Read Sangir YEREMIA 13 Bible Online

YEREMIA 13 - Sangir bible

YEREMIA 13

¹MAWU e něngoro si siạ apěmẹ̌mělli kahiwu manimbụ bọu leneng dingangu pěpẹ̌pakẹ, kaiso iạ e tawe wotonge měnguno su akẹ.

²Tangu něměllị e iạ kahiwu manimbụ ene, wọu e niluhe.

³Bọu ene MAWU e nẹ̌bisara kapia ringangku, angkuěnge,

⁴”Dakọ e sarang Sal᷊ụ u Efrat, kụ buniko kahiwu manimbụ ene su manga kěllẹu watu.”

⁵Tangu natuhụewe kere su parentaʼm MAWU e tamaị iạ e kụ němuni kahiwu manimbụ ene su rěduhu Sal᷊ụ u Efrat.

⁶Nal᷊iu piran tempo e MAWU něngoro si siạ saụ lai apakạkoạ sarang Sal᷊ụ u Efrat mẹ̌deạu pěngal᷊ạ kahiwu manimbụ ene e.

⁷Tangu tamaịe iạ e, kụ naněbangu kahiwu manimbụ ene bọu tampạ takụ piněmuniange. Kutẹu nạung kahiwu ene kai seng nahenẹ kụ semben tawẹ lai gunane.

⁸Mase MAWU e nẹ̌bisara kapia si siạ, angkuěngʼE,

⁹”Kerene kakakoạ e Iạ sarung mẹ̌karạdiahang baugu tau Yehuda ringangu tumanạ u Yerusalem. Iạ e sarung mapakawinasang kal᷊aoboti sire kụ mạhěmpal᷊iu ene e.

¹⁰Bansa ral᷊akisẹ̌ ini e tumanịu makětị těmbọ e ringangu tawe mapulu tumuhụ si Siạ. I sire měmpẹ̌tẹ̌tahamawu ringangu měmpẹ̌kẹ̌kal᷊iomaneng su manga ruata wal᷊ine. Kai ual᷊ingu ene hakịu i sire e makoạ kere kahiwu manimbụ kụ tawẹ gunane ene.

¹¹Mẹ̌sul᷊ungu kahiwu manimbụ kụ mạtatingguhụ masěgadẹ̌ su kal᷊uwaengu měndal᷊uhene, kerene su tiněnna-Ku e tadeạu tau Israel dingangu Yehuda e mạl᷊aikị masěgadẹ̌ e ringang-Ku. Ual᷊ingu ene tangu i sire nakoạ umatẹ̌-Ku kụ makaralo areng-Ku ringangu lẹ̌adateng. Katewe i sire e tawe mapulu tumuhụ si Siạ.”

¹²MAWU Ruata e něhengetang si siạ, ”Yeremia, habarẹ̌ko tatanata-Ku e su tau Israel u apaʼm běnsadẹ̌ tampạu anggorẹ̌ e harusẹ̌ lohoi pakapenẹ u anggorẹ̌. I sire sarung sumimbahẹ̌, ’Tumanịu wue i kami e wẹ̌ga, u wěnsadẹ̌ e kai hinong lohoěngu anggorẹ̌ e?’

¹³Tangu pẹ̌berako si sire u taumataʼm banua ini e, manga mararatu pal᷊ahěnton Daud, manga imang, nabi, ringangu kěbị tumanạ u Yerusalem sarung Takụ lohoěng pakapenẹ u anggorẹ̌ sarang měngkiwukang.

¹⁴Bọu ene i sire e Takụ i pěmpẹ̌papěpạ sěngkatau su wal᷊ine. Maghaghurang dingangu mangangudạ e sarung Takụ l᷊ai kakoateng kerene tawẹ ampunge. I sire e Takụ i pakawinasa; tawẹ apa pěndangu tatal᷊ěntụ dingangu kakěndagẹ̌. Iạ e MAWU, kụ seng něhengetang.”

