Read Sangir YEREMIA 14 Bible Online

YEREMIA 14 - Sangir bible

YEREMIA 14

¹MAWU e něhengetang kirini si siạ mạanung musungu něhangu maihạ,

²”Yehuda e nasusa naunge ual᷊ingu kal᷊awọu soane maranịeng mate. Taumatane měmpạhundal᷊oka su ěntana kụ mẹ̌kẹ̌kasiang. Yerusalem lụheọ u makịsumbala.

³Apang mẹ̌tatangkiang taumata kalạ e i lẹ̌oro pẹ̌dẹ̌deạ akẹ su apan tampạ; su apaʼm manga sumu kụ nahundal᷊engke i sire katewe akẹ e seng nasue kěbị. Seng tawẹ lohone pasu niwawan sire saụ e. Němpẹ̌gagha ringangu němpẹ̌kěnsu kụ i sire něngkamea, ringangu měmpěnakạ gatin sire e.

⁴Tahiti e tawe rimasehẹ̌, dingangu ěntana e namarạ e; tahapěngěntana e měmpěnakạ gati ual᷊ingu kakakewạ u naung.

⁵Děmpugẹ̌ e selain tawẹ apa, ual᷊ingu ene i něngen rusa e němpẹ̌dal᷊eng. Anạ e wuhu ral᷊ěpụ e tiněntange su wanua l᷊inggi.

⁶Su wongkong bul᷊ude kalide rul᷊u e měngkate rụdarisị matagẹ̌, matane sal᷊ạ e mạdal᷊ěngo ual᷊ingu tawẹ děmpugẹ̌; i sie sụsaenga kere ral᷊ugẹ̌.

⁷Umatẹ̌-Ku e kụkahiorọu, ’MAWU, manịeng i kami e sen tẹ̌tokeěngu rosang kami, kaiso tul᷊ung bue i kami e kerẹewe su riandi-Nu. I Kau e seng masau su sul᷊ene i těntang i kami e; těngadẹ̌, i kami e nẹ̌dosa si Kau.

⁸Mang kětạu i Kau e pělẹ̌harapengu Israelẹ̌ e, kụ měngambang si kami e wọu silakạ. Katewe unụ e i Kau e mẹ̌sul᷊ungu tau raghị su wanuang kami e, mẹ̌sul᷊ungu musapir kụ ketạeng mẹ̌totong sěhěbi kụ bọu ene e tawẹ dise.

⁹Kawe unụ e i Kau e mẹ̌sul᷊ungu taumata wingọ; kere rumararisihẹ̌ kụ tawe makaumal᷊ẹ̌ mẹ̌tul᷊ung? Katewe, nal᷊ahẹ u i Kau e ene su tal᷊oarang kami e, MAWU! I kami e manga umatʼU, kụ kumbahangbe i kami e i těntangʼU!’ ”

¹⁰Mạanung kawanua ene e MAWU e něhengetang, ”Iạ e tawẹ dal᷊uase si sire ene kụ puluang tumal᷊angu watangeng bọu anu-Ku, ringangu tawe měngangawasa watangeng. Iạ e tawe miwul᷊eng pẹ̌sasal᷊an sire e, Iạ e sarung měhukung i sire ual᷊ingu rosan sire e.”

¹¹MAWU e něhengetang si siạ, ”Kumbahangbe mẹ̌gausẹ̌ si Siạ e pẹ̌tul᷊ung i sire ene.

¹²Manilaing i sire e mẹ̌pẹ̌puhědang, Iạ e mạdiri mẹ̌pandung kakahiorọ i sire e makitul᷊ung; dingangu manilaing i sire e maněmbang sasěmba tẹ̌tutungang dingangu gandung si Siạ e, Iạ e tawẹ dal᷊uase ringang i sire e. Katewe, Iạ e sarung měngěnsue si sire e kahian sekẹ, karal᷊unusẹ̌ dingangu sahindạ.”

