Read Sangir YEREMIA 2 Bible Online

YEREMIA 2 - Sangir bible

YEREMIA 2

¹MAWU e něndolohu iạ

²piněmohangu habarẹ̌ ini e, su kěbị tau Yerusalem, ”E Israel, sutahěndung-Ku e kerẹng kasatiane i kau e, těntal᷊ang i kau wědang mangudạ; kerẹeng kasariane tatal᷊ěntụu su tempọeng i kadua e su wul᷊ang matualagẹ̌. Iạ e sarang kěhu l᷊inggi e, tol᷊eěngu lumiu wanua kụ tawe sasuangeng.

³Israel, i kau e kai tataghuaneng-Ku hětubẹ̌, i tatuno naung-Ku tatal᷊ěntukang-Ku. Iạ e mapakahumagu sawěda su kěbị apang makạkadiading sigěsạ si kau, Iạ e kai MAWU, kụ seng něhengetang.”

⁴Daringihẹ̌ko tatananatang MAWU, ei kamene pal᷊ahiten Yakub, mangạe ghal᷊ipohong Israel!

⁵MAWU e něhengetang, ”Pẹ̌sasal᷊a we apa kinaěbakeng i upung i kamene si Siạ e, hakịu i sire e mẹ̌tul᷊angu Iạ e? I sire e měnẹ̌nahusu awẹ kụ tawẹ arěgane ringangu pěngěnsueěnge i sire hala e nakoạ dal᷊akisẹ̌.

⁶Iạ e tawe pinangindakaneng; Iạ e, seng bọu něngahạ si sire su ral᷊eng, ringangu nẹ̌bawa si sire siměbang bọu Misirẹ̌ simahe kěhu l᷊inggi, pẹ̌sěmpalang banua mahuěnne, ringangu matahigal᷊ụ, matěgang dingangu makasilakạ — kěhu tawẹ tumanạ e ringangu tawe karal᷊iuang!

⁷Sarang soa kụ mahuntawa e i sire Takụ niěntudẹ̌ mẹ̌deạ u makatemang apang něnggạ u munara e ringangu kal᷊awọu apang mapia paị sene. Kaiso paị sene ěntana-Ku e nilamuhukang i sire ringangu tataghuaneng-Ku e nipakakoạ i sire e makạdarěnting.

⁸Manga imang e tawẹ apa kụ deng makiwal᷊o, kai suapa Iạ, MAWUne. Apang mapakateing kạadilẹ̌ e mal᷊aing běga měnsang i sai Iạ, manga měngangawasa něnggohaeng su těngo-Ku. Su areng i Baal manga nabi e měmpẹ̌bisara ringangu měmpẹ̌suba mahang duata tawẹ gunane.”

⁹MAWU e něhengetang, ”Orasẹ̌ ini e, taumata-Ku kai saụ Takụ pěrkaraěng, dingangu pal᷊ahěntone e Takụ gutaěng.

¹⁰Pahunsělẹko su kanandung apengu Siprus sěmběkam bahẹ, dingọko taumata sarang sěmběkan daki sarang banuang Kedar, parikẹ̌saiko paị sene pakapia-pia měnsang piạ sul᷊ungu hal᷊ẹ̌ nariadi paị sene?

¹¹Bědangbe tawẹ běke kụ bansa sěmbaụ e něnal᷊iu ruatane manimbe ene e wal᷊inewe Ruata tutune. Arawe taumata-Ku e němpẹ̌luasẹ̌ batụu Iạ e kai nisal᷊iuaneng i sire e su apạ e kụ tawe makakoạ manga apa.

¹²Ual᷊ingu ene, ei manga langị, pěmpẹ̌ganuẹ̌ e! Pěmpẹ̌dal᷊inaụe ringangu pěmpẹ̌gěguhe!

