Read Sangir YEREMIA 22 Bible Online

YEREMIA 22 - Sangir bible

YEREMIA 22

¹MAWU e něngoro si siạ apạkakoạ sarang istanan datung Yehuda, hiten Daud, baugu pěhabaru tatanatang MAWU e su ratu, ringangu su manga sawohị e, ore lai tumanạu Yerusalem. Seng ini e manga wawerang MAWU e si sire,

³”Pakal᷊aadilẹ̌ dingangu pakatatul᷊idẹ̌. Pěllọ e taumata kụ sěsẹ̌dakeng bọu kawasan taumata kụ měnẹ̌nědạ e. Kumbahang be měmpẹ̌tingkaị arau měmpẹ̌koạ dal᷊akisẹ̌ su taumata raghị, manga rariọ kasisi ěndusẹ̌, arau manga wal᷊u. Kumbahang měmate taumata tawẹ sal᷊ane su tampạ ini.

⁴Kereu i kamene e kahěnga-hěngang mẹ̌děndal᷊engu manga tita-Ku e, tangu manga ratu kụ apang mẹ̌pẹ̌parenta kere i Daud, sarung mahunsuẹ̌ su manga pasěllangengu istana ini. I sire ringangu manga sawohị, dingangu kawanuan sire e sarung mahunsake kareta ringangu kawal᷊o.

⁵ Kaiso kamagengu i kamene e tawe tumuhụ manga tita-Ku e, tangu Iạ e mẹ̌salu u istana ini e sarung makoạ opehe. Iạ e MAWU, kụ seng