Read Sangir MANGA IMANG 5 Bible Online

MANGA IMANG 5 - Sangir bible

MANGA IMANG 5

¹Sasěmbang kal᷊aampungu rosa e hinong isarakang: Kereu pẹ̌sěngkatau e tumuhụ dal᷊engu munara e gẹ̌gausang apěgẹ̌gěllịu sasahidi su pěnggaghutaěng kaiso kawe makaonggọ u tatahutěngadu apa nikasilone ringangu kinaringihe, hakịu sie hinong měnal᷊udẹ̌ aị e.

²Kereu pẹ̌sěngkatau e nẹ̌sal᷊a ual᷊ingu pinẹ̌tatudẹ nakoạ dal᷊akisẹ̌ e, batụu kai seng nakasenggehẹ̌ sěmbaụ barang dal᷊akisẹ̌, kere manga kasuangu binatang, mase wọu ene kawe nakapěndangbe kakanoạ e.

³Kereu pẹ̌sěngkatau e nẹ̌sal᷊a wal᷊inewe ual᷊ingu pinẹ̌tatudẹ něnenggehẹ̌ barang dal᷊akisẹ̌ asal᷊e wọu anun taumata e kụ bọu ene nakapěndang bue kakanoạ e.

⁴Kereu pẹ̌sěngkatau e nẹ̌sal᷊a ual᷊ingu pẹ̌sasalune asal᷊e mědeạu walạewe měnsang mẹ̌koạ apa, kụ bọu ene makahěngang bue kai apa nạung nikoạ e.

⁵Su ral᷊ungu kěbị tamai ene, i sain nẹ̌sal᷊a e harusẹ̌be mengaku pẹ̌sasal᷊ane.

⁶Kụ baugu tatubusẹ̌ dosane tangu, i sie harusẹ̌ měngěntudẹ̌ domba sěmbaụ arau kambing bawine waugu MAWU. Imang harusẹ̌ mẹ̌gěllịu sasěmba ene, tadeạu tau ene ampungang.

⁷Kai kamagengu taumata nẹ̌sal᷊a ene tawe makatohạ měndiahing domba arau kambing baugu ipěnubusẹ̌ dosane, i sie harusẹ̌ mẹ̌bawa manụ těkukurẹ̌ sěmparẹ̌, arau paluma kawuhuang, sěmbaụ baugu sasěmbang kal᷊aampung rosa, dingangu sěmbaụewe lai e waugu sasěmba tinongkạ.

⁸Manga manụ u kinoaěng ene e harusẹ̌ ěntudẹ̌ su anung imang. Imang e harusẹ̌be kạkal᷊imonaěnge mẹ̌gěllịu manụ u kinoaěng kụ seng nitilakehẹ̌ baugu sasěmbang kal᷊aampungu rosa. Lehẹ u manụ ene e harusẹ̌be ruru, kai kumbahangbe sarang mahěnsị těmbọ e.

⁹Dahang manụ u kinoaěng ene e harusẹ̌ pěměsị suapang sěndihangu pananěmbaěng, mase lěmbene měngkate laburẹ̌ sul᷊ikudu pondasing pananěmbaěng e waugu sasěmbang kal᷊aampungu rosa e.

¹⁰Bọu ene imang e mẹ̌gěllịu manụ u kinoaěng karuane e waugu sasěmba tinongkạ, natuhụewe su titane. Kerene kakakoạ u manga imang měmpěnarakangu sasěmbang ampungu rosan tau ene kụ i sie ampungang u MAWU e.

¹¹Kereu taumata apang nẹ̌sal᷊a e tawe makatohạ měndiahing manụ těkukurẹ̌ duambaụ arau paluma waugu sasěmbang kal᷊aampungu rosa e, i sie harusẹ̌ mẹ̌bawa tapoěng sěngkilo. Tapoěng ene e tawe wotonge sěbohangu lanang zaitun arau laukangu kamania, batụu sasěmba ene e kai sasěmbang kal᷊aampungu rosa ringangu wal᷊inewe sasěmba simokol᷊ẹ̌.

¹²Tapoěng ene harusẹ̌be iwawa su anung imang. Imang e harusẹ̌be měngal᷊ạ sěhěngkung bọu tapoěng ene kere tatialang kěbị e sen nisarakang baugu MAWU e. Tapoěng sěhěngkung ene e harusẹ̌ tongkạ su wowom pananěmbaěng kere sasěmba simokol᷊ẹ̌. Kụ kai ene e sasěmba waugu kal᷊aampungu rosa e.

¹³Kerene kakakoạ u imang manarakang u sasěmba waugu rosan tau ene, tangu i sie sarung ampungang u MAWU. Tapoěng lěmbene e ute kai wahageangu imang, kerẹewe sasěmba gandung.

¹⁴MAWU e něngonggọu manga titanʼE ini si Musa.

¹⁵Kereu pẹ̌sěngkatau e wal᷊inewe ual᷊ingu pinětatudẹ nẹ̌koạ pẹ̌sasal᷊a ual᷊ingu kawe malaseng su hal᷊ẹ̌ u měngonggọu sasěmba kụ kere hinong ighẹllị baugu MAWU, tangu taumata ene harusẹ̌ mẹ̌bawa sasěmba laaweng dugi. Sasěmba ene ute kai domba sěmbaụ arau kambing esẹ tawẹ turạ e, kụ arěgang, tuhụewe arěga su ral᷊ungu Tentam MAWU.

¹⁶Tau ene harusẹ̌ měmaěhẹ̌ apang nạung ilẹ̌alene, timuěngkol᷊aing duam pul᷊ong kawahageaneng. Bọu ene i sie harusẹ̌ měnarakangu binatang ene su imang, kụ imang e měnarakang u sasěmba ene waugu rosan tau ene, tangu sie sarung ampungang u MAWU.

¹⁷Kereu pẹ̌sěngkatau e wal᷊inewe ringangu pinẹ̌tatudẹ limampa sěmbaụ bọu titam MAWU e, tau ene tangu nẹ̌sal᷊a harusẹ̌ měnal᷊udẹ̌ aị e.

¹⁸Baugu sasěmba laaweng dugi tangu i sie harusẹ̌ mẹ̌bawa domba sěmbaụ arau kambing esẹ kụ tawẹ turạ e ringangu arěgaěng tuhụ arěgang dal᷊ungu Tentam MAWU. Imang tangu měnarakangu sasěmba ene waugu rosan tau ene, tangu i sie sarumbe ampungang u MAWU.

¹⁹Kụ kai ene sasěmba laaweng dugi waugu pẹ̌sasal᷊a kinoạ su MAWU e.