Read Sangir YEREMIA 10 Bible Online

YEREMIA 10 - Sangir bible

YEREMIA 10

¹Tau Israel, daringihẹ̌ko tatanatang MAWU e si kamene.

²I Sie nẹ̌bera, ”Abe tol᷊e tundung kawanua wal᷊ine e, ringangu abe ghěnggangu makasilo kal᷊awọu tatialane su l᷊angị e kụ i kẹ̌katakụ u manga kawanua ene.

³Tundung adatu manga wansa ene e mamben tawẹ gunane. I sire e měmpạnuwang kakaluang su kěhu e, ringangu měmpạngoro basẹ̌ u kalu e apělẹ̌hal᷊ẹ̌ ene ringangu pakakase pakịkoạ tul᷊adang mahang duata e.

⁴Bọu ene tul᷊ada ene nilěgahengu wul᷊aeng dingangu sal᷊aka, wọu ene nipakuang tadeạu matoghasẹ̌ kụ tawe manawo.

⁵Manga tul᷊ada ene e mạngawẹ mahang taumata su waelu katimu. I sire tawe makawawera, tawe makaral᷊empang, dingangu harusẹ̌ hengketang. Abe katakụ i sire, watụ u i sire e tawe makapẹ̌koạ dal᷊akisẹ̌ si kamene; mẹ̌koạ mapia e i sire mal᷊aing tawe makamampo.”

⁶MAWU kụ mawantugẹ̌ e, i Kau e tawẹ sihinge, arengʼU e mawantugẹ̌ dingangu napenẹ u kawasa.

⁷ I sai tangu mạdiri maimang si Kau e, ratuʼm patikụ bansae? Těngadẹ̌, i Kau e mambeng hinong adateng. Bọu patikụ apang pande e su tal᷊oarang manga wansa ringangu wọu kěbị manga ratun sire e, tawẹ u sarang sěngkatau kụ i kasul᷊ung dingangu watangengʼU e MAWU.

⁸Makul᷊i ringangu wodokẹ̌ i sire kěbị e, watụ u ruatan sire e tumbạeng kalu e marihutu, tawe makatěntiro apang kụ piạ gunane.

⁹I sie niěmboěngu sal᷊aka ringangu wul᷊aeng kụ niwawa wọu Spanyolẹ̌ dingangu soang Ufas, kěbị e kai ěnạu l᷊imang měnggaghambarẹ̌ dingangu kipungu wul᷊aeng. Pakeange wọu hekạ kamumụ mahunggurang dingangu kamumụ mangudạ, kinoạ u apang masasingkạ u kahiwuang naunsui e.

¹⁰Arawe i Kau e, MAWU, Ruata kụ kahěngang e, Duata e mẹ̌ngonggọ u pẹ̌bawiahẹ̌, datu kakalẹ̌. Kamagengu i Kau e lumangehẹ̌, banua e ghumanuẹ̌, kamagengu i Kau e mahasa, apaʼm bansa e tawe makatahang. (

¹¹I kamene, manga umatẹ̌ e, kai hinong mapakasingkạ si sire u apang mahang duata kụ tawe něndiadi langị dingangu dunia e, sarung i pakawinasa. I sire e sarung i apakatạdise wọu wowon dunia ini.)

¹²MAWU e něndiadi wanua e ringangu kawasa-Ne, něluhudẹ̌ dunia e ringangu kapelesa-Ne, ringangu napakawingkahu l᷊angị ual᷊ingu katatahuěnna-Ne.

¹³Kětạeng dingangu mẹ̌gěllị u parenta e, tangu mẹ̌gaghal᷊ědụ e akẹ su winangaeng.[6] Bọu manga pondol᷊u dunia e, i aparěnta-Ne winawa e, ringangu nikoạʼE kilạ niapasěnnange su ral᷊ungu tahiti, ore niringọʼE anging bọu tampạ u pěndaresoěngʼE.

¹⁴Nakasilo kěbị ene e nakahěngangke taumata e, u i sie kai wodo ringangu tawẹ tahuěnnane. Apang mapapandeʼm bul᷊aeng e sen tawe kapangimangeng, u tul᷊adang mahang duata kinoạ e ene e kai konti ringangu tawẹ niawane.

¹⁵Manga mahang duata ene e tawẹ arẹ̌gane, kụ botongewe heghesang dingangu hinakaneng. Kamagengu marěnta tempone e i sire e sarung mawinasa.

¹⁶Duatang Yakub bal᷊inewe kere manga mahang duata ene; i Sie kai měndariadi patikụ sạbarang. ArengʼE ute kai MAWU Kụ Limembong Kawasa; i Sie e seng němile Israel nakoạ umatʼE.

¹⁷Tumanạ u Yerusalem, i kamene e niliwungang! Ual᷊ingu ene, pěmpẹ̌dariahị e!

¹⁸Sěnsul᷊ẹ ini e MAWU e sarung měnděmmẹ u wansang Yehuda e sarang pěmamembangeng; i kamene kěbị e sarung iapakawihua-Ne marihutu. Kai ene e tatanata wọu anuʼm MAWU e.

¹⁹Tumanạ u Yerusalem e měmpẹ̌kẹ̌kiạ u, ”I kami e naral᷊esẹ, kụ tawe maul᷊e. Nạung kal᷊imona e i kami e měnẹ̌nikạ u sigěsạ ini e i katal᷊udẹ̌beng kami e, kutẹu kawe nạung tala.

²⁰Pẹ̌darasengang i kami e nasue naghagholang, dingangu manga tal᷊ine e nasue nawawěsụ. Tawẹ u saụ makararisị u tenta e, ringangu měnakẹ u manga hekạ e watụ u manga anạ i kami e seng nasue nahundal᷊eng.”

²¹Iạ e simimbang, ”Kai wodo manga těmbonang i kitẹ e. I sire e tawe nẹ̌gausẹ̌ laahạ bọu anuʼm MAWU, kụ kai ual᷊ingu ene nakakasoe si sire e, ringangu i kitẹ e nẹ̌sal᷊iawuhẹ̌ suapan tampạ.

²²Daringihẹ̌ko! Piạ habarẹ̌ u wansa sěmbaụ su sěmběkan sawěnahẹ̌ e nakakasongkang kaghaghěnggang. Sordadone sarung makakariadiʼm manga soang Yehuda e něhio, ringangu tawẹ taumatane. Kal᷊awọu asung kěhu e sarung měmpẹ̌kěmbuni paịse.”

²³MAWU, iạ masingkạ u tawẹ u sarang sěngkatau e mẹ̌kawasa, měnilakehu pẹ̌bawiahe, arau měngul᷊ing dal᷊engu wiahe.

²⁴Těntiroiko i kami e MAWU, kaiso kumbahangbe ringangu ghagheserẹ̌ kụ tumanị u makạkasakị e. Kumbahangbe lai měhukung si kami e kereu i Kau e kạl᷊angehe, u nal᷊ahẹ u i kami e sarung mawinasa kěbị.

²⁵Běsẹ e pẹ̌du-Nu e su manga wansa kụ tawe měngakung Kau e ringangu tawe mapulu mẹ̌kal᷊iomaneng si Kau e. Batụu i sire e seng napakawinasang umatʼU e marihutu ringangu mapakagholangu wanuang kami e.