Read Sangir YEREMIA 17 Bible Online

YEREMIA 17 - Sangir bible

YEREMIA 17

¹MAWU e něhengetang, ”Ei tau Yehuda e, dosang kamene e seng naketạ su naung i kamene e ringangu su patikụ manga wukung pananěmbaěng i kamene ringangu pena uase kụ horone pena wọu intang.

²Taumatanu e měmpẹ̌tẹ̌tahamawu su manga pananěmbaěng dingangu manga rihing awẹ kụ seng nirarisị baugu mahang duata wawine i Asyera su apang kakaluang kụ mal᷊ahěbung, su manga pusigu wukide,

³ringangu su manga wul᷊ude su l᷊ikudu manga soa. Ual᷊ingu kěbị tampạ pěnanal᷊eěng mahang duata e seng nipararisị i kamene e su kasěllahu wanua ringangu ual᷊ingu kal᷊awọu rosa kụ seng kinoạ i kamene e, tangú Iạ e sarung mapakariadiʼm manga rumarokạ si kamene e apěhengkẹ kal᷊awọu arětạ dingangu kakakalạ i kamene e.

⁴I kamene e sarung masihasa měnarakangu ěntana kụ sen Takụ nionggọ si kamene, ringangu Iạ e sarung mapakariading kamene e mẹ̌karạdiahang baugu manga sědụ i kamene e su wanua kụ mamben tawe nikạnarangeng i kamene e. Iạ e nẹ̌koạ kěbị ene e ual᷊ingu pědu-Ku e seng timompẹ kere putung dụděllị kụ tawe kasěbuang.”

⁵MAWU e něhengetang, ”Kereu taumata e maněntangu Iạ, Mawune, ringangu měharapẹ̌ su taumata, mase mạngumbala su katoghase, tangu Iạ e sarung měhukung i sie.

⁶Iạ e mẹ̌sul᷊ungu sasuang kụ timuwo su wimbaenge, su ěntana mahusụ, mal᷊ingungu, mapěhadẹ̌, kụ tawẹ běke reng makoạ mapia.

⁷Arawe taumata kụ mělẹ̌harapẹ̌ si Siạ e sarungbe Takụ al᷊amateng sěntiniạ.

⁸ I sie e al᷊ingkai kalu su wiwihu sal᷊ụ lụelehẹ̌ e; kụ hamụ e timondo sarang akẹ. I sie tawe matatakụ u musungu měhangu, apan daukalune měngkate hanesẹ̌ ido. Manilaing banua e i pěmarane, kai i sie e tawe ghumaghěnggang watụ u i sie e měngkate hanesẹ̌ mẹ̌bẹ̌bua.

⁹Naungu taumata e tawe kal᷊ahěnganeng, něngalembong kapapentese wọu kěbị e ringangu něngalembong matědụ sakị e.

¹⁰ Iạ e kai MAWU, měnẹ̌něsui naung, ěndumangu taumata e Takụ bẹ̌banikateng. Apan taumata e sarung Takụ bal᷊isang tuhụ lulune ringangu Takụ koateng kerẹewe kakanoạ e.”

¹¹Al᷊ingkai manụ u winalangeng měngẹ̌ngighangu wal᷊inewe těluhe, kerene taumata kụ mạeng tạ katul᷊ide, kụ makahombang arětạ. Su tempong umure maloara e i sie sarung kailangengu kěbị arětạ e. Su pěngěnsueěngu wiahe nal᷊ahẹ u i sie e kai taumata longong kahěngang.

¹²Bal᷊eng MAWUNG kitẹ e mẹ̌sul᷊ungu kal᷊aianeng mawantugẹ̌ e, su wul᷊ude kụ marangẹ den dokeng kal᷊imona e.

¹³MAWU, seng i Kau e lẹ̌harapengu Israelẹ̌ e umatʼU, kěbị apang naněntang i Kau e sarung měngkamea. I sire sarung matadise wọu runia ini kụ makoạ sarang dunian tau nate. Watụ u, i Kau e kai simbul᷊u pẹ̌bawiahẹ̌ kụ seng nitěntang i sire e, o MAWU.

¹⁴MAWU, apakaul᷊eko iạ, tangu iạ e sarung mahuweka. Ambangeko iạ, kụ iạ e masal᷊amatẹ̌. Samatang i Kau e takụ bẹ̌bantugang!

¹⁵Taumata e mẹ̌bẹ̌bera si siạ, ”Kai suapa kěbị papatakụ u MAWU ene? Balạete pakariadi ini e!”

¹⁶Kaiso, MAWU! tawẹ běke kụ iạ e reng měnahonsang tadeạu i Kau e reng mapakarěntan silakạ e si sire. Iạ e tawẹ apa ěnningku e tadeạu i sire e kahinoěngu kasasoe. I Kau e masingkạ u ene, MAWU! I Kau e masingkạ u apan takụ niwera.

¹⁷Kumbahangbe i Kau makoạ sěmbaụ kụ makakatakụ naungku e. I Kau e pẹ̌kakěllungangku kamagengu karěntaěngu kasasigěsạ.

¹⁸Karimạko apang měnẹ̌nahusu ringangu mạnědạ si siạ e, i pakamea-Nu ringangu i pakapinunụʼU ringangu katatakụ. Kaiso kumbahangbe mẹ̌koạ kerene si siạ e, MAWU! Aparěntạ e sawěda si sire sarang i sire e měngkawihua tạ ampunge.

¹⁹MAWU e nẹ̌bera si siạ, ”Yeremia, kakoạko sarang Tukadu Pasěllangengu Kawanua kụ lẹ̌liuangu manga ratun Yehuda kereu i sire e masěbang arau masuẹ̌ u soa e. Kakoạko l᷊ai sarang patikụ tukadu pasěllangeng bal᷊ine e su Yerusalem.

²⁰Habarẹ̌ko tatanata-Ku e su manga ratu ringangu patikụ taumatang Yehuda e ore lai kal᷊awọu tumanạu Yerusalem kụ masahe su manga tukadẹ̌ ene.

²¹ Pẹ̌berạ e kirini: ’Kereu i kamene tawe mapulu mate, ute kumbahang i kamene měhengkẹ apal᷊iwụ su ěllon Sabatẹ̌, arau mapasuẹ̌u ene wọu manga tukadu pasěllangengu Yerusalem.

²² Kumbahang měhal᷊ẹ̌ arau mapasěbangu apal᷊iwụ baẹbe a wọu wal᷊enu su ěllon Sabatẹ̌. Taniko ěllo ene waugu Iạ kerẹewe sen Takụ nioro su manga i upung i kamene.

²³Arawe manga i upung i kamene e mạdiri rumaringihẹ̌ arau měnaung apang kụ Takụ niwera. I sire e makakětị těmbọ i sire e, dingangu mạdiri tumuhụ arau tẹ̌guang.

²⁴Tuhukeko kal᷊awọu laoro-Ku. Kumbahang měhengkẹ apal᷊iwụ baewe a wọu tukadu pasěllangeng u soa ini su Ěllon Sabatẹ̌. Taniko, ěllon Sabatẹ̌ e waugu Iạ, dingangu kumbahang mẹ̌koạ manga apa su ěllo ene.

²⁵Kereu i kamene e kahěnga-hěngang měndal᷊engu manga parenta-Ku ene, tangu apan datu e ringangu apang mapapangkatẹ̌ kụ mẹ̌pẹ̌parenta kere i Daud sarung sumuẹ̌ manga pasěllangengu soang Yerusalem. I sire ringangu tau Yehuda dingangu tumanạ u Yerusalem, sarung mahunsake kareta kawal᷊o hakịu soang Yerusalem nakoạ marame kahěngang.

²⁶Taumata kụ sarung duměnta wọu manga soang Yehuda e, ringangu manga weọ e mạngělikụ Yerusalem; i sire sarung duměnta wọu ěntanang Benyamin, bọu pentọu manga wul᷊ude, ringangu wawul᷊urange, ringangu wọu Yehuda watuhu sěmběkan timuhẹ̌. I sire e sarung mempẹ̌bawa manga binatang sasěmba sarang Bal᷊e-Ku, baewe gunan tongkateng, arau lai tala, dingangu lai gandung sasěmba, ringangu kamania, ore lai sasěmba tatarimakasẹ.

²⁷Kěbị ene sarung mariadi kereu i kamene e mararingihẹ̌ si Siạ dingangu maněntani ěllon Sabatẹ̌ e waugu Iạ. Kumbahang měhengkẹ baewe apal᷊iwụ a lumiu manga tukadu pasěllangengu Yerusalem su ěllo ene. Kereu i kamene e lumampa manga tita-Ku ene e, manga tukadu pasěllangengu Yerusalem dingangu manga istanane Takụ pakasue tutungang kụ putung ene e tawe kasěbuang.’ ”