Read Sangir MANGA IMANG 26 Bible Online

MANGA IMANG 26 - Sangir bible

MANGA IMANG 26

¹ MAWU e něhengetang, ”Kumbahang mẹ̌koạ pakal᷊uang arau mapararisị u patong arau rihi watu nilěnggihang baugu paněmbaěng. Iạ e kai MAWU Ruatanu.

²Bantugeko kal᷊awọu ěllong Sabatẹ̌ dingangu manga pamamantugu ěllo masěllahẹ̌ bọu agama ewe lai wal᷊ine e ringangu adate wue tampạ kụ seng nihae waugu paněmbaěng si Siạ. Iạ e kai MAWU.

³ Kereu i kamene měbẹ̌biahẹ̌be tụtuhụ manga tita-Ku ringangu měkẹ̌koạbe apan Takụ i lẹ̌oro,

⁴Iạ tangu sarung maparasehẹ̌ su tempone, mědeạu ěntana e mẹ̌gěllịbeng hasile ringangu manga kakaluang e měmpẹ̌bua wue.

⁵Gěsing ěntanang kamene e sarungbe ipẹ̌dal᷊embo, hakịu mạengbeng semben tempone waugu manipo wuang anggorẹ̌ e, i kamene wẹ̌dambeng mangambesẹ̌ gandung. Dingangu mạengbeng seng nidating tempone waugu měměnsạ buang gandung, i kamene wědambeng měmpanipo wuang anggorẹ̌ e. I kamene sarung makahombang kaěng matimu kụ měmpẹ̌biahẹ̌be mal᷊unsemahẹ̌ su wanuang kamene.

⁶Iạ e sarung mělukadẹ̌ karal᷊enehu wanuang kamene sarang i kamene wotonge makapẹ̌tikị mapia ringangu tawẹ takụ e si sai-sai. Manga binatang dul᷊u e sarung Takụ ipakaupu wọu wanua ene, kụ semben tawẹ apa pẹ̌sasekẹ su wanuang kamene.

⁷I kamene sarungbe makaumal᷊ẹ̌ mamatạ manga sekẹ i kamene

⁸maning i kamene limang katau kaiso i kamene makawatạ mahasụ su kataune, mase ringangu mahasụ su kataune, i kamene makatohạ mamatạ mapul᷊o hiwu su kataune.

⁹Iạ sarung měngal᷊amatẹ̌ si kamene kụ měngonggọu anạ dingangu pulung i kamene mal᷊awọ. Apan sem bọu Takụ nikědo si kamene e, man Takụ ipakasěhụ.

¹⁰Gẹ̌sing ěntanang kamene sarung ipẹ̌dal᷊embo, sarang makakasukụ baugu sěntaung. Sarang lai i kamene masihasa maněmbang lěmbem pěnsạ kal᷊imona e tadeạu piạbe loahe pěndesokang u pěnsạ buhu e.

¹¹Iạ sarung mẹ̌tanạ sutal᷊oarang kamene su ral᷊ungu Tenta-Ku, kụ sarung tawe měnuhudʼi kamene.

¹² Iạ e sarung maněntanudẹ̌ si kamene; Iạ e sarung makoạbe Ruatanu ringangu i kamene makoạ umatẹ̌-Ku.

¹³Iạ e kai MAWU Ruatang kamene, naněbang i kamene wọu Misirẹ̌ e tadeạu i kamene seng tawe lai makoạ ěllang. Kawasa kụ nạung mạngěpisẹ̌ si kamene sen Takụ nipědi kụ i kamene Takụ koateng taumatang karal᷊iwirẹ̌ e.”

¹⁴ MAWU e něhengetang, ”Kereu i kamene tawe rumaringihẹ̌ si Siạ, dingangu tawe mẹ̌koạ apan Takụ ilẹ̌oro,

¹⁵kụ kamagengu i kamene lumampa pẹ̌kakědo Takụ nikoạ dingang i kamene kụ tawe mapulu tumuhụ kal᷊awọu tiaha-Ku ringangu manga tita-Ku,

¹⁶i kamene sarung Takụ ihukung. Iạ e sarung maparěntang hombang si kamene, sakị dingangu lěhabẹ̌ kụ tawe maul᷊e, hakịu matang kamene mawuta, kụ i kamene mẹ̌biahẹ̌ tụtal᷊iahu. I kamene sarung mahěnsinuang, kaiso tawe makal᷊ewa hasile, watụ u manga sekẹ e sarung duměnta kụ mamatạ si kamene ringangu mapakaupung apan nisuang i kamene.

