Read Sangir MANGA IMANG 9 Bible Online

MANGA IMANG 9 - Sangir bible

MANGA IMANG 9

¹Sěhěllo samuring komol᷊ang u pěngangal᷊amatẹ̌ e napal᷊usẹ̌, su ěllo kual᷊une, i Musa e nẹ̌kui si Harun dingangu manga anạ e ore lai měngangahạ umatʼu Israel.

²Angkuěng i Musa e si Harun, ”Pěngal᷊ạko sapi esẹ kawuhuang sěmbaụ dingangu domba esẹ sěmbaụ, kụ kěbị e tawẹ turạ e. Kụ koạko sasěmba su MAWU binatang darua ene e, sapi esẹ baugu sasěmbang ampungu rosa, dingangu domba esẹ e waugu sasěmba tinongkạ.

³Bọu e rolohẹ̌ko tau Israel pěnarakangu kambing esẹ sěmbaụ baugu sasěmbang ampungu rosa ringangu anạ u sapi sěmbaụ dingangu anạ u domba sěmbaụ, kụ sěmbaụ-sěmbaụ e umbure sěntaung dingangu tawẹ turạ e waugu sasěmba tinongkạ.

⁴Oroiko i sire pěnarakangu l᷊ai sapi esẹ sěmbaụ dingangu kambing esẹ sěmbaụ baugu sasěmbang pẹ̌darame. Kěbị ene harusẹ̌be sarakang i sire su MAWU sěngkaonggọ dingangu sasěmba sẹ̌sadiaěng nịsasạu lana, batụu su ěllo ini e MAWU sarung mẹ̌těngkatodẹ u watangengʼE si kamene.”

⁵Bọu ene kěbịewe apan nitanatang Musa e niěntudʼi sire su těngon Tenta, kụ patikụ umatẹ̌ e němpẹ̌tampung sene mědeạu mẹ̌kal᷊iomaneng su MAWU.

⁶Bọu e i Musa nẹ̌bera, ”MAWU e rimolohʼi kamene pěmpẹ̌koạ ini e tadeạu i kamene e makakasilo wue tualagu rarěntan MAWU.”

⁷ Bọu ene i sie nẹ̌bera si Harun, ”Kakoạko sol᷊ong pananěmbaěng kụ diahiko sasěmba ampungu rosa e ringangu sasěmba tinongkạ e, tadeạu rosanu ringangu rosang umatẹ̌ e ampungang beng MAWU. Koạko ene kerẹewe seng niorong MAWU.”

⁸Tangú himaungke i Harun sol᷊ong pananěmbaěng kụ němotọ e sapi esẹ kụ sarung isarakang baugu ampungu rosam batangenge.

⁹Manga anạ i Harun něnogoreng daham binatang ene e si Harun, kụ i sie něngunọeng tal᷊imědone su ral᷊ungu raha ene, kụ nịbawuhane su manga sungene su wukune ěpạ bọu pananěmbaěng ene. Bọu ene raha lěmbene tangú nisěbohe su wal᷊ahuangu pananěmbaěng.

¹⁰Tawa, wuang kal᷊uwaeng, badangu binatang ene kal᷊ěnggihange nitongkạ e su wowom pananěmbaěng, kerẹewe seng niparentan MAWU e si Musa.

¹¹Arawe ghesi ringangu pisim binatang ene e nitongkạ e su l᷊ikudu pẹ̌darasengang.

¹²Bọu e i Harun namotọ e binatang baugu sasěmba tinongkạ baugu watangenge. Manga anạ i Harun něnogoren daham binatang ene si sie, wọu ene nisěbohe karạ e su wiwihe ěpạ bọu pananěmbaěng.

¹³Bọu ene i sire měmpẹ̌gěllị e si sie těmbọ e ringangkewem badange lai wal᷊ine wọu binatang ene e, kụ karạ i sie nitongkạ e su wowom pananěmbaěng.

¹⁴Bọu ene lohon tiang e ringangu palang u binatang ene niuhase kụ nitongkạ e ringangu sasěmba tinongkạ su wowom pananěmbaěng.

¹⁵Bọu ene i sie nẹ̌gěllịeng kambing baugu sasěmbang ampungu rosang umatẹ̌ e. Kambing ene e nipotọ e kụ nighěllị kere sasěmba waugu kal᷊aampungu rosane e hala.

¹⁶Bọu ene nial᷊ạ e lai binatang baugu sasěmba tinongkạ, kụ nisěmbane tuhụewe atore.

¹⁷Bọu ene nighěllị e sasěmba sẹ̌sadiaěng e; kụ nangal᷊ạ e tapoěng sěhěngkung, mase nitongkạ e su wowom pananěmbaěng. Ene tangú kai tatimu sasěmba sẹ̌sadiaěng měllo-měllo e.

¹⁸ Bọu e nipotọ e lai domba esẹ sěmbaụ dingangu sapi esẹ sěmbaụ gunan sasěmbam pẹ̌darame waugu umatẹ̌. Manga anạ i Harun němpěnogoru raham binatang ene si sie, bọu e i sie naněbohe su wiwihe ěpạ bọu pananěmbaěng e.

¹⁹Tawan sapi ringangu kambing ene nipěllọ i sire

²⁰su wowon sěbạu binatang darua ene, bọu e nitongkạ i Harun su wowom pananěmbaěng.

²¹Sěbạ dingangu palang u binatang ene koaneng e nisěmbane kere sasěmba tinantu waugu MAWU. Ene tangu kai wuạ u manga imang, kerẹewe seng niorong Musa e.

²² Samurim bọu němpẹ̌gěllịu sasěmba ene kěbị e, i Harun něhengkẹ u limane su pusigu kawanuang Israel kụ něngal᷊amatẹ̌ si sire, bọu e i sie limintụ.

²³Mase i Musa rěduang Harun simuẹ̌ su ral᷊ungu Tentam MAWU. Bọu ene i sire nahunsěbang kụ něngal᷊amatẹ̌ kawanua. Mase patikụ kawanuang Israel nakasilọ e tualagʼu rarěntam MAWU.

²⁴Sěngkělěndịu MAWU e naparělusʼu putung kụ nanutung kewe sasěmba ringangkewen gẹ̌sine apam piạ tawane e su wowom pananěmbaěng e sarang nasue-sue. Ené kawanuang Israel nakasilọ e, i sire měngkatawe němpahul᷊uasẹ̌ kụ němpẹ̌tumpěkuhẹ̌ nẹ̌suba.