu taung ene kal᷊awọu ěntana kụ seng niwal᷊ụ harusẹ̌ isul᷊e kapia su taghuange humotong.

¹⁴Kụ kereu i kamene mẹ̌bal᷊ụ u ěntana su sěndinganeng i kamene tau Israel, arau měměllị ěntana wọʼi sie, kumbahangbe mẹ̌koạ pẹ̌bawawal᷊ụ dingangu pẹ̌bawawělli su tawẹ katul᷊ide.

¹⁵Arěngang ěntana ene harusẹ̌be pakasahẹ tuhụ kal᷊awọu taung karěngụu ěntana ene makạonggọu ual᷊ine sarang Taung Pěnanul᷊e tuhụ e.

¹⁶Kereu kal᷊awọu taunge něngalembo, tangu arěngang ěntana e mal᷊ěgadẹ̌. Arawe kamagengu kal᷊awọu taunge kawe mahal᷊i, arěgane harusẹ̌ masanạ batụu niwal᷊ụ e kai kal᷊awọu nipěnsạ.

¹⁷Kumbahangbe měngakal᷊ẹ̌ sěndinganengu tau Israel, kai i kamene kěngkatakụbeng MAWU Ruatang kamene e.

¹⁸Tuhuke wue kal᷊awọu tita ringangu parentan MAWU, tadeạu i kamene mẹ̌biahẹ̌be matul᷊ende su wanua ene.

¹⁹Ěntanam banua ene kai sarung měngonggọ u ghẹ̌sine sarang i kamene makahombang kaěng ipědẹ̌dal᷊embo ringangu matanạ sene su karal᷊unsemahẹ̌.

²⁰Kai aramanung piạ u makiwal᷊o kai apạe sarung kanengang karěngụ u pitu taung su tempong ěntana tawe nịsuangeng dingangu ghẹ̌sine tawe nipurụ.

²¹Su ral᷊ungu taung kaěnnunge MAWU sarung měngal᷊amatẹ̌ ěntana hakịeweng gẹ̌sine e wotonge wue waugu těllu taung karěngụ e.

²²Ringangu su tempong i kamene měsẹ̌suang dahaming kamene su taung kaual᷊une, gěsin taung kaěnnunge wědangbeng piạ baugu kanengang i kamene. Sarangkewe sasadiang kaěng i kamene sarung mědẹ̌dal᷊embo sarang tempong pangangomol᷊u ghẹ̌sing taung ene.

²³Ěntanang kamene e tawe wotonge wal᷊ukang turusẹ̌, batụu ěntana ene e wal᷊inewe tataghuaneng i kamene, kaiso kawe tataghuanengu Mawu Ruata. I kamene tumbạeng kere tau raghị nakareạ laoro wotonge mẹ̌pakẹ u ěntana ene.

²⁴Kereu ěntana sěmpotọ iwal᷊ụ harusẹ̌be su kasingkạ u taghuange humotong baugu mẹnubusẹ̌ ěntana ene.

²⁵Kereu sěngkatau taumatang Israel manawo masusa hakịeweng i sie masihasa mẹ̌bal᷊ụ u ěntanane, ute manga anạ u sěmbaụ e karẹ̌duhange hinone manubusẹ̌ ěntana ene.

²⁶Kereu tawẹ apa taumata waugu manubusẹ̌ e kaiso taghuange ene e su samurine kawe makaumal᷊ẹ̌ kụ kawe lawọ doite waugu ipanubusẹ̌ ěntanane,

²⁷tangú i sie harusẹ̌ měmaehẹ̌ su taumata kụ němělli ěntanane kal᷊awọeweng arěngang gẹ̌sing ěntana ene karěngụeweng taung měbẹ̌bawěllasẹ̌ e sarang kawe Taung u Pěnanul᷊e e marěnta. Ual᷊ingu kerene tangu i sie nakahombang kapia ěntana tataghuanenge.