¹⁷I kamene Takụ sarung ihukung hakịu i kamene ikawatạ u manga sekẹ i kamene ringangu pẹ̌kawasaěngu taumata apang měmpẹ̌binsị i kamene. I kamene sarung su katatakutang tạ sihinge hakịu měmpahuntal᷊ang, maningbe tawẹ u měnanahusu.

¹⁸Kereu seng nakahombang kěbị hukumang ene e kụ i kamene wědang lai tawe tumuhụ si Siạ, ute hukumang u e sarung Takụ tambaěng pitu sul᷊e kawěhạ e.

¹⁹I kamene kai mahěmpal᷊iung obote, kai Iạ e sarung mapakaěnsung kamene. Tahiti e tawe iparasehẹ̌ hakịu ěntanang kamene e mamara kụ makětị kere uase.

²⁰Kal᷊awọu wuan saghedu e tawẹ kěhase, batụu ěntanang kamene e tawe mẹ̌gěllịu lětạ e ringangu apan sasuang i kamene e tawe mẹ̌bua.

²¹Kereu i kamene wědang lai turusẹ̌ dumokạ Siạ, dingangu tawe tumuhụ si Siạ, ute hukumang i kamene e ipakatamba lai pitu sul᷊e mawalung.

²²Iạ e sarung maparěntang manga binatang bahani e su tal᷊oarang kamene. Kal᷊awọu binatang ene sarung měněmbo manga anạ i kamene, měmate binatang i kamene piara ringangu měngěnsue si kamene, hakịu i kamene e makoạ mahal᷊i-hal᷊i, ringangu patikụ dal᷊eng su wanuang kamene e měhio.

²³Kamagengu seng makahombang kěbị hukumang ene e kụ i kamene bědang lai tawe rumaringihẹ̌ si Siạ e, kaiso mang bědang turusẹ̌ dumokạ Siạ,

²⁴tangu Iạ sarung měmahang si kamene ringangu měhukung i kamene pitu sul᷊e limembong kawěhạ e lai wọu hukumang nạung seng tamai něngkal᷊iu.

²⁵Iạ e sarung mapal᷊ětong pẹ̌sasekẹ su tal᷊oarang kamene i pěhukung si kamene u i kamene seng limampa riandi-Ku ringang i kamene. Dingangu kereu i kamene mẹ̌tampung su soang kamene mẹ̌deạu mal᷊indung, Iạ sarung maparěntan sakị kụ tawe maul᷊e, kụ i kamene katewe mẹ̌samal᷊ẹ su rokạ i kamene.

²⁶I kamene sarung kasueěngu kaěng, hakịu manga wawine mapul᷊ong katau e tumbạeng mẹ̌gausẹ̌ tampạ pẹ̌tatongkateng borotẹ̌ sěmbaụ samatang baugu pẹ̌tongkateng borotẹ̌ kụ ene si sire. Kaěng ene koateng ransung, kụ bọuteng kanengang i kamene e, kai i kamene mang bědang makapěndang lunusẹ̌.

²⁷Kamagengu seng bọu nakapěndang kěbị hukumang ene kụ i kamene měngkai wědang lai turusẹ̌ dumokạ si Siạ dingangu mạdiri rumaringihẹ̌ si Siạ,

²⁸tangu dingangu ral᷊angehẹ̌ Iạ e sarung měněntiro si kamene, kụ měhukung i kamene pitu sul᷊e limembong kawěha e wọu nạung-nạung.

²⁹I kamene sarung kal᷊unusang, hakịu mahungkinạ manga anạ i kamene hala.

³⁰Iạ e sarung mapakagholangu kal᷊awọu tampạ u pẹ̌kakal᷊iomaneng i kamene su wowong manga wěntihe, mapakal᷊enggeng manga tampạ pananěmbaěng pěnanutungang buwụ, dingangu měnděmmẹu manga maieti kamene su wowong manga pakal᷊uang i kamene kụ seng nal᷊engge ene. Piạ e temangu itahamutang

³¹manga soang kamene e Takụ bal᷊uiang makoạ kate manga ěnạ e u kal᷊awọu tampạ u pẹ̌kakal᷊iomanengang i kamene e Takụ gagholokang dingangu kal᷊awọu manga sasěmbang kamene e tawe Takụ tarimakeng.

