Read Sangir YEREMIA 21 Bible Online

YEREMIA 21 - Sangir bible

YEREMIA 21

¹I Zedekia ratun Yehuda e něndolohu iạ e Imang Pasyhur anạ i Malkia, ringangu Imang i Zepanya anạ i Maaseya. I sie něndolohi sire pělẹ̌habaru rorong ini e si siạ,

² ”Pẹ̌dorongke pělal᷊ahẹ bọu MAWU e waugi kitẹ, u i Nebukadnesar datuʼm Babel dingangu wuntuange kapẹ̌liwunge soang kitẹ e. Aramanung MAWU e sarung mẹ̌koạ karal᷊inaụ baugi kitẹ e, ringangu měnihasa si Nebukadnesar mapakasohọu wuntuange.”

³Bọu e MAWU něhengetang si siạ, tangu iạ něngoro taumata apan nirolohẹ̌ ene

⁴pělẹ̌habarẹ̌ si Zedekia, u MAWU Ruatang Israel, nẹ̌bera kere ini, ”Zedekia, Iạ sarung měmatạ buntuangu kụ kapẹ̌sẹ̌sekẹ e rumokạ datuʼm Babel dingangu wuntuange. Manga aghidu sordadonu e sarung Takụ i pẹ̌papangěndụ su tal᷊oaran soa.

⁵Iạ sẹ̌saku e sarung sumekẹ si kamene ringangu kasarian toghasẹ̌ku e dingangu takinangu pẹ̌duku sụsahoka.

⁶Tumanạu soa ini e Takụ pateěng; baewe taumata arau lai binatang sarung maten sahindạ marasai.

⁷I kau ringangu apan sawohị u ringangu apan taumata kụ nal᷊iwirẹ̌ bọu pẹ̌sasekẹ, karal᷊unusẹ̌ dingangu sahindạ, kěbị e sarung Takụ i wala pakisamẹ su Ratu i Nebukadnesar dingangu kahiang manga sědụ kụ mapulu měmate si kau. I Nebukadnesar sarung měmate si kamene kěbị tawẹ ampunge ringangu tawẹ apa kạdiongeng kakěndage. Iạ e MAWU, kụ seng něhengetang.”

⁸Mase MAWU e něngoro si siạ pẹ̌bera kirini su umatʼE, ”Daringihẹ̌ko! Iạ e MAWU, i kamene kate pěmpěmile sěmbaụ: dal᷊eng mẹ̌timona pẹ̌bawiahẹ̌, arau ral᷊eng mẹ̌timona papate.

⁹Apan taumata kụ mạtanạ su ral᷊ungu soa e, sarung mate ual᷊ingu pẹ̌sasekẹ, karal᷊unusẹ̌, arau sahindạ. Arawe i sire apan siměbang kụ měmpẹ̌samal᷊ẹ su tau Babel těntal᷊ang kạpěnekẹ e soa ini e, sarung mal᷊iwirẹ̌ dingangu tawe pateěng.

¹⁰Iạ e seng bọu němutusu měnggolọ soa ini e, ringangu sen tawẹ apa tatal᷊ěntụ e. Soa ini e sarung i sarakang su ratuʼm Babel; i sie sarung tutungang sarang pakasue-sue. Iạ e MAWU, seng něhengetang.”

¹¹MAWU e něngoro si siạ pělẹ̌habaru tatanata ini su walagu ratun Yehuda, hiten Daud: ”Daringihẹ̌ko si Siạ e, MAWU kụ měhengetang. Pẹ̌tawakal᷊iko tadeạu kạadilẹ̌ e i ral᷊eng apang kal᷊aěllo e. Pěllọko taumata kụ sěsẹ̌dakeng bọu kawasan taumata kụ měnẹ̌nẹ̌dạ e. Manga tala ute, karal᷊akisẹ̌ kụ kẹ̌koatengu e sarung makawodaị pẹ̌du-Ku e sumahoka kere putung kụ tawe kasẹ̌buang.”

¹³Bọu ene MAWU e, něhengetang su Yerusalem, ”Ei Yerusalem! Tampạu e něngalembong karangẹ e wọu manga wal᷊ane mạngělikụ si kamene e. I kau e al᷊ingkai wukidu watu kụ mạngiral᷊ung tenene, arawe Iạ e sarung dumokạ si kau. I kau e nẹ̌bera u tawẹu sarang sěngkatau kụ sumekẹ si kau e arau měmpaněnehẹ̌ manga těndạu e,

¹⁴arawe Iạ e sarung měhukung si kau ual᷊ingu kakanoạu. Istananu e sarung Takụ tutungang, dingangu kal᷊awọu sabarang e mạngělikụ e sarung měngkatutung dingang. Iạ e MAWU kụ seng něhengetang.”