Read Sangir YEREMIA 1 Bible Online

YEREMIA 1 - Sangir bible

YEREMIA 1

¹Bukẹ̌ ini kai lohong bawerang Yeremia anạ i Hilkia, sěngkatau imang bọu soang Anatot, su wanuang Benyamin.

² MAWU e nẹ̌bisarang Yeremia su kapul᷊o těllune su taunge su kawasang parentang i Yosia anạ i Amon datung Yehuda e.

³ Bọu ene MAWU e nẹ̌bisara kapia ringange masau susul᷊ene něnětạ bọu tempong pěpaparentan Yoyakim anạ i Yosia sarang taung kapul᷊oěsane su parentan Zedekia anạ i Yosia. Su wul᷊ang kal᷊imane taung ene lai tumanạu Yerusalem nịlahuwo sarang pěmamembangeng.

⁴MAWU e nẹ̌bera si siạ,

⁵”Těntal᷊ang Iạ e ren tawe napakạdiading kau e su ral᷊ungu gandongang i ninangu e, dingangu těntal᷊ang i kau ren tawe nipěhanạ, Iạ e kai seng němile ringangu něnduị i kau e makoạ nabi waugu manga wansa.”

⁶Iạ e simimbahẹ̌, ”O MAWU Kụ Limembong Karangetange, iạ e wal᷊inewe pelesa mẹ̌bisara, ual᷊ingu iạ e kai wědang tumanị u mangudạ.”

⁷Arawe MAWU e simimbahẹ̌, ”Kumbahang mẹ̌bera u i kau e kai wědang mangudạ. Kamagengu Iạ e měndolohi kau e walạewe sarang anun sai, i kau e harusẹ̌be tamai, dingangu suapang i kau e Takụ i oro pẹ̌bera, ute harusẹ̌be těpasu sarang anun sire.

⁸Kumbahangbe matakụ i sire e, batụu Iạ e sarung duměndingang si kau baugu maněntanudẹ̌ si kau e. Iạ e kai MAWU, kụ seng něhengetang!”

⁹Bọu ene MAWU e něngul᷊uheng lima-Ne, ringangu něnal᷊endeng mohongku bọu e nẹ̌bera u, ”Daringihẹ̌ko dingangu wohangko wawera apan Takụ i wera ini e.

¹⁰Sahěllo ini e, i kau Takụ pẹ̌gěllikangu kawasa su kal᷊awọu wanua, ringangu su kal᷊awọu kararatuang e — kawasa waugu mapakal᷊ei ringangu mapakaghoghahẹ̌, mapakawatang dingangu mapakawinasa, mapakapětị dingangu mẹ̌suang.”

¹¹MAWU e nakiwal᷊o si siạ, ”Kai apa kinasilonu e Yeremia?” Iạ e simimbahẹ̌, ”Lelangu kalung sal᷊ise, MAWU!”

¹²”Těngadẹ̌,” angkuěngu MAWU e, ”Iạ měndiagạ[1] tadeạu kěbị apan Takụ i wera e mariadi karal᷊ahẹ.”

¹³Bọu e MAWU saụ nakiwal᷊o si siạ, ”Apa lai kinasilonu?” Iạ simimbahẹ̌, ”Su sěmběkan sawěnahẹ̌, iạ e nakasilo kuring kụ lohone kạsahokane kụ kai maraning mawihu ramahi.”

¹⁴MAWU e něhengetang, ”Bọu sěmběkan sawěnahẹ̌ kasasigěsạ e sarung mẹ̌boang kụ mawuạ su kěbị tumanạ u soa ini.

¹⁵Iạ e měndolohu kěbị bansa su sěmběkan sawěnahẹ̌ aparěnta mẹ̌deạ u pẹ̌kawasa Yerusalem. Manga meselẹ̌ mạngělikụ soa ini ringangu manga tukadu pasěllangenge ringangu kěbị soa su Yehuda e sarung pul᷊ahoěng i sire e.

¹⁶Iạ e sarung mapakahukungu taumata-Ku e, ual᷊ingu i sire e nẹ̌dosa ringangu timal᷊ikudẹ̌ si Siạ. I sire kai seng něgěllị u sasěmba su manga ruata wal᷊ine, ringangu nẹ̌koạ manga tul᷊ada, mase pinẹ̌subaěng i sire e.

¹⁷Pẹ̌dariahị e Yeremia! Dakọ e kụ těpasẹ̌ko si sire apang kụ sen Takụ nioro si kau. Kumbahang matakụ i sire e, tadeạu i kau e kumbahang be Takụ iapakatakụ něngalembo l᷊ai kamagengu mẹ̌těngon sire e.

¹⁸Daringihẹ̌ko! I kau e sarung dokatengu tumanạ u wanua ini, kụ kai manga ratung Yehuda e, apang mapapangkatu pěměrenta, manga imang, dingangu kawanua. Arawe sahěllo ini e, i kau Takụ gělikangu kuatẹ̌ baugu rumokạ si sire. I kau sarung makoạ kere soa piạ tatěndạ e, mẹ̌sul᷊ungu rihi uase ringangu meselẹ̌ tambaga. I sire tawe sarung makawatạ si kau, u Iạ e ruměndingang dingangu manirung si kau. Iạ e kai MAWU, kụ seng něhengetang.”