²⁸Kai kereu i sie tawe makatohạ manubusẹ̌ ěntanane, ute tau namělli e těbewe kawasa su ěntana ene sarang Taungu Pěnanul᷊e tuhụ e. Su ral᷊ungu taung ene e, ěntana ene harusẹ̌ isul᷊e kapia su taghuange humotong.

²⁹Kereu pẹ̌sěngkatau e mẹ̌bal᷊ụ wal᷊e sěmbaụ su ral᷊ungu soa kụ nal᷊ikụ u meselẹ̌, ute i sie kawasa manubusẹ̌ bal᷊ene karěngụ u sěntaung nirekeng bọu tanggalu pẹ̌bawal᷊ụ.

³⁰Kai kamagengu wal᷊e ene e tawe nitubuse su ral᷊ungu sěntaung ute ailang hakẹ̌ e waugu manubusẹ̌ e. Bal᷊e ene tangu těbewe arětạ u tau namělli ringangkeweng hěntone. Su ral᷊ungu Taungu Pěnanul᷊e, wal᷊e ene e tawe nisul᷊e.

³¹Baugu wal᷊e su soa rarodọ kụ tawe nilikutangu maselẹ̌ e měpakẹ u pělatorang mẹ̌sul᷊ung kerẹewe waugu ěntana: taghuange humotonge piạ hakẹ̌ e manubusẹ̌ e ringangu wal᷊e ene e harusẹ̌ isul᷊e su ral᷊ungu Taungu Pěnanul᷊e.

³²Arawe tau Lewi e piạ hakẹ̌ e baewe tempo sude manubusẹ̌ arětạ tataghuaneng i sire suapan soa gaghuwạ kụ seng nịtatantu waugʼi sire.

³³Kereu sěngkatau taumatan Lewi mẹ̌bal᷊un wal᷊ene su soa sěmbaụ bọu tal᷊oaran soa ghẹ̌guwạ ene e kụ i sie tawe manubusẹ̌ e tangu bal᷊e ene harusẹ̌be isul᷊e si sie su Taungu Pěnanul᷊e. Batụu wal᷊en tau Lewi suapang soan sire e ute kai tataghuaneng i sire apang kụ seng tatapẹ̌ sutal᷊oaran tau Israel.

³⁴Arawe wimbaengu rěmpugẹ̌ nangělikụ manga soan tau Lewi e tawe wotonge iwal᷊ụ. U ene kai rarotong u tau Lewi waugu sarang marěngụ-děngụ.

³⁵ Kereu taumata lawọ kawanua sěmbaụ dingang i kamene kụ mạtanạ sutal᷊oarang kamene kụ nanawo kasiang dingangu tawe makatal᷊ung pẹ̌bawiahe, tangu i kamene harusẹ̌ manongka si sie kere sěngkatau taumata raghị arau sumasongo sene, tadeạu i sie makapẹ̌biahẹ̌ turusẹ̌ sutal᷊oarang kamene.

³⁶ Kumbahang i kamene měnuntụ rentene wọu apang nipakiědang i kamene si sie, kai kěngkatakụbe su Mawu Ruatang kamene, dingangu balạ e kere tau ene apẹ̌biahẹ̌ sutal᷊oarang kamene. Abe lai pěngal᷊ạ untune wọu kaěng kụ niwal᷊ụ i kamene e si sie.

³⁷

³⁸Ene e kai parentang MAWU Ruatanu kụ seng naněbang i kamene wọu Misirẹ̌ kụ nẹ̌gěllịu ěntanang Kanaan si kamene, tadeạu i Sie makoạ Duatang kamene.

³⁹ Kereu taumata kawanua sěmbaụ dingang i kamene e kụ mẹ̌tanạ sutal᷊oarang kamene e kụ kai manawo kasiang hakịu i sie mẹ̌bal᷊ụ u watangenge makoạ ěllang i kamene, ute tau ene tawe wotonge irolohʼi kamene pẹ̌koạ hal᷊ẹ̌ u sěngkatau ěllang.

