Read Sangir MANGA IMANG 3 Bible Online

MANGA IMANG 3 - Sangir bible

MANGA IMANG 3

¹Kereu pẹ̌sěngkatau e mẹ̌gěllịu sasěmba sapi sěmbaụ baugu sasěmbam pẹ̌darame, ute sapi e wotonge esẹ, dingangu wotonge wawine, asal᷊u tawẹ turạ e.

²Taumata mẹ̌gěllịu sasěmba e harusẹ̌ měměllọu l᷊imane su wowom těmbọu binatang ene, mase měmotọ su těngon tukadu tentam MAWU e. Manga imang hiteng Harun harusẹ̌ maněbohu rahan sapi e su sěndihang e ěpạ bọu pananěmbaěng ene.

³Baugu sasěmbang pẹ̌darame su MAWU e, imang harusẹ̌ manarakangu tamai ini e wọu wal᷊unang u binatang ene e; tawane kụ namikung lohon tiang e,

⁴pěleine ringangu tawane ringangu wahageangu atene kapaelange.

⁵Kěbị e sěngkahakị dingangu sasěmba tinongkạ bal᷊ine kụ hinong tongkateng su wowong pananěmbaěng. Dal᷊urung laidopẹ̌ ene makal᷊ahimpulu naung u MAWU.

⁶Kereu isẹ̌sěmba waugu sasěmbam pẹ̌darame e kawe domba sěmbaụ arau kambing sěmbaụ, tangu binatang ene e wotongewe esẹ, botonge wawine, kaiso tawe wotonge piạ turạ e.

⁷Kereu pẹ̌sěngkatau mẹ̌gěllịu sasěmba domba sěmbaụ, i sie harusẹ̌ menonda sol᷊ong Tentam MAWU.

⁸Sene i sie harusẹ̌ měměllọu l᷊imane su wowon těmbọu domba ene, wọu ene měmotọ su těngon Tenta. Mase imang harusẹ̌ měněbohu rahan domba ene su sěndihang e ěpạ bọu pananěmbaěng ene.

⁹Baugu sasěmbam pẹ̌darame e su MAWU, imang harusẹ̌ mẹ̌gellịu manga kodọ e tamai ini wọu domba ene; tawane, kanandụewen tol᷊ene kụ piạ tawane, kụ potọ maraning duhing hunaenge, tawane kụ namikung lohon tiange,

¹⁰buang kal᷊uwaenge ringangu tawane ringangu kapaelangu atene.

¹¹Imang mẹ̌tatangkiange harusẹ̌ měnongkạ kěbị tamai ene su wowom pananěmbaěnge waugu sasěmba laidopẹ̌ baugu MAWU e.

¹²Kereu isẹ̌sěmba e kawe kambing sěmbaụ, ute i saing nẹ̌gěllịu sasěmba ene harusẹ̌ měnonda ene su Tentam MAWU e.

¹³Sene i sie harusẹ̌ měměllọu l᷊imane su wowon těmbọu kambing ene, mase měmotọ su těngon Tenta. Imang harusẹ̌ měněbohu raham binatang ene su sěndihang e ěpạ bọu pananěmbaěnge.

¹⁴Su hal᷊ẹ̌ u sasěmba laidopẹ̌ baugu MAWU e imang harusẹ̌ mẹ̌gěllịu sasěmba wọu apang kodọ u kambing tamai ini: tawane namikung lohon tiange,

¹⁵buang kal᷊uwaenge ringangu tawane, ringangu atene kapaelange.

¹⁶Imang mẹ̌tatangkiange harusẹ̌ mẹ̌tongkạ u kěbị tamai ene su wowom pananěmbaěng. Dal᷊urung sasěmba kẹ̌kanengang ene e mẹ̌tẹ̌tal᷊ahino su naungu MAWU. Kal᷊awọu tawang binatang ene e kai waugu MAWU.

¹⁷Tau Israelẹ̌ e mambeng kumbahang kuminạ tawane arau raha. Tiaha ene tẹ̌tuhukang sarang marěngụ-děngụ dingangu harusẹ̌ pakitol᷊ei su kěbị Israel balạewe měnsang i sie mẹ̌tẹ̌tanạ suapa.