¹³Bọu e iạ mẹ̌bera, ”O MAWU, Kụ Limembong Karangetange, i Kau e masingkạ u manga nabi kụ seng nẹ̌bera su kawanua u sarung tawẹ apa pẹ̌sasekẹ, arau karal᷊unusẹ̌, ual᷊ingu i Kau e seng nẹ̌diandi u su wanua ini e hanesẹ̌ sarung piạ pẹ̌darame.”

¹⁴Kaiso MAWU e simimbang, ”Manga nabi e kai němpẹ̌bawa habarẹ̌ konti su ral᷊ungu areng-Ku e; Iạ e tawe měndolohi sire e, ringangu tawe lai mẹ̌parenta arau mẹ̌bisaran sire e. Kal᷊awọu papasilo apaʼm bẹ̌běkeěng i sire e wal᷊inewe wọu anu-Ku; i sire e měmpạněbal᷊u kal᷊awọu hal᷊ẹ̌ tawẹ gunane kụ lẹ̌langinang i sire hala e.

¹⁵I sire e něbera su areng-Ku u wanua ini e tawe sarung hombangengu sekẹ arau karal᷊unusẹ̌ e, sumbal᷊iau Iạ e tawe něngoro si sire e pẹ̌bẹ̌berang ene e. Iạ e MAWU, něhabarẹ̌ si kamene, Yeremia, apa sarung Takụ koateng dingangu manga nabi kụ tawe Takụ nirolohẹ̌ e. Iạ e sarung měmate si sire kahian sekẹ dingangu karal᷊unusẹ̌.

¹⁶Apan taumata kụ seng němpěnarimạu manga těbal᷊i sire ene mal᷊ain sarung pateěng ringangu kakakoạ e mẹ̌sul᷊ung. Maieti sire e sarung i rěmmẹ su manga ral᷊eng su Yerusalem kụ tawẹ měndal᷊ěbinge. Kerene kakakoạ i sire e ringangu manga anạ kawing i sire e. I sire e sarung Takụ apẹ̌pěndang něnggạu karal᷊amuhụ i sire e.”

¹⁷MAWU e něngoro si siạ apělẹ̌habaru susa naungku su manga umatʼE. Iạ e harusẹ̌ mẹ̌bera kere ini, ”Balạekere sasangịku e manịen tawẹ irul᷊ene, ěllo hěbi e tụtul᷊aehẹ̌ akẹ u mata e. U bansa-Ku e něngkal᷊esẹ marasai kụ enẹewe masigěsạ.

¹⁸Kereu iạ e sarang lantang, takụ i kasilo manga maietu wihuaʼm pẹ̌seketang. Su ral᷊ungu manga soa takụ i kasilo sigěsạu, taumata maraniʼm mateʼng karal᷊unusẹ̌. Nabi ringangu imang e mẹ̌děndal᷊engu munaran sire e, tawe makal᷊ahěngang měnsang apa kẹ̌koateng i sire e.”[9]

¹⁹MAWU! Man seng tinokol᷊ʼU e kahěngang tau Yehuda e ringangu kinawěnsingʼU e tumanạ u Sion? Unụ e kaihạ e niwěbahʼU e i kami hakịu i kami e seng tawe saụ napia? Tawẹ gunane lai si kami e mẹ̌deạ pẹ̌darame, tawẹ gunane i kami e měharapẹ̌ kal᷊aul᷊e, u piạ e kětạeweng kal᷊ahěgisẹ̌ e.

²⁰MAWU! Su těngo-Nu e i kami seng nẹ̌dosa. I kami e mangakun dosang kami e hala ringangu rosang manga i upung i kami.

²¹Pẹ̌tahěndungko riandi-Nu e, kumbahangbe i kami e i pakahina-Nu; riandi-Nu e ringang i kami e kumbahangbe lukaěngʼU. Yerusalem tampạu kal᷊aianengʼU e mawantugẹ̌, kumbahangbe i pakahina-Nu.

²²Manga mahang duatang kal᷊awọu wansa e tawe makakarasehu tahiti su dunia. Langị e mal᷊aing tawe wotonge mapakarasehu tahiti ringangu kawasane hala e. Tumbạeweng i Kau e lěharapeng i kami. I Kau e nakakoạ kěbị ene e nariadi.