Read Sangir MANGA IMANG 7 Bible Online

MANGA IMANG 7 - Sangir bible

MANGA IMANG 7

¹Kai ini kal᷊awọu pělatorangu sasěmba laaweng dugi. Sasěmba ene mambeng susi tawẹ sihinge.

²Binatang baugu sasěmba e harusẹ̌be potọ su tampạ u pěmamotokang binatang baugu sasěmba tinongkạ, mase rahane sěbohẹ̌ su sěndihange ěpạ bọu pananěmbaěng.

³Imang tangú harusẹ̌be měmpěměllọ su wowom pananěmbaěng kal᷊awọeweng tawang binatang ene e, ku: Tol᷊ene piạ tawane, kụ tawa ene namikung lohon tiange, buang kal᷊uwaeng dingangu tawane, ringangu wahageangu atene kal᷊ěnggihange.

⁵Kěbị ene tangú harusẹ̌ tongkatenge su wowom pananěmbaěng, kere sasěmba kẹ̌kanengang baugu MAWU. Sasěmba ene tangú kai sasěmba waugu laaweng dugi.

⁶Apạeweng manga esẹ su ral᷊ungu gal᷊ipohong manga imange wotonge měmpẹ̌kinạ gěsing sasěmba ene, kaiso i sire harusẹ̌be měmpẹ̌kinạ su tampạ e hala, watụ u sasěmba ene kawe susi tawẹ sihinge.

⁷Baugu sasěmbang kal᷊aampungu rosa e ringangu sasěmba laaweng dugi e kahinoěngu pělatorange mẹ̌sul᷊ung mangal᷊ene: Gěsim binatang kụ nighěllị ute kai wahageangu imang kụ něnarakang u sasěmba ene.

⁸Pisim binatang ene e mal᷊aim baugu imang.

⁹Apạeweng sasěmba sẹ̌sadiaěng e kụ tẹ̌tongkateng su ral᷊ungu tatongkateng e arau tẹ̌tuěngang su ral᷊ungu kawali arau tẹ̌tapaěng, makoạ bahageang u imang kụ měnarakang u sasěmba ene.

¹⁰Kaiso sasěmba sẹ̌sadiaěng kụ tawe nituěng, baewe apan seng nisěbohangu lana, arau waewe lai apang mạhěgu e, kěbị-kěbị e waugu manga imang hiteng Harun, kụ harusẹ̌be pahiạ mẹ̌sul᷊ung sutal᷊oarang sire e.

¹¹Seng ini e manga pělatorangu mạanung sasěmbang pẹ̌darame kụ isẹ̌sěmba su MAWU.

¹²Kamageng u sasěmba ene isěmba waugu tatarimakasẹ, tangú baugu makoạ daringang u binatang ene harusẹ̌ko lai pěgěllịu borotẹ̌ tawẹ kabọ e. Borotẹ̌ ene tangú botongewe koạ pakasuwenehẹ̌ bọu kal᷊aukangu tapoěng dingangu lanang zaitun, botonge lai borotẹ̌ mamara manipị kụ niwuhaěngu l᷊ana, arau kukisẹ̌ tapoěng kụ nikoạ u lanang zaitun.

¹³Sul᷊ikudu ene tangú harusẹ̌be lai pẹ̌gěllịu sasěmba borotẹ̌ nikoạ piạ kabọ e.

¹⁴Bọu apang haghim borotẹ̌ e harusẹ̌be koạ sasěmba su MAWU, kụ ene ute kai wuạ u imang kụ něngal᷊ạ daham binatang ene kụ naněbohu ene su pananěmbaěng baugu sasěmbam pẹ̌darame.

¹⁵Gẹ̌sine harusẹ̌ kinạ su ěllong binatang ene nisěmba, kụ tawe wotonge mělěmbe sarang kadidị-didị sarang sěngkariọěllone mal᷊ukadẹ̌.

¹⁶Kereu pẹ̌sěngkatau manondang sasěmbam pẹ̌darame mědeạu ipěngganapẹ̌be munarane, arau waugu sasěmba ual᷊ingu naung gẹ̌guwạ sen tawahal᷊uasʼu pakasue kanengang su ěllo ene lai, lěmbene tangú wotongewe hědong kaěng sěngkariọěllone.

¹⁷Kereu suěllo katěllune wědam piạ lěmbene, ute gẹ̌sine ene harusẹ̌be pakasue tongkạ.