⁴⁰I sie harusẹ̌ pẹ̌tanạ dingang i kamene kere sěngkatau taumatan sewa ringangu nakoạ mělahal᷊ẹ̌ u sarang Taungu Pěnanul᷊e.

⁴¹Su tempo ene i sie ringangu manga anạ e wotonge měněntang u wal᷊eng kamene kụ mẹ̌sul᷊e sol᷊ong anung manga anạ u sěngkataune ringangu sol᷊ong ěntanang upung-gaghurange.

⁴²Tau Israel ute kai manga ěllang u MAWU, u kai i Sie naněbang i sire wọu Misirẹ̌, kụ ual᷊ingu ene i sire tawe wotonge wal᷊ukang kere ěllang.

⁴³Kụ tau Israel nẹ̌bal᷊ụ u watangenge si kamene tangu tawe wotonge tingkaitang i kamene. I kamene kěngkatakụben Duatang kamene.

⁴⁴Kereu i kamene mẹ̌gausẹ̌ ěllang, i kamene wotongewe měměllị wọu kawanuang bansa wal᷊ine kụ mẹ̌tẹ̌tanạ su rěduhʼi kamene.

⁴⁵I kamene wotonge lai měmělli manga anạu tau raghị kụ nẹ̌banua sutal᷊oarang kamene. Manga anạu tau raghị kụ piněhanạ su wanuang kamene e wotonge makoạ tataghuanengu

⁴⁶dingangu wotonge lai iěking i kamene su manga anạ i kamene makoạ ěllang i sire karěngụ u wiahʼi sire. Arawe sěndinganengu lawọ tau Israel tawe wotonge koateng i kamene ringangu wuntal᷊ẹ̌.

⁴⁷Kereu sěngkatau raghị e mạtanạ sutal᷊oarang kamene e kawe nakalạ dingangu piạ sěndinganengu lawọ tau Israel nanawo kasiang kụ i sie mẹ̌bal᷊ụ u watangenge kere ěllang su tau raghị ene arau su manga anạ u sěngkataune,

⁴⁸tau Israelẹ̌ ene těbewe piạ dal᷊enge mědeạu itubusẹ̌. Sěngkatau wọu mahuanene,

⁴⁹arau i empone, arau anạ u tamahuari ringange arau taumata wal᷊ine wọu hapị e kasandigange, wotonge manubusẹ̌ si sie. Arau kamagengu i sie hala kụ bọu ene makaumal᷊ẹ̌, i sie wotonge měnubusẹ̌ batangenge hala.

⁵⁰Ěllang ene e harusẹ̌ mẹ̌sasinggata ringangu taumata namělli si sie. I sire harusẹ̌ měndekeng kal᷊awọu taung nanětạ bọu watangenge niwal᷊ụ kere ěllang sarang Taungu Pěnanul᷊e tuhụ e, mase mamoěng u arěgang tatubuse. Arěga ene harusẹ̌ ipoěng tuhụ dekenang u ghaji nionggọ su taumatan sewa.

⁵¹Ěllang ene harusẹ̌ měnul᷊eng arěngang bawělli watangenge kasěllaheweng kal᷊awọu ghajing sěngkatau sẹ̌sawaěng karěngụewen taung apan tawe nịdal᷊engange,

⁵²

⁵³tabidạu i sie seng bọu němunara kere sěngkatau wẹ̌baehang gajine apan taung. Mawune tawe wotonge miěbạ i sie ringangu wuntal᷊ẹ̌.

⁵⁴Kereu i sie tawe ikatubusu sěmbaụ bọu manga ral᷊enge tamai ene, i sie ringangu manga anạ e harusẹ̌ ipakal᷊iwirẹ̌ su Taungu Pěnanul᷊e tuhụ e.

⁵⁵Sěngkatau tau Israel tawe wotonge makoạ ěllang kanandun pẹ̌bawihaẹ̌, ual᷊ingu tau Israelẹ̌ e kai manga ěllangu MAWU. Seng MAWU e naněbang i sire wọu Misirẹ̌ e. Kụ kai i Sie MAWU Ruatan sire e.