³²Banuanu e Takụ ipakawinasa marihutu, hakịu manga rokạ apang makakaiang sene himěkosẹ̌ makasilo kahuagatu kaghagholọ ene.

³³Iạ e sarung mapalětom pẹ̌sasekẹ su wanuang kamene ringangu mapẹ̌kaliaesi kamene su apam banua raghị. Kal᷊awọu rahaming kamene e sarung lawoehang, dingangu manga soang kamene e i pakawala makoạ kate enạ e.

³⁴Su tempo ene těntal᷊ang i kamene su ral᷊ungu pěmamembangeng su wanuang manga rokạ i kamene e, ěntanang kamene nạung tawe niwalang kamene pinangirul᷊e su tempong i kamene mạtanạ sene, kụ tawe naurusẹ̌ dingangu piạ lěsabu nairul᷊e.

³⁵

³⁶Kal᷊awọu taumatang kamene kụ ene su ral᷊ungu pěmamembangeng su wanua wal᷊ine, Takụ sarung pakatakụ marasai, hakịu sarang tingihu manga raukalu tiukangu anging e seng makakatal᷊ang si sire. I kamene sarung mahuntal᷊ang tabidạu sẹ̌sahusuang su ral᷊ungu pẹ̌sasekẹ, mase nanawo manilaing tawẹ sědụ surěduhu.

³⁷I kamene sarung tumal᷊ang kụ masangkong sěngkatau su wal᷊ine, manimbe lai tawe tau měnanahusune. Kụ i kamene tawe makaumal᷊ẹ̌ dumokạ manga sědụ i kamene.

³⁸I kamene sarung mate su ral᷊ungu pěmamembangeng, binasaěngu wanuang manga sědụ i kamene.

³⁹Sěmbahageang kạdodọ bọʼi kamene kụ deng bědang biahẹ̌ su wanuan sědụ i kamene e sarung tumal᷊iahu kahian dosang kamene hala, ringangu rosang manga i upung i kamene.

⁴⁰Kaiso hěntonu e sarung měngaku rosan sire ringangu rosang manga i upung i sire e kụ seng němpaněntangu Iạ dingangu němpěnggohaeng su těngo-Ku,

⁴¹hakịu Iạ kimanoạ kụ dimokạ si sire ringangu něnguserẹ̌ si sire sarang dal᷊ungu pěmamembangeng su wanuang manga sědụ i sire. Pěngěnsueěnge, kamagengu hitenu e seng kimokobẹ̌ dingangu seng nahukung ual᷊ingu rosa ringangu ral᷊awang i sire,

⁴² Iạ e sarung mẹ̌tahěndung diandi-Ku e si Yakub, Ishak dingang i Abraham. Iạ e sarung manal᷊ěmbuhu riandi-Ku waugu mẹ̌gěllị u ěntana ene su apam bansa-Ku.

⁴³Kai arawe ěntana ene e harusẹ̌be apakakoạ tạ taumatane, tadeạu kahěnga-hěngangbe ipạngirul᷊e. Dingangu umatẹ̌-Ku e harusẹ̌be pěndal᷊engu kal᷊awọu hukumang kụ Takụ ipakaěnsạ si sire ual᷊ingu madiri tumuhụ kal᷊awọu manga tiaha ringangu manga tita-Ku.

⁴⁴Kaiso těntal᷊ang i sire wědangbe ene su wanuang manga sědụe, i sire e tawe Takụ i těntang dingangu winasaěng-Ku e marihutu. U kamagengu i sire e Takụ ipakawinasa, ute mangal᷊ene Iạ e neměsụ diandi-Ku ringang i sire, sumbal᷊iau Iạ ini e kawe MAWU, Ruatan sire.

⁴⁵Iạ e sarung manal᷊embuhu pẹ̌dariandi kụ Takụ nikoạ dingangu manga i upung i sire, piạ e nạung Iạ nělahẹ u kawasa-Ku e suapaʼm bansa kụ napasěbangu umatẹ̌-Ku e wọu Misirẹ̌, tadeạu Iạ MAWU e, makoạ Duatan sire.”

⁴⁶Kai ene e manga tita ringangu kal᷊awọu laoro nạung nionggọu MAWU e su Wul᷊udu Sinai si Musa waugu tau Israel.