Read Sangir MANGA IMANG 8 Bible Online

MANGA IMANG 8 - Sangir bible

MANGA IMANG 8

¹MAWU e něhengetang si Musa,

²”Kuieko i Harun dingangu manga anạ e kụ bawako pakeangu manga imang, lanang pěndal᷊anisẹ̌, sapi esẹ kawuhuang sěmbaụ baugu sasěmbang kal᷊aampungu rosa, domba esẹ darua ringangu borotẹ̌ tawẹ kabọ e sěmpangisang.

³Bọu ene rolohẹ̌ko kal᷊awọu umatʼu Israel, apẹ̌komol᷊ẹ̌ su těngon tukadu Tenta-Ku.”

⁴I Musa nẹ̌koạ apạewen niparentam MAWU e. Su tempọeng kal᷊awọu umatẹ̌ e natampungke sene,

⁵i Musa e nẹ̌berạ e si sire, ”Takụ nikoạ orasẹ̌ ini e ute kai laorom MAWU.”

⁶Bọu ene i sie rimolohʼi Harun dingangu manga anạ e niapahowi sol᷊ong těngone kụ pẹ̌tẹ̌těngkawurěsim batangeng i sire.

⁷Mase i sie něluhem pakeang u imang si Harun: kameja, papehẹ dingangu kakingkaeng. Kerene lai efod[1] kụ nilạikị su kal᷊uwaenge nịlaikị u hekạ al᷊usẹ̌.

⁸Bọu ene nisakẹ e tatakạ sěbạ si Harun kụ su ral᷊ungu tatakạ sěbạ ene e nitahoěngu Urim dingangu Tumim.[2]

⁹Bọu ene nitakatengke paporong u těmbọ i Harun, kụ bọu ene nitěbikangken dal᷊ěgahẹ̌ bul᷊aeng su paporong ene e tatialạeng Harun kawe seng nakoạ tataghuaneng u MAWU. Kěbị ene e nikoạ i Musa timuhụewe laorong MAWU e si sie.

¹⁰Bọu e i Musa něngal᷊a e lanang dal᷊anisẹ̌ e kụ niwuhane su Tentam MAWU e ringangkeweng kěbị apal᷊iwụ e. Ual᷊ingu kawe kerene tangú kěbị e nipakauadipẹ̌ sěmatang baugu MAWU e.

¹¹Bọu lana ene kadodọ e nipěholo pitu sul᷊e su wowom pananěmbaěng dingangkeweng kal᷊awọu apal᷊iwụ e, kerene lai su manga bakẹ̌ dingangu manga wal᷊ahuange. Ual᷊ingu kawe kerene ute kěbị e kai pinakatuntụ baugu MAWU.

¹²Bọu ene i Musa e něngal᷊amatẹ̌ si Harun něněbohu lanang dal᷊anisẹ̌ e kadodọ su wowon těmbọ e.

¹³Bọu e i sie rimolohu manga anạ i Harun nipahowi sol᷊ong horone. I sire niluheěnge kameja ringangu papehẹ. Bọu ene nileheěngu paporong su těmbọ i sire kerẹewe seng niorong MAWU e si sie.

¹⁴Bọu e i Musa něngal᷊ạ e sapi esẹ kawuhuang baugu sasěmbang ampungu rosa. I Harun dingangu manga anạ e naměllọeng liman sire su wowon těmbọ u binatang ene.

¹⁵Bọu e i Musa němotoọ e kụ něnggaing dahane sěnggạ. Daha ene tangú niwuhạen tal᷊imědone su manga sunge su manga e wukum pananěmbaěng, tadeạu pananěmbaěng ene e pinakatuntụ baugu Ruata. Daha lěmbene nisěbohe su wal᷊ahuangu pananěmbaěng. Kerene kakakoạ e pananěmbaěng ene nipakasusi e kụ pinakatuntụ baugu MAWU.

¹⁶Bọutewen sapi wuhu papotọ ene e, i Musa e nangal᷊ạ e kěbị tawane apang namikung lohon tiange, buang kal᷊uwaeng dingangu tawane, dingangu atene kapaelang e. Kěbị e nitongkạ e su wowom pananěmbaěng.

¹⁷Arawe ghěsing sapi ene e, pisine, lohon tiange, mase tinaine lai, kụ kasěllaheweng sapi ene tabeạu katewe apan seng nihae tangú nitongkạ e sul᷊ikudu pẹ̌darasengang kerẹewe seng nilaorom MAWU.

¹⁸Bọu ene i Musa e něngal᷊a e domba esẹ baugu sasěmba tinongkạ, mase i Harun dingangu manga anạ e naměllọen liman sire su wowon těmbọ u domba ene.

¹⁹I Musa e namotọ domba ene ringangu rahane nisěbohe su wiwihe ěpạ bọu pananěmbaěng e.