¹⁵Tau Israel, MAWU e seng nẹ̌bisara! Abe kal᷊aobotẹ̌, daringihe wue i Sie!

¹⁶MAWU Ruatang kamene e hinong bantugangu e těntal᷊ang i Sie e ren tawe mapakarěntang kararěndung, dingangu laedu e masangkong su wawul᷊urange, kal᷊imonan tualagẹ̌ e lẹ̌harapengu e wal᷊uiangʼE makoạ masunaubẹ̌.

¹⁷Kereu i kau e lumahunggeẹ̌ dumaringihẹ̌ e, iạ e sarung sumangị marěmasẹ̌. Dingangu kakakěndung, iạ e sụsangị u oboti kamene e. Ěllo mataku e sarung tumul᷊aehẹ̌, ual᷊ingu umatu MAWU e nihengkẹ kere tinaweng.

¹⁸MAWU něhengetang si siạ, ”Apal᷊intụko ratu e ringangu wawụ datu e wọu kạderang kararatuang e, batụu sakapeti kụ maholẹ e kai seng manawo wọu těmbọe.

¹⁹Kal᷊awọu soang Yehuda su sěmběkan timuhẹ̌ e sen nipẹ̌tatal᷊iwungang, kụ sen tawẹ apa relaing makal᷊ěsọ bọu pěnanal᷊iwung ene. Kěbị tau Yehuda e seng nihengkẹ sarang piněmembangeng.”

²⁰MAWU e něhengetang su manga tumanạ u Yerusalem, ”Pěmpěnaungko! Manga rumarokạu e kạpahunděntane wọu sěmbẹ̌kan sawěnahẹ̌! Kai suapa taumata kụ hinong těntanurang i kamene e ringangu apang i lẹ̌lesạ i kamene ene.

²¹Kai apạ e i werang kamene e kereu taumata i kẹ̌koại kamene kere hapị i kamene kụ kawe měmatạ dingangu mẹ̌kawasa si kamene? Nal᷊ahẹ u i kamene makapěndang masakị kere sěngkatau wawine kụ kapělẹ̌hěndinge.

²²Aramanung i kamene e makiwal᷊o kawe unụ e kěbị ini e, maěnsạ su watangeng i kamene e, kụ unụ e wue pakeang i kamene e nịgaghehẹ dingangu i kamene e pinẹ̌koateng dal᷊akị. Kěngkasingkạko u ene e nariadi ual᷊ingu rosang kamene e tumanịu masaria.

²³Makakoạ ngae taumata mitung e makawal᷊ui pisine, arau harimau e makakailang awạ e? Tantu tala wue! Kerene lai i kamene kụ biasa mẹ̌koạ dal᷊akisẹ̌, kụ sen tawe makakoạ hal᷊ẹ̌ mapia e.

²⁴Iạ e sarung mapẹ̌tal᷊eing kamene e kere wal᷊eka nitiụ u anging bọu wanua l᷊inggi.

²⁵Ene e ute kai kakakoạu pẹ̌bawiahi kamene e kụ seng Takụ tinantu ual᷊ingu i kamene e seng niwul᷊eng Iạ, dingangu seng nangimang manga ruata mělle.

²⁶Iạ sẹ̌saku e sarung měnggaghehẹ pakeang bọu wadang i kamene e tadeạu i kamene e matěntol᷊e ringangu mamea.

²⁷Iạ e seng nakasilo si kamene e mẹ̌kẹ̌koạ kal᷊awọu apan Takụ i kẹ̌kawěnsing. Iạ e seng nakasilo si kamene měnẹ̌nahusu manga ruata wal᷊ine su wongkone, ringangu su manga rahami e, kerẹewe sěngkatau esẹ e nipulune su kawingu taumata wal᷊ine arau mẹ̌sul᷊ungu kawal᷊o esẹ piạ sahige su kawal᷊o wawine. Tumanạu Yerusalem, kạěngkěhang bue i kamene e! Angerẹ i kamene e mal᷊iu wọu kal᷊awọu karal᷊akisẹ̌ e tangu?”