¹³Umatẹ̌-Ku e kai němpẹ̌koạ dosa haghine rarua: i sire timal᷊ikudẹ̌ si Siạ, simbul᷊u akẹ mẹ̌gaghěllị pẹ̌bawiahẹ̌ baugu taumata e; i sire nẹ̌koạ baugu watangeng i sire tampạ u akẹ lěsụ kụ tawe makal᷊aěmung akene.”

¹⁴”Israelẹ̌ wal᷊inewe ěllang, bal᷊inewe lai pal᷊ahěntong ěllangku. Kaiso unụ e i sie seng nakoạ kinạ u manga rumarokạ e?

¹⁵Rumarokạ e lụhuang si sie kere singa, ěntanane niapakahusụ dingangu tawẹ lohone, manga soane nasue nikaěngu putung, niwala tawẹ tumanạ e.

¹⁶E Israel, utạ u těmbọu e nịdal᷊ěndasẹ̌ kareạ u tau Memfis dingangu Tahpanhes.

¹⁷Ual᷊ingu i kau sẹ̌sanu e kěbị e nariadi su watangengu, ual᷊ingu su tempong i kau e Takụ tataěng su raral᷊engang, i kau e tụtal᷊ikudẹ̌ si Siạ, MAWU Ruatanu.

¹⁸Kai apa untune i kau e sarang Misirẹ̌? Kai měnginung akẹ u Sal᷊ụ u Nil tangu? Kai apa untune i kau e sarang Asyur? Kai měnginung akẹ u Sal᷊ụ u Efrat?

¹⁹Karal᷊akị u hala e nakakahukung batangengu, i kau e nasịgěsạ ual᷊ingu tawe něnarimạ u Iạ e, Ruatanu. Orasẹ̌ ini e pẹ̌pěndangko u kai enẹ e kapaị e ringangu katědụ e kereu Iạ e tatal᷊ikudang ringangu tawe adatengu. Iạ e kai MAWU Ruatanu e kụ seng něhengetang; Iạ e kai MAWU Ruata Kụ Limembong Karangetange ringangu Limembong Makawasa.”

²⁰MAWU e něhengetang, ”Seng marěngụ i kau e tawe mapulu mẹ̌pandung si Siạ e; tawe mapulu tumuhụ arau mẹ̌suba si Siạ. Taraị su manga wěntihu wawul᷊udange, ringangu wawa su al᷊ungu manga kakaluang mal᷊ahěbung e i kau e mẹ̌sẹ̌suba manga mahang duata mapakạ tawang ěntana e.

²¹I kau e Takụ suangeng kere kalung anggorẹ̌ kụ Takụ pileng bọu wine kal᷊ěnggihange. Arawe orasẹ̌ ini e i kau nẹ̌bal᷊ui, nakoạ sasuang tawẹ gunane.

²²Manilaing i kau e měndenọ kụ měnạboěng pakal᷊awọ, kaiso lěngkụu pẹ̌sasal᷊anu e mang bědang i kasilo-Ku e lai.

²³Kawahanine i kau e nakawera u i kau e tawẹ tingkaị e, ringangu tawe tumatol᷊e su Baal! Tatingangke lulunu e su wal᷊ane, tahěndungeko karal᷊akisu ringangu akụ e! I kau e al᷊ingkai onta wawine kụ matamahuala e, tụtal᷊ang tamai ramahi tawẹ katatul᷊irang,

²⁴bọu e sumuẹ̌ su kěhu l᷊inggi mal᷊ingungu e. I sie tawe makal᷊aědal᷊ẹ̌ tamahualane. Kụ apạeweng lụěnning i sie e ta wahal᷊uasu reakeng, u su tempong mẹ̌tatimuhẹ̌ e, i sie e seng měnughighiʼm batangenge.

