Read Sangir YEREMIA 15 Bible Online

YEREMIA 15 - Sangir bible

YEREMIA 15

¹ MAWU e něhengetang si siạ, ”Iạ e tawe sarung kuměndagu wansa ini manilaing i Musa ringangu i Samuel rụdarisị sini e waugu mẹ̌gausẹ̌ kakěndagẹ̌-Ku waugi sire. Dolohẹ̌ko wansa ini e pakapul᷊ẹ, Iạ e mạdiri makasilo si sire!

² Kereu i sire e makiwal᷊o si kau, kai nakoạ sarang apa i sire e, sasimbahe kere ini, ’MAWU e nẹ̌bera, i saing tinantu kụ mate ual᷊ingu sakị e walạete i sie kapapatenen sakị. I sain tinantu kụ mate su pẹ̌seketang balạete i sie kapapatene su pẹ̌seketang. I sain tinantu waugu maten lunusẹ̌ e walạete i sie e kapapatenen lunusẹ̌ e! I sain tinantu waugu tawengang, walạetewe i sie pakitaweng!’

³Iạ e MAWU, kụ seng něnantung papahang ěpạ kụ makạtatakụ e sarung mariadi si sire e: i sire e sarung mawihua su ral᷊ungu pẹ̌seketang, maieti sire e sarung bawulungang u asu, kinasengu manụ u winalangeng, dingangu ěnsueěngu binatang dul᷊u.

⁴ Iạ e sarung mapakariading kal᷊awọu wansa su dunia e, měngkawintogẹ̌ makasilo si sire e. Patikụ ene kinoạ-Ku e ual᷊ingu pẹ̌kakoạ i Manasye ahusi Hizkia su Yerusalem, piạ i sie nakoạ datung Yehuda e.”

⁵MAWU e něhengetang, ”Ei tumanạ u Yerusalem, i sai sarung kuměndagi kamene tangu? I sai lai masusa naunge ringang i kamene? I sai mapulu motong makiwal᷊ong kakakoạ i kamene?

⁶I kamene seng něnuhudu Iạ dingangu naněntang u Iạ, ual᷊ingu ene tangu Takụ tẹ̌deng takiahẹ̌-Ku e i pěhempung si kamene, u Iạ e seng nasaheng kamene měnẹ̌nahang pědu-Ku.[10]

⁷Suapan soa su wanua ini i kamene sarung Takụ i rěmmẹ kere kalung ěmme. Manilaing i kamene e kai umatẹ̌-Ku e kai Iạ e sarung mapakawinasang kamene ringangu manga anạ i kamene ual᷊ingu i kamene e mạdiri měmal᷊ui kakaoạu pẹ̌bawiahi kamene e.

⁸Banuang kamene e sarung mapenẹ u apaʼm bal᷊u, limembo wọu kal᷊awọu ěne su apeng. Taumata e sarung Takụ pateěng su tempong kangangudạ e hakịu i ninang i sire e lumahunsusa. Su tempong ěllo e Takụ i aparěnta suanun sire e sěngkatau měmaminasa hakịu i sire e měngkatakụ dingangu rěnděnganeng.

⁹Sěngkatau marehokang kụ kinailangengu ahuse esẹ pitung katau e napinsang ual᷊ingu sasindakenge masěsẹ. Ělloʼm pẹ̌bawiahe seng nasunaubẹ̌, i sie makạpěndang lẹ̌heghesang dingangu tẹ̌tahumeang. Manga sědụ i kamene e Takụ i oro pěmate apaʼm bědang biahẹ̌ su tal᷊oarang kamene e. Iạ e MAWU, kụ seng něhengetang.”

¹⁰Mambeng kasoe iạ ini e! Kai waugu apa i ninangku e něhěndingu iạ? Dingangu apan taumata su wanua ini e iạ harusẹ̌ mẹ̌bul᷊o ringangu mẹ̌darendehẹ̌. Manilaing iạ e wědang tawẹ piněngẹ̌dangeng arau nẹ̌ngědang e, kaiso iạ e kawe aneěngu patikụ taumata.

