Read Sangir YEREMIA 16 Bible Online

YEREMIA 16 - Sangir bible

YEREMIA 16

¹MAWU e nẹ̌bisara kapia ringangku, angkuěngʼE,

²”Kumbahang mẹ̌kawing kụ makaěbạ anạ su tampạ ini.

³I kau e kai Takụ pěhabarengu apang kụ mariadi su apang manga rariọ kụ i pěhanạ sini, ringangu manga ghaghurang i sire.

⁴I sire sarung mate těmboěngu sakị makawawa papate, dingangu i sire e sarung mawihua su ral᷊ungu pẹ̌seketang arau mateng kal᷊unusang. Tawẹ u sarang sěngkatau kụ měmpẹ̌kiạ arau měmpělěbing i sire. Maieti sire e sarung makeke kere pupukẹ̌ su ěntana, dingangu kinasengu manụ u winalangeng ore lai binatang dul᷊u.

⁵Kumbahang makoạ sarang bal᷊en taumata nikasusaěng, e Yeremia. Kumbahang mělutun sai-sai. Iạ e tawe měngal᷊amatẹ̌ umatẹ̌-Ku relain dingangu kasasorogạ dingangu wal᷊inewe lai manodẹ u pěndangu tumal᷊ěntụ arau lai kuměndagi sire e.

⁶Tau kalạ dingangu tau kasiange su wanua ini sarung mate kụ tawẹ u mělěbing si sire. Tawẹ u sarang sěngkatau kụ manịgěsạ batangenge arau mělungguhẹ̌ těmbọ e kere tatialang mělutu waugi sire e.

⁷Tawẹu lai mapulu mẹ̌koạ tatarimakasẹ baugu měhiborẹ̌ taumata lụl᷊ahunsusa e. Tawẹu lai mapulu mělutu ringang saranglai ringangu taumata kụ kinapateěngi amange arau i ninange.

⁸Kumbahang sumuẹ̌ su wal᷊en taumata kụ kạpẹ̌sẹ̌sal᷊iwange. Abe kaěng dingangu měnginung dingang i sire e.

⁹ Daringihẹ̌ko apan Takụ i pěhengetang si kamene wọu Iạ e MAWU Kụ Limembong Kawasa, Ruatang Israel. Tingihu ral᷊uasẹ̌ dingangu ral᷊iagẹ̌ ore karameng sal᷊iwang u kawing sarung Takụ i ědo kěbị. Hal᷊ẹ̌ ene sarung sahidiangu taumata apang něbiahẹ̌ su tempo ene.

¹⁰Kereu i kau e měhabaru kěbị ini e si sire, aramanung i sire e sarung makiwal᷊o kawe unụ e Iạ mapulu měhukung i sire e kereng kahěgise. I sire sarung makiwal᷊o apa pẹ̌sasal᷊a ringangu rosan sire e si Siạ, MAWU Ruatan sire e.

¹¹Paul᷊ịko si sire u Iạ e něhengetang kirini, ’I upung i kamene e seng naněntang u Iạ mẹ̌deạu maněmba ringangu mẹ̌tahamawu su manga ruata wal᷊ine. I sire e tawẹ pandungange si Siạ dingangu tawe mapulu tumuhụ kal᷊awọu tiaha-Ku.

¹²Arawe i kamene e kai mẹ̌koạ limembong karal᷊akise lai. Těmbọ i kamene e mambeng makakětị kụ kětạeng tụtol᷊e kapulung kamene ral᷊akisẹ̌ e. I kamene tawe mapulu tumuhụ si Siạ.

¹³Ual᷊ingu ene i kamene e sarung Takụ i tokol᷊ẹ̌ bọu wanua ini dingangu Takụ irěmmẹ sarang banua sěmbaụ kụ bědang tawẹ kinanarangeng i kamene ringangu su manga i upung i kamene. Paị sene i kamene e sarung měmpẹ̌tahamawu ěllo hěbi su manga ruata wal᷊ine, ringangu Iạ e sarung kuměndagi kamene.’ ”

¹⁴MAWU e něhengetang, ”Sarung marěnta tempone taumata e sen tawe lai mẹ̌salu waugu Iạ, Duata kụ biahẹ̌, kụ naněbangu tau Israel bọu Misirẹ̌,

¹⁵kaiso waugu Iạ e, Ruata kụ biahẹ̌, kụ nẹ̌bawa umatu Israel niapasěbang bọu wanua sěmbaụ su sěmběkan sawěnahẹ̌ dingangu wọu kěbị banua wal᷊ine su apang i sire e sen Takụ pinẹ̌kal᷊iaesẹ̌. I sire e sarung Takụ iwawa kạpia sarang banuang i sire hala e, banua e sen Takụ nighěllị su manga i upung i sire e.”

¹⁶MAWU e něhengetang, ”Iạ e hědo mẹ̌kui samehẹ̌ e pakal᷊awọ apěnamẹ si sire ini. Bọu ene Iạ e hědo mẹ̌kui tahapěnganụ pakal᷊awọ i pěnganụ si sire su apaʼm bul᷊ude, ringangu manga wěntihe, ringangu manga liangu wukidẹ̌ batu.

¹⁷Iạ e makạsilo kal᷊awọu apang kẹ̌koateng i sire e. Tawẹ apa kụ deng kạbawuni si Siạ e; kal᷊awọu manga rosan sire e mal᷊ain seng Takụ kinasilo.

¹⁸Dosa ringangu karal᷊akisi sire e sarung Takụ bal᷊isang dingangu papahang duang katimpal᷊ẹ̌, batụu i sire e kai seng nakal᷊amuhụ banua-Ku ringangu kal᷊awọu mahang duata kụ tawẹ niawane kere kasuang.”

¹⁹MAWU, i Kau e něnirung si siạ dingangu něngonggọu katoghasẹ̌ si siạ; i Kau e nẹ̌tul᷊ungu iạ su tempong kasasigěsạ. Apaʼm bansa e wọu pondol᷊u dunia e sarung měmpẹ̌děnta su anu-Nu e kụ mẹ̌berau, ”I upung i kami e kětạeng mạnaghuang duata konti kụ mamben tawẹ gunane.

²⁰Botonge ngae taumata e mẹ̌koạ duatane sẹ̌sane? Tantu tala wue! Nikoạ e ene e nal᷊ahẹu wal᷊inewe Ruata.”

²¹”Ual᷊ingu ene,” angkuěngu MAWU, ”sěnsul᷊e ini e Iạ sarung mapakariading manga wansa e makapěndang kawasa e ringangu katoghasẹ̌-Ku tadeạu sarang marěngụ-děngụ i sire e sarung masingkạ u kai Iạ e MAWU.”