Read Sangir YEREMIA 12 Bible Online

YEREMIA 12 - Sangir bible

YEREMIA 12

¹”Kereu iạ měnowạeng pěrkaraku su těngo-Nu e MAWU, tantu sarungbe mal᷊ahẹ u i Kau MAWU e mambeng matěngadẹ̌. Katewe iạ e mal᷊aing mapulu makiwal᷊ong hal᷊ẹ̌ u kạadilẹ̌ e si Kau. Kawe unụ e taumata ral᷊akisẹ̌ e masorogạ biahe? Kawe unụ e taumata tạ katul᷊ide kawe makạual᷊i?

²Nisuangu i sire e mẹ̌sul᷊ungu kakaluang, bọu ene i sire e měhamụ, tumuwo ringangu mẹ̌bua. I sire e hanesẹ̌ mạhumbisarang kapianʼU e, kaiso su ral᷊ungu naung i sire e tumuhụ hinone e kai tawẹ pandungange si Kau.

³Arawe i Kau e, o MAWU, masingkạbeng iạ e. I Kau e makạsilo apan takụ kẹ̌koateng, dingangu i Kau e masingkạ u kereapa pěndangu naungku e si Kau. Apasěbangko taumata ral᷊akisẹ̌ ene, kụ ahạko i sire e kere domba sarang pělahataěng. Hapaiko i sire e sarang tempon sire e potokang.

⁴Kạděngụ e lai wanua ini e mamara, kụ děmpuge malolang suapaʼm bawaelang? Manga manụ u winalangeng dingangu binatang lai wal᷊ine e mate kahiang karal᷊akisu kawanuang kami e. I sire e nẹ̌bera, u iạ e tawẹ makasasilo kakakoạu pẹ̌bawiahi sire e.”[8]

⁵MAWU e něhengetang, ”Yeremia, kereu i kau e marul᷊ẹ̌pe mẹ̌tanung u taumata e, kere apa wue kụ mẹ̌tanung u kawal᷊o ngae? Kereu su ěntana kụ matirěda e i kau kawe mạtakụ, ute kaia koatengu kereu i kau e kawe su kěhu mal᷊oang su wiwihu Yordan?

⁶I kau e seng nịkakontiang, saral᷊aing manga anạu sěngkataunu e hala; i sire e mal᷊aing sumekẹ si kau. Kumbahangbe mangimang si sire, manilaing kal᷊awọu waweran sire e mararěngang.”

⁷MAWU e něhengetang, ”Tampạ u katatanakeng-Ku e sen tawe Takụ nipandungang, banua e nakoạ tataghuaneng-Ku sen Takụ nitěntang, dingangu umatẹ̌-Ku i kẹ̌kěndagẹ̌-Ku e sen Takụ nisarakang su l᷊imang manga rumarokạ e.

⁸Umatẹ̌ pinile-Ku e, němpẹ̌lawang si Siạ; mẹ̌sul᷊ungu singa su kěhu mal᷊oang, kerene i sire e lụhuang su těngo-Ku. Kai ene hakịu Iạ e mạběnsing i sire.

⁹I sire e kai mẹ̌sul᷊ungu manụ u winalangeng kụ sẹ̌sahedangu kalěmba wọu kěbị těngone. Kuiẹ e patikụ binatangu kěhu e tadeạu mal᷊aing apěngěnsue si sire.

¹⁰Mal᷊awọ měngangawasa tau raghị e seng němpěnggolang baelu anggorẹ̌-Ku e ringangu měmpěnẹ̌nahida apan dahami-Ku e. Banua-Ku mal᷊ěnggihẹ̌ e nịbawal᷊ui nakoạ kěhu l᷊inggi marěmasẹ̌.

¹¹Ore, Iạ e nakasilo si sire e napakariadiʼm banua-Ku e tampạ mal᷊ingungu makạkěndung. Kěbị e nịbawala, tawẹ u nẹ̌padul᷊i.

¹²Bọu sěmběkaʼm banua l᷊inggi su wawul᷊urange, taumata e rụděnta měmpěhampasẹ̌. Iạ e maparěntaʼm pẹ̌sasekẹ baugu i pěnggolang kal᷊awọu wanua, hakịu tawẹ u sarang sěngkatau e kụ makapẹ̌biahẹ̌ maghighilẹ̌.

¹³Umatẹ̌-Ku e měnẹ̌nawuhu gandung, kaiso kawe larang pẹ̌pěnsakenge. I sire e mẹ̌tẹ̌tawakal᷊i sěngapaʼm botonge kaiso tawakal᷊ine e tawẹ ual᷊ine. Iạ e mambeng limangehẹ̌ hakịu pěmaměnsạ i sire e tawe nisěhụ.”

¹⁴MAWU e něhengetang, ”Seng ini e tatanata-Ku baugu apaʼm banua i pělẹ̌lampungu Israelẹ̌ e kụ seng nakagholang banua nạung Takụ nionggọ su umatẹ̌-Ku Israel. Mẹ̌sul᷊ungu sasuang niěbụ bọu ěntana, kerene taumata ral᷊akisẹ̌ e sarung Takụ i sěbang bọu wanuan sire e, ringangu Yehuda e sarung Takụ i pěllọ bọu l᷊iman sire e.

¹⁵Kaiso wọuteʼm maněbang i sire e, Iạ e sarung kuměndagi sire kapia; apaʼm bansa e sarung Takụ i sul᷊e kạpia sarang banuane hala e.

¹⁶Kereu i sire e ringangu kạguwạu naung mapulu měnarimạ u agamang umatẹ̌-Ku e kụ mapulu mẹ̌salu ringangu mẹ̌bera u, ’Su arengu MAWU e kụ biahẹ̌,’ — kere nạung kal᷊imona e i sire mạněntiro umatẹ̌-Ku mẹ̌salu su arengu Baal — tangu i sire e mal᷊aing sarung marekeng umatẹ̌-Ku kụ mẹ̌biahẹ̌ tawẹ konsange.

¹⁷Arawe wansa kụ tawe mapulu tumol᷊e si Siạ e sarung Takụ ěbukang kere sasuang dingangu Takụ punaseng. Iạ e MAWU kụ seng něhengetang.”