Read Sangir YEREMIA 20 Bible Online

YEREMIA 20 - Sangir bible

YEREMIA 20

¹Imang Pasyhur anạ i Imer e kai těmbonangu měndariagạ Bal᷊eʼm MAWU. Piạ i sie kụ nakaringihẹ̌ si siạ kụ něhabaru kěbị ene e,

²i sie nẹ̌parenta tadeạu iạ e luwageng dingangu wěntungang su Tukadu Pasěllangengu Benyamin, su pasěllangenge wowone rasị su Wal᷊eʼm MAWU.

³Sěngkarịěllone mal᷊ukadẹ̌ e, bọuteng i Pasyhur naměllọu iạ e wọu wěntung, iạ e nẹ̌bera si sie, ”Areng kụ sarung i onggọu MAWU e si kau wal᷊inewe Pasyhur kaiso kawe ’I papatakụ suapan tampạ’.

⁴MAWU e hala nẹ̌bera, ’I kau e sarung Takụ i pakakoạ papatakụ su watangengu hala e, ringangu waugu manga hapị u. I kau e sarung makasilo si sire nipateʼn sědụ i sire e. Patikụ tau Yehuda sarung Takụ i wala pakipẹ̌kawasai su ratum Babel; sěmbahageang bọi sire sarung hengketange kere tinaweng sarang Babel, dingangu lěmbene sarung pateěng.

⁵Sědụ i sire e sarung Takụ l᷊ai pěhampasẹ̌ dingangu pěhuwo kěbị kakakalạ su soa ini e sarang Babel, ore lai kal᷊awọu arětạ i sire e, sarang lai kal᷊awọu sạbarang pusakạ u manga ratung Yehuda.

⁶Ringangi kau, i Pasyhur, ringangu kal᷊awọu anạ u sěngkataunu e mal᷊aing sarung samekang dingangu hengketang sarang Babel. Paị sene i kau e sarung mate ringangu lẹ̌bingang; kerene lai kěbị hapị u kụ seng nakaringihẹ̌ kal᷊awọu kontinu e.’ ”

⁷MAWU, i Kau e něloke si siạ kụ iạ e seng kinal᷊okeěng. I Kau e limembong katoghase wọu iạ kụ seng napẹ̌samal᷊ẹ u e iạ. Iạ e lẹ̌heghesang u apan taumata, lẹ̌hinakaneng bọu mal᷊ukadẹ̌ sarang bawěllo.

⁸Suapạeweng iạ mẹ̌bẹ̌bisara e iạ e kai hinong mẹ̌mansagẹ̌ pakaihạ-ihạ, ”Katatingkaị! Sawěda!” MAWU, iạ e lẹ̌heghesang, dingangu lẹ̌hinakaneng tiniạ tempo, ual᷊ingu mělẹ̌habaru tatanata-Nu.

⁹Arawe kamagengu su ral᷊ungu naungku iạ e mẹ̌bera, ”Balạete MAWU sen takụ pẹ̌timbul᷊eěng kere, sen tawe mapulu iạ e mẹ̌bisara su ral᷊ungu arengʼE,” tangu tatanata-Nu e al᷊ingkai putung kụ nẹ̌tětuhẹ̌ su ral᷊ungu naung. Iạ e seng něnal᷊ukạ mẹ̌tingkědangu ene, kai kutẹu iạ e tawẹ kawasaku.

¹⁰I kẹ̌karingihẹ̌ e taumata e mẹ̌sẹ̌sasiang, kụ měnsang balạewe suapa, ”Katatakụ e nẹ̌tondaisẹ̌! Mahịe ul᷊ikang i sie su měngangawasa e!” Sarangl᷊ai su manga hapịku kantalẹ̌ e měngẹ̌ngampal᷊ẹ̌ kananawoku e. Angkuěng i sire e, ”Aramanung dingangu sasahionge, i sie e wotongewe i kawatạ, tadeạu wotongewe i kitẹ e měmal᷊isẹ̌ une e si sie.”

¹¹Arawe i Kau e o MAWU, su sěmběkaku; i Kau e matoghasẹ̌ o kawe lai mahuagatẹ̌. I sire e kụ měnẹ̌nahusu ringangu měnẹ̌nědạ si siạ sarung manawo, kụ tawẹ katoghase. I sire sarung měngkamea sarang marěngụ, kụ nagholangke kěbị karakin sire e. Kal᷊ahinan sire ene e sarung tẹ̌tahěndungang sěntiniạ e.

¹²Arawe, MAWU Kụ Limembong Kawasa e, dingangu kạadilẹ̌ e wẹ̌banikatengʼU e taumata; i Kau e masingkạ u naung dingangu tiněnnan taumata e. Ual᷊ingu ene e apakawalako iạ e makasilo si Kau e měmal᷊isẹ̌ karal᷊akisu sědụ e u kai si Kau e takụ i sarakang pěrkaraku e.

¹³Pẹ̌kantarị e waugu MAWU ringangu pẹ̌daloko si Sie, u i Sie kai mapakal᷊iun taumata kụ sẹ̌sẹ̌dakeng, bọu kawasan taumata duruhaka e.

¹⁴ Kakakutụ e ěllong piněhanakengku e! Balạ e pakihinakane tempong iạ e nipěhanạ i ninangku e.

¹⁵Kakakutụ e lai mẹ̌bawawa habarẹ̌ e kụ nakakariading amangku e enẹ e mal᷊uasẹ̌, piạ e nạung nihabarẹ̌ si sie, ”I kau e nakahombang sěngkatau ahusẹ̌!”

¹⁶Balạete i mẹ̌bawawa habarẹ̌ ene e mẹ̌sul᷊ungu manga soa kụ niapakagholangu MAWU e tawẹ sul᷊eng kakěndage. Balạete i sie nakaringihẹ̌ laheọu tědụ su tempong mal᷊ukadẹ̌ e, ringangu wansagu pẹ̌seketang e su tempong ěllo rangẹ.

¹⁷U i sie e tawe němate si siạ piạ iạ e wědang su ral᷊ungu gandongang, tadeạu iạ e tatapẹ̌be su gandongang i ninangku e ringangu pal᷊ahuanakenge si siạ e nakoạ kere kubul᷊ẹ̌.

¹⁸Kawe unụ e iạ e harusẹ̌ nipěhěnding e tangu? Tumbạeweng baugu masigěsạ e ringangu su kasasěsẹ? Dingangu tadeạu pẹ̌bawiahẹ̌ku e i apakal᷊iu samatang su ral᷊ungu kamamea?