²⁰Bọu e binatang ene e pinẹ̌papotọ e kụ lohon tiang dingangu l᷊aede niuhase ringangu akẹ pinakawurěsi. Těmbọ e, tawane, mase lěmbeng manga ghěsing domba esẹ ene nitongkạ e waugu sasěmba tinongkạ su wowom pananěmbaěng kerẹewe niorom MAWU e si sie. Dal᷊urung laidopẹ̌ sasěmba ene e mětẹ̌tatal᷊ahino su naungu MAWU e.

²²Mase i Musa e něngal᷊ạ e domba esẹ lai sěmbaụ baugu sasěmbang pěngangal᷊amatẹ̌ imang. I Harun dingangu manga anạ e něměllọu liman sire su wowon těmbọ u domba ene,

²³mase i Musa e namotọ. Bọu ene nial᷊ạ e kadodọ daham binatang ene e, kụ niwuhane su tul᷊ing Harun koaneng dingangu iněngen limane koaneng e, dingangu iněngen laede koaneng.

²⁴Bọu ene i sie rimolohu manga anạ i Harun pinakarani, mase niwuhaěngu raha kadodọ su raukalun tul᷊in sire koaneng, dingangu su iněngen tal᷊imědon liman sire koaneng, ringangu iněngen tal᷊imědon laedi sire koaneng. Masene lěmben daha e nisěbohe su wiwihe ěpạ bọu pananěmbaěng e.

²⁵I Musa e nangal᷊ạ e tawan domba ene, tol᷊ene piạ tawane, kasěllaheweng tawa namikung lohon tiange, atene kapaelange, buang kal᷊uwaenge ringangu tawane, ringangkewelain laede koaneng.

²⁶Bọu patanga lohom borotẹ̌ tawẹ kabọ e kụ seng nisěmba su MAWU e, i Musa něngal᷊ạ borotẹ̌ masuwenehẹ̌ sěmbaụ nikoạ u l᷊ana ringangu borotẹ̌ manipị laị sěmbaụ. Borotẹ̌ ene nilěngkang su wowon tawa ringangu palangu domba koaneng.

²⁷Kěbị e nipěllọ su l᷊imang Harun dingangu manga anạ e, bọu e i sire něnarakang kere sasěmba tinantu waugu MAWU.

²⁸Bọu e i Musa nangal᷊ạ laidopẹ̌ ene e wọi sire kụ nitongkạ su wowom pananěmbaěng, dingangkewen sasěmba tinongkạ baugu sasěmbang pěngangal᷊amatẹ̌ e. Dal᷊urung sasěmba laidopẹ̌ ene e mẹ̌tẹ̌tatal᷊ahino su naungu MAWU.

²⁹Bọu e i Musa něngal᷊ạ e sěbạ u domba ene kụ nisěmbane kere sasěmba tinantu waugu MAWU. Ene ute kai wahageang i Musa e wọu domba esẹ kụ nighěllị baugu komol᷊ang u pěngangal᷊amatẹ̌ imang. Kěbị e kinoạ i Musa kerẹewe seng niorom MAWU si sie.

³⁰Bọu ene i Musa něngal᷊ạ e sěnggạ bọu l᷊anang pěndal᷊anisẹ̌, dingangu sěmbahageang bọu raha su wowom pananěmbaěng, kụ bọu ene nitambuse si Harun dingangu manga anạ e ringangu su pakeang i sire. Ringangu ral᷊enge ene tangú i Musa e napakahaen sire ringangu pakeang i sire e waugu MAWU.

³¹Bọu ene tangú i Musa e nẹ̌bera si Harun dingangu manga anạ e, ”Laghako ghẹ̌sim binatang sasěmba ene su těngon tukadu Tentan MAWU e. Tumuhụ laoron MAWU e, i kamene harusẹ̌ kinạ sene děllingeng borotẹ̌ sasěmbam pěngangal᷊amatẹ̌ e kạtataho su ral᷊ungu patanga.

³²Gěsim binatang dingangu borotẹ̌ apang lěmbene ute harusẹ̌be pakasue tongkạ i kamene.

³³Karěngụ u pitu ěllo i kamene tawe wotonge měmpaněntang u Tentam MAWU e sarangkewe komol᷊angu pěngangal᷊amatẹ̌ e masue.

³⁴MAWU e nangorọ e tadeạu apan nạung kinoạ i kitẹ sěhěllo ini e nạung mal᷊aing kinoạ tuhụ e. Ual᷊ingu komol᷊ang ene tangu rosang kamene e niampungang.

³⁵Karěngụ u pitu ěllo, ěllo ringangu hěbi, i kamene harusẹ̌ matanạ su těngon tukadu Tenta baugu mẹ̌koạ apan niorom MAWU. Kereu i kamene tawe mẹ̌koạ ene tangú i kamene sarung mate. Seng ene e niorong MAWU e si siạ.”

³⁶Bọu e i Harun dingangu manga anạ e nẹ̌koạewe kěbị apan niorom MAWU e wọu anum Musa.