Read Sangir YEREMIA 19 Bible Online

YEREMIA 19 - Sangir bible

YEREMIA 19

¹MAWU e něngoro si siạ tamai pẹ̌mělli wěnsadẹ̌, dingangu pěmẹ̌maringang těmbonangu kawanua e pirang katau ringangu manga imang maghaghurang pirang katau e,

² mẹ̌deạu tamai sěngkatamai ringang i sire sarang Bal᷊ang Hinom lumiung Tukadu Pasěllangengu Beling. Paị sene iạ e harusẹ̌ pěhabaru apang kụ nitanata-Ne si siạ e.

³Iạ e harusẹ̌ mẹ̌bera kere ini, ”Ei manga ratuʼn Yehuda, dingangu tumanạu Yerusalem! Daringihẹ̌ko apang kụ Iạ e MAWU Kụ Limembong Kawasa e, Ruatang Israel, kụ sarung i pẹ̌bera si kamene. Iạ e sarung maparěntang hombang masaria su tampạ ini e hakịu taumata apang makaringihẹ̌ e kai měmpěhěkosẹ̌.

⁴Hal᷊ẹ̌ ene Takụ nikoạ ual᷊ingu wansa ini e kai seng něněntangu Iạ. I sire kai seng němpělamuhụ tampạ ini ual᷊ingu němpẹ̌gěllịu sasěmba su mahang duata ta kinanarangeng e si sire, waugu manga i upung i sire e ringangu waugu manga ratung Yehuda. I sire e selaing něloho tampạ ini e ringangu rahang kal᷊awọu taumata apan tạ sal᷊ane.

⁵ I sire e němpěndarisị u pananěmbaěng baugu Baal, mẹ̌deạu měmpaněmbang manga anạ i sire e kere sasěmba tẹ̌tutungang, sumbal᷊iau Iạ e tawẹ pěngangoro si sire e pẹ̌kẹ̌koạ hal᷊ẹ̌ ene, ringangu tawẹ sarang sěnsul᷊ẹ hal᷊ẹ̌ kerene e kụ tụtimbul᷊ẹ̌ su ral᷊ungu naung-Ku.

⁶Ual᷊ingu ene, sarung duměnta tempone tampạ ini e sen tawe lai i sěbạ Tofet arau Wal᷊ang Hinom, kaiso kai Wal᷊ang Pělahataěng.

⁷Su tampạ ini e Iạ sarung tamapakasěhụ u patikụ karakin tau Yehuda ringangu tumanạu Yerusalem. I sire e sarung Takụ i pakawala pakiwatạ su rumarokạ si sire ringangu pakipate su pẹ̌seketang. Kasuang i sire e, Takụ i wala pakikinạ su manụ u winalangeng dingangu binatang bawahani.

⁸Iạ e kai maparěntang kasasigěsạ masaria su soa ini, sarangbe apan taumata sumahe sene e huměkosẹ̌ dingangu měngkatakụ.

⁹Sědụ e sarung měliwung soa ini kụ mědẹ̌deạ dal᷊engu měmate tumanạ e. Pěndal᷊iwung ene e mambeng masěgadẹ̌, hakịeweng kal᷊awọu taumata su ral᷊ungu soa ini e mẹ̌kẹ̌kakinạ lawọ sěhapikang, sarangkewe lai manga anạ i sire hala e.”

¹⁰Bọu ene MAWU e něngoro si siạ e piněměka wěnsadẹ̌ ene e su těngong kal᷊awọu taumata kụ tụtol᷊e si siạ.

¹¹Iạ e harusẹ̌ mẹ̌bera si sire u MAWU Kụ Limembong Kawasa e nẹ̌bera kere ini, ”Kawanua ringangu soa ini e sarung Takụ i pakagholang hakịu makoạ kere wěnsadẹ̌ kụ mạběka e kụ seng tawe maul᷊ị kạpia. Taumata e sarung měmpělěbingu manga maieti sire e su Tofet, ual᷊ingu selain tawẹ apa tampạu pěndal᷊ěbingang bal᷊ine.

¹²Soa ini ringangu tumanạ e sarung Takụ i pakariadi kere Tofet.

¹³Kěbị bal᷊e su Yerusalem, dingangu kěbị bal᷊eʼm manga ratung Yehuda e sarung makoạ mal᷊amuhụ kere Tofet; ual᷊ingu rasị su wowong manga atụ u wal᷊e[11] ene taumata e němpěnutung buwụ baugu manga mahang duataʼn langị, dingangu měmpaněmbang anggorẹ̌ e waugu manga mahang duata wal᷊ine e.”

¹⁴Bọu e iạ naněntangu Tofet, tampạ kụ iạ e nioro pělẹ̌habaru tatanataʼm MAWU. Iạ e nakoạ sarang dělahu Wal᷊eʼm MAWU kụ dimarisị sene, wọu ene měhabarẹ̌ su patikụ taumata,

¹⁵u MAWU Kụ Limembong Kawasa, Ruatang Israel, něbera kere ini, ”Ual᷊ingu i kamene e makakětị těmbọ e ringangu mạdiri rumaringihẹ̌ e, tangu Iạ e sarung maparěntang hombang kụ seng Takụ niol᷊ang baugu soa ini ringangu su patikụ beọ e mạngělikụ e.”