Read Sangir MANGA IMANG 6 Bible Online

MANGA IMANG 6 - Sangir bible

MANGA IMANG 6

¹ MAWU e nangonggọu manga titanʼE ini e si Musa.

²Pẹ̌sěngkatau e harusẹ̌ mẹ̌gěllịu sasěmba kereu i sie nẹ̌sal᷊a su těngom MAWU, ual᷊ingu tawe mapulu měnul᷊eng apa-apa kụ nạung pinakiresọ si sie kahian sěndinganenge, arau měngakal᷊ẹ̌ taumata, mẹ̌tako apal᷊iwụ, arau seng nakaěbạ kapia apal᷊iwụ e nạung sen nailang, kutẹu kawe mẹ̌sẹ̌sunial᷊ẹ̌ apidu kapẹ̌sẹ̌salune.

⁴Tau nẹ̌sal᷊a ene harusẹ̌ saụ pěmaehẹ̌ kěbị apạeweng kinaẹ̌bakeng e su tawẹ katul᷊ide. Su tempong i sie kinatangkạ nẹ̌sal᷊a, i sie harusẹ̌ pěmaehẹ̌ tinalung su taghuange timuelaing sěngkaruampul᷊ong kawahageanenge.

⁶Baugu gaghěllị laaweng duging tau ene harusẹ̌be měnarakangu domba sěmbaụ arau kambing esẹ kụ tawẹ turạ e ringangu niarěgaewe tuhụ arěga su ral᷊ungu Tentam MAWU e.

⁷Imang e měnarakang sasěmba ene waugu rosan tau ene, tangu i sie sarungbe ampungang u MAWU.

⁸MAWU e něndolohʼi Musa

⁹niapěngonggọ si Harun dingangu manga anạ e kal᷊awọu tita ini mạanun sasěmba kụ tinongkạ kěbị. Imang tangú harusẹ̌ měměllọ u sasěmba tinongkạ su wowom pananěmbaěng dingangu iwala sene kanandụeweng hěbi e, ringangu putunge harusẹ̌be hanesẹ̌ dụděllị.

¹⁰Sarangke sasěmba ene nakoạ awu, tangú imang něluhẹeng sal᷊anane manimbụ dingangu kakingkaenge wọu hekạ leneng, harusẹ̌ měhengkẹ awu mal᷊ana ene wọu wowom pananěmbaěng mase ipěllọe su sěndihangu pananěmbaěng.

¹¹Mal᷊iu wọu ene tangú i sie harusẹ̌ měngaweng pakeange mase mẹ̌bawa awu ene sol᷊ong likudu tentam pẹ̌darasengang, sol᷊ong tampạ ewe nihae waugu ene.

¹²Apang kamal᷊ukadẹ̌ imang harusẹ̌ měměllọu kalum putung su wowom pananěmbaěng, měhundugẹ̌ sasěmba tinongkạ su wowone, kụ mẹ̌tongkạ tawang sasěmbaʼm pẹ̌darame. Putung su wowom pananěmbaěng e harusẹ̌ tẹ̌be rụděllị dingangu abe wala pakapate.

¹⁴Seng ini e kal᷊awọu atorangu sasěmba sẹ̌sadiaěng baugu MAWU e. Sasěmba ene harusẹ̌be iwawa sol᷊ong těngom pananěmbaěng kahiang sěngkatau wọu hiteng Harun.

¹⁵I sie harusẹ̌ měngal᷊ạ tapoěng al᷊usẹ̌ sěhěngkung dingangu l᷊ana, ringangkeweng kamaniane kěbị, mase itongkạ e su wowom pananěmbaěng kere tatiala u kal᷊awọu gaghěllị ene e nisẹ̌mba su MAWU. Dal᷊urung sasěmba ene tangu nakal᷊uasẹ̌ naungu MAWU.