²⁵Israelẹ̌ e, i kau e kumbahang tumal᷊ang měnahusu manga mahang duata, dingangu kumbahangbe měmansagẹ̌ kumui si sire, u měntěhang laedu e kai mapeho ringangu tinggol᷊angu e kai mahangang kararou. ’Tala, iạ e sen tawe makawal᷊ị,’ i kau e nẹ̌bera, ’u iạ e kai seng kụkěndagu manga mahang duata e, ringangu mapulu tumol᷊e si sire.’ ”

²⁶MAWU e něhengetang, ”Kerẹewe tahatako nakapěndang namea, su tempong i sie kinasamẹ, kerene lai i kamene sarung makapěndang mamea, ei tau Israel, manga mararatu, ringangu manga ilase, manga imang, dingangu manga nabing kamene!

²⁷I kamene e sarung i pakamea e, batụu maning kalu sěmpědi kuiang i kamene i amang, dingangu maning batu sěmbaụ kuiang i kamene inang. I kamene e wal᷊inewe ruměnta su anu-Ku e, kaiso kawe měněntangu Iạ e. Arawe kụ kamageng su tempong sigěsakeng e, ute mang Iạ e kẹ̌kuiang i kamene waugu mapakasal᷊amati kamene.

²⁸Kawe suapa manga mahang duatang kamene nikoạ i kamene? Kereu su tempọeng kasasěsẹ e, kěnangko pakisal᷊amatẹ̌ si sire ene i kamene e, měnsang botonge! Ei Yehuda, kal᷊awọu mahang duatanu e ute kal᷊awọu soanu e!

²⁹Kai apa ta i luasi kamene si Siạ e sarangbe i kamene rumokạ si Siạ?

³⁰Tawẹ gunane Iạ měhukung si kamene, watụ u i kamene tawe mapulu měnarimạ u těgu. Kerẹ e singa měmpẹ̌ngalo e, kerene i kamene měmpěmate manga nabing kamene e.

³¹Ei tau Israel, daringihẹ̌ko manga wawera-Ku ini. Bọu ngae Iạ e nariadi kere kěhu l᷊inggi arau kere ěntana marěndung si kamene? Kawe unụ e i kamene nakapẹ̌bera u, i kamene mapulu mẹ̌těngkal᷊iu ringangu sen ta saụ mẹ̌bal᷊ị su anu-Ku?

³²Piạ mahuala mẹ̌timbul᷊eng dal᷊ěgahẹ̌, arau boroitẹ̌ bawine e kụ tamakatahěndung lakụ u kawinge? Arawe i kamene e seng marěngụ niwul᷊eng Iạ e — hakịu wọu tempo ene seng ta i karekeng karěngụ e.

³³I kamene mambeng pelesa měmpěngakal᷊ẹ̌, mẹ̌gausu makawirahi ral᷊ungu naungu manga i kẹ̌kěndagi kamene e. Bawine sundal᷊ẹ̌ seng nahěmpal᷊iu e mang bědang makạěndung bọi kamene e!

³⁴Pakeang i kamene e nakotoru rahang tau kasiang, dingangu taumata tạ sal᷊ane, bal᷊inewe ual᷊ingu rahan tahatako kụ kinasamẹ. Maningbe lai kerene,

³⁵i kamene nakapẹ̌bera u, i kamene e tawẹ sal᷊ane, dingangu Iạ e sen tawe saụ limangehẹ̌ si kamene. Kaiso Iạ e MAWU, kụ sarung měhukung i kamene e, ual᷊ingu i kamene e tawe mapulu měngakung pẹ̌sasal᷊ang kamene.

³⁶I kamene e měngkai apa mal᷊ahawesẹ̌ měmpedeạ manga mahang duataʼm bansa wal᷊ine e, waugu pẹ̌dorongang tul᷊umang! I kamene nal᷊ahẹ u sarung i pakasusan tau Misirẹ̌ kerẹewe lai i kamene ipakasusan tau Asyur.

³⁷I kamene sarung měněntangu Misirẹ̌ ual᷊ingu kimewạ dingangu namea. Iạ e kai MAWU, kụ seng něnuhudi sire kụ pạngumbalaěng i kamene e; i kamene sen tawe makapěngual᷊i kal᷊auntu walạewe měnsang apa wọi sire e.”