¹⁸Kai kereu su ěllo katěllune gẹ̌sine e mal᷊aing kinaseng lai, tangú sasěmba ene e sarung tawe itarimạ dingangu tawe makaual᷊i al᷊amatẹ̌ baugu tau ene, kaiso kawe hinong ipẹ̌pělli. I saing kiminạ tangú i sie nẹ̌sal᷊a kụ harusẹ̌ měnal᷊udẹ̌ aị e.

¹⁹Gěsi kụ kinahinoěngu apa sěmbaụ ral᷊akisẹ̌ e harusẹ̌ pakasue tongkạ katewe tawe wotonge kanengang. Gẹ̌si sasěmbam pẹ̌darame e kětạembeng botonge kanengang u taumata tawẹ turạ e.

²⁰Kereu taumata e kuminạ kinạ ene su tempong i sie nẹ̌baradosa e tangú i sie semben tawe lai nirekeng umatu MAWU Ruata.

²¹Kereu pẹ̌sěngkatau kụkinạ gẹ̌sing binatang kụ nisěmba ene, ute seng něnenggehẹ̌ sěmbaụ dosa baewe asal᷊e wọu taumata, arau waẹbe lai wọu binatang, i sie selain tawe nirekeng umatʼu MAWU Ruata.

²²MAWU e něngonggọu manga titanʼE ini e si Musa

²³waugu taumatang Israel. Tawang sapi, domba arau kambing e tawe wotonge kinaseng.

²⁴Tawam binatang kụ seng nate hala e arau ual᷊ingu nitěmboěngu binatang dul᷊u e, tawe wotonge kinaseng kaiso wotonge wue paketang baugu pandungang e wal᷊ine.

²⁵Taumata kụ kụkinạ tawam binatang kụ botonge isěmba waugu sasěmba laidopẹ̌ e waugu Ruata, tawe lai nirekeng umatʼu MAWU Ruata.

²⁶ Tau Israel kụ balạewe měnsang mẹ̌tẹ̌tanạ suapa i sie e, tawe wotonge kuminạ dahang manụ u kinoaěng arau raham binatang bal᷊ine e.

²⁷I saing lumampa tiahane ini e sembelaing tawe nirekeng umatʼu MAWU Ruata.

²⁸MAWU e něngonggọu manga titanʼE ini e si Musa u

²⁹baugu tau Israel. I saim manondang sasěmbam pẹ̌darame, harusẹ̌ měhae sěnggạ baugu sasěmba nihae waugu MAWU.

³⁰I sie hala e harusẹ̌ manonda sasěmba laidopẹ̌ ene. Tawa ringangu sěbạ u binatang ene e harusẹ̌ isěmba kere sasěmba ipakal᷊ahẹ baugu MAWU.

³¹Imang e harusẹ̌ mẹ̌tongkạ tawam binatang ene e su wowom pananěmbaěng, arawe sěbạ e tangú kai wuạ u manga imang.

³²Palange koaneng harusẹ̌ gěllị kere sasěmba tani,

³³baugu imang kụ maněmbang daha ringangu tawa sasěmbam pẹ̌darame ene.

³⁴Sěbạ dingangu palange koaneng e ute kai gaghěllị tani kụ nial᷊ạ u MAWU wọu sasěmba nilahẹ u tau Israel kụ nionggọ su manga imang. Kụ kai ene gaghěllị u tau Israel su manga imang sarang marěngụ-děngụ.

³⁵Bọu laidopẹ̌ kụ nisěmba su MAWU e, ute kai wahageang ene e kụ nịlaonggọ e si Harun dingangu manga anạ e su ěllọeweng i sire nial᷊amateng nakoạ imang.

³⁶Su ěllo ene MAWU e nẹ̌parenta su tau Israel tadeạu wọu sasěmban sire, wahageang ene e waugu manga imang. Tiaha ini e harusẹ̌ tuhukang u tau Israel sarang marěngụ-děngụ.

³⁷Kerene kakoạ e kal᷊awọu tiahan sasěmba tinongkạ, sasěmba sẹ̌sadiaěng, sasěmbang laampungu rosa, sasěmbang laaweng dugi, sasěmbang pangangal᷊amatẹ̌ dingangu sasěmbam pẹ̌darame.

³⁸MAWU e mangonggọu kal᷊awọu tita ene si Musa su Wul᷊udu Sinai su tempong i Sie něngoro tau Israel nẹ̌gěllị u sasěmba su wanua l᷊inggin Sinai.