¹⁶Tapoěng lěmbene tangú harusẹ̌ koateng borotẹ̌ tawẹ kabọ e kụ kanengang u manga imang su tampạ nihae, su rěllahu Tentam MAWU. Kụ seng ene e wahageangu manga imang kụ nionggọu MAWU si sire, wọu sasěmba kẹ̌kanengang. Kaěng ene e kai apạewe susi tawẹ sihinge, tabidạu sasěmbang kal᷊aampungu rosa ringangu sasěmba laaweng dugi.

¹⁸Baugu sarang marěngụ-děngụ apang manga esẹ hiteng Harun botonge wue kumaěng borotẹ̌ ene; kụ seng ene e wahageang i sire tatapẹ̌ e wọu kaěng nisěmba su MAWU. Taumata wal᷊ine kụ nanenggehẹ̌ kaěng kụ seng nisěmba e sarung makahombang silakạ ual᷊ingu katatoghasu kasasusinʼE.

¹⁹MAWU e nangonggọu kal᷊awọu titanʼE ini e si Musa,

²⁰mạanung hal᷊ẹ̌ u sasěmba su pěngangal᷊amatʼu sěngkatau imang kụ hiteng Harun. Su ěllọ e nạung i sie nial᷊amateng i sie harusẹ̌ mẹ̌gěllịu sasěmba tapoěng u gandung sěngkilo e su MAWU. Sěngkaruang kapahiakeng tangú harusẹ̌ isěmba su tempong mal᷊ukadẹ̌ arawe lěmbene tangu hědong sěngkawawěllone.

²¹Tapoěng ene harusẹ̌ sěbohangu lana mase tongkạ su wowon tatongkatenge, mase pẹ̌bawawẹ̌ka kụ sěmba kere sasěmba sẹ̌sadiaěng. Dal᷊urung sasěmba ene e mẹ̌mpẹ̌tal᷊ahino su naung u MAWU.

²²Baugu sarang marěngụ-děngụ apạeweng hiteng Harun kụ nạung nial᷊amateng nakoạ Imang Mawantugẹ̌ e harusẹ̌ měnarakangu sasěmba ene. Kěbị-kěbị e harusẹ̌ tongkạ baugu sasěmba su MAWU.

²³Apang sasěmba sẹ̌sadiaěng kụ isẹ̌sěmbang imang tangú harusẹ̌be tongkạ kěbị, kụ manilaing sarang kadodọ-dodọ e tawe wotonge kanengang.

²⁴MAWU e rimolohʼi Musa

²⁵apẹ̌gẹ̌gěllịu manga tita ini e si Harun dingangu manga anạ e mạanung hal᷊ẹ̌ u sasěmbang kal᷊aampungu rosa e. Binatang kụ baugu sasěmbang kal᷊aampungu rosa e harusẹ̌ potọ su tampạ u pěmamotokang binatang baugu sasěmba tinongkạ. Sasěmba ene apạ e susi tạ sihinge.

²⁶Imang kụ měgẹ̌gěllịu sasěmba ene, harusẹ̌ mangidopẹ̌ su tampạ e hala, kụ su rěllahu Tentam MAWU.

²⁷Balạe i sai arau balạewe měnsang apa kụ kahinoěngu ghẹ̌sim binatang ene e sarung makahombang silakạ kahiạeng toghasu kasusine. Kereu pakeang sěmbaụ e kahinoěngu měsị u raham binatang ene e harusẹ̌ unsạ su tampạ e hala.

²⁸Kuring ěntana pinělaghaěng gẹ̌sim binatang sasěmba ene tangú harusẹ̌be wẹ̌ka. Kereu nipakẹ e kawe kuring uada, ute kuring ene harusẹ̌be kěkisẹ̌ mase uhasʼu akẹ.

²⁹Apạeweng manga esẹ e su ral᷊ungu ghal᷊ipohong manga imang e botongewe mangidopẹ̌ sasěmba kụ susi ene e.

³⁰Binatang kụ baugu tundung pěngangampung dosa e kụ piněngal᷊akeng dahane sěnggạ mẹ̌deạu itonda sol᷊ong Huang e Susi e, hinongbe tongkạ kěbị kụ tawe wotonge kanengang.