¹¹MAWU, kereu iạ mambeng tawe mẹ̌koạ hal᷊ẹ̌ku e pakapia, ringangu tawe tumatawang manga sědụku e su těngo-Nu su tempong i sire e makahombang sigěsạ dingangu susa e, walạe kere laaneʼn sire ene e mamben těngadẹ̌ mariadi. (

¹²Tawẹ u sarang sěngkatau kụ makapědi uase, něngalembo katewe uase wọu sěmběkan sawěnahẹ̌ kụ seng nilaukangu tambaga.)

¹³MAWU e nẹ̌bera si siạ, ”Iạ e sarung měndingọu rumarokạ i pěhuwo kakakalạ dingangu arětạ u umatẹ̌-Ku e, kere papahang ual᷊ingu kal᷊awọu rosa kụ seng kinoạ i sire su kạsělahu wanua.

¹⁴Su wanua raghị kụ ta kinahěnganeng i sire e, Iạ e sarung mapakariadin sire e ěllangu manga rumarokạ i sire, u pědu-Ku e seng timompẹ kere putung nẹ̌daraẹ kụ sen tawe mapurạ.”

¹⁵Bọu e iạ nẹ̌bera, ”MAWU, i Kau e nakaěnna. Pẹ̌tahěndungko, ringangu tul᷊ungko iạ. Bal᷊iseko i sire kụ měnẹ̌nahusu ringangu měnẹ̌nẹ̌dạ si siạ. Abe tumanịu kasasabarẹ̌ si sire e hakịu i sire e makapěmate si siạ. Pẹ̌tahěndungko u kai ual᷊ingu i Kau e iạ nihinakaneng.

¹⁶I Kau e nẹ̌bisarang iạ, dingangu iạ e rụdaringihẹ̌ apaʼm bawera-Nu. Iạ e tataghuanengʼU, o MAWU Ruata Kụ Limembong Kawasa, ual᷊ingu ene kal᷊awọu wawera-Nu e makạl᷊uasẹ̌ dingangu makạl᷊unsemahẹ̌ si siạ e.

¹⁷Iạ e tawe tumatol᷊e mẹ̌daral᷊uasẹ̌ dingangi sire kụ mẹ̌tẹ̌tampung měmpẹ̌tatal᷊ewa. Ual᷊ingu tụtuhụ si Kau e, tangu iạ e nẹ̌těngkahae sẹ̌saku, dingangkeng pěndangu ral᷊angehẹ̌.

¹⁸Unụewe iạ e měngkai masigěsạ? Unụ e lesẹku e měngkai masaria ringangu tawe mapapia? Měnsang kapulu-Nu e kai mapakakewạ u iạ e kere sal᷊ụ kụ namara su musungu něhangu?”

¹⁹MAWU e simimbahẹ̌, ”Kereu i kau e mẹ̌sul᷊e, Iạ e sarung měnarimạ i kau. I kau e sarung makoạ ěllang-Ku e kạpia. Kereu i kau e měhabaru kal᷊awọu apang piạ gunane, ringangu wal᷊inewe wisara konti, tangu i kau e wotonge makoạ nabi-Ku e kạpia. Taumata e sarung mahunděnta su anunu e kạpia, dingangu tawahal᷊uasu i kau e makoạ sarang anun sire e.

²⁰I kau e sarung Takụ i pakariadi kere těndạ bọu tambaga laụ u timběha waugi sire e. I sire e sarung sumekẹ si kau, kaiso tawe makawatạ si kau. Iạ e sarung maněntanudẹ̌ dingangu měngambang si kau.

²¹Iạ e sarung měměllọ i kau e wọu kawasang kal᷊awọu taumata ral᷊akisẹ̌ e kụ matatingkaị. Iạ e MAWU, kụ seng nẹ̌bisara.”