Read Sangir YEREMIA 18 Bible Online

YEREMIA 18 - Sangir bible

YEREMIA 18

¹MAWU e něhengetang si siạ,

²”Dakọ e sarang bal᷊eng tau tahakoạ kuring; paịsene hědon Takụ pěhabarengu tatanata-Ku e si kau.”

³Tangu tamaị e Iạ e sarang bal᷊en tau tahakoạ kuring kụ kinasilo-Ku e i sie kapělẹ̌hal᷊ẹ̌ e mělẹ̌limbolong.

⁴Kereu kuring kụ deng kẹ̌koatenge ene tawe nạsuhụ, ute i sie saụ makoạ kapia mẹ̌koạ kuring bal᷊ine matuhụ kere su ikẹ̌kapulune.

⁵Mase MAWU e něngoro si siạ apẹ̌bẹ̌bera su tau Israel,

⁶”Ei manga umatẹ̌-Ku e, tumanịu wue Iạ e tawe makakoạ manga apa si kau kerẹewe nịkakoạu tahakoạ kuringe ringangu ěntanane masipul᷊ụ e tangu? Mẹ̌sul᷊ungu ěntana masipul᷊ụ su l᷊iman tau tahakoạ kuring, kerene lai i kamene su ral᷊ungu lima-Ku.

⁷Kereu su sěnsul᷊e tempo Iạ e měmutusu waugu pěmul᷊aho, pělengge ringangu pěnggolang bansa sěmbaụ arau kararatuang e,

⁸bọu ene kawanua ene němpẹ̌tobatẹ̌ bọu rosan sire e, kụ Iạ e hědo měmetọ u karaki-Ku ene.

⁹Su sěmbẹ̌kane, kereu Iạ e měmutusu waugu měndarisị arau mapakatoghasu kawanua arau kararatuang sěmbaụ e,

¹⁰kaiso wọu ene kawanua ene tawe rumaringihẹ̌ Siạ e bọu ene mẹ̌koạbe apan dal᷊akisẹ̌ e, tangu karaki-Ku ene e sarung Takụ petokang.”

¹¹MAWU e nẹ̌bera si siạ, ”Ini e, pẹ̌berako su tau Yehuda ringangu tumanạu Yerusalem, u Iạ e kạpẹ̌kẹ̌koạ e karakiʼn dumokạ si sire, dingangu měndiahing hukumang baugi sire e. Apěngědongkong kakakoạ u pẹ̌bawiahi sire warạdosa ene, ringangu pěmal᷊uikong lulu ringangu kakanoạ i sire e.

¹²Kaiso i sire e sarung sumimbahẹ̌, ’Apa wue gunane? I kami e těbewe tumol᷊e kapulung kami e hala! I kami e sěngkatau-sěngkatau e sarung mẹ̌koạ kapulun dal᷊ungu naung i kami e ral᷊akisẹ̌ e!’ ”

¹³MAWU e nẹ̌bera, ”Pakiwal᷊oko suapaʼm bansa e měnsang bọu nariadi hal᷊ẹ̌ kere ini. Tau Israelẹ̌ e seng nẹ̌koạ hal᷊ẹ̌ sěmbaụ makạtatakụ!

¹⁴Den tawẹ nạdiadi kal᷊imbatun tahiti e maghěngging bọu wul᷊ude watu su Libanon. Tawẹ be nạdiadi kụ akẹ matilang kụ melehẹ̌ su wawul᷊urange kụ mamara e.

¹⁵Arawe umatẹ̌-Ku e seng niwul᷊eng Iạ, kụ něnutung buwụ baugu mahang duata. I sire e nitangga su ral᷊eng nạung kal᷊imona-mona e hinong liuang i sire e, bọu ene mělenga sarang dal᷊eng kụ den tawe nitẹ̌tene e.

¹⁶Wanua ini e seng nikoạ i sire e tampạ kụ makạtatakụ, dingangu sarang karěngụ e makoạ laheghesang. Kěbị apang mạhul᷊iu e sarung mahungkiling u těmbọ i sire e, makạpěndang katatakụ.

¹⁷Kerẹwe awul᷊ẹ̌ tiukangu anging daki, kerene lai taumata-Ku e sarung Takụ i pẹ̌sawuhẹ̌ su těngon manga rumarokạ e. Kereu silakạ marěnta e, Iạ e sarung tumal᷊ikudẹ̌ si sire kụ tawe mẹ̌tul᷊ung i sire e!”

¹⁸Taumata e mẹ̌bẹ̌bera, ”Mahịe i kitẹ e mẹ̌buntuang dumokạ si Yeremia. Bal᷊inewe kětạeng i sie wotonge mẹ̌bisara waugu Mawu e. Mang hanesẹ̌ sarung piạ imang kụ makaonggọu sasal᷊ěntihọ, piạ taumata pelesa kụ makaonggọu sasasa; ringangu piạ nabi kụ makahabaru kal᷊awọu tatanataʼm Mawu Ruata e si kitẹ. Bọete i kitẹ e mẹ̌kạbaratang i sie su pěnggaghutaěng dingangu sen tawe lai rumaringihẹ̌ kal᷊awọu manga wawerane.”

¹⁹Tangu iạ e nẹ̌kal᷊iomaneng, ”MAWU, daringihẹ̌ko kakal᷊iomanengku e; naungeko apang kụ niweran sědụku e mạanung iạ e!

²⁰Nihino ngae mapia e wal᷊isangu ral᷊akisẹ̌ e? Arawe i sire e sen němpěmangka lohange tadeạu iạ e mataho su ral᷊unge. Pẹ̌tahěndung bue u iạ e sen timatawang si sire e su těngo-Nu, tadeạu i Kau e kumbahangbe mẹ̌pědu si sire.

²¹Arawe orasẹ̌ ini e, MAWU, walạekere manga anạ i sire e kapapateneng lunusẹ̌ e arau mawihua su pẹ̌seketang. Balạekere apang manga wawinen sire e kailangengu kawing i sire e ringangu anạ; balạekere apang manga esẹ e mate kahian sahindạ e ringangu mangangudạ e mapinsul᷊ẹ̌ singongone su ral᷊ungu paraěng.

²²Dolohẹ̌ko tahapěhampasẹ̌ e parěnta sěngkělěndịe sarang bal᷊en sire e, hakịu i sire e mahuheọu katatakụ. I sire e seng němpěmangka lohange tadeạu iạ e manawo su ral᷊unge, dingangu i sire e seng nẹ̌taingu sedẹ i pěnamẹ si siạ e.

²³Kaiso i Kau e, MAWU, masingkạ u kěbị apang kẹ̌karakiang i sire e waugu měngěnsue singongoku. Ual᷊ingu ene e, kumbahangbe mẹ̌gěllị u ampung si sire; kumbahangbe měndẹ̌dasẹ̌ pẹ̌sasal᷊an sire e. Bẹ̌bahe i sire e sarang pakanawo. Pẹ̌koạ e si sire e su ral᷊ungu pẹ̌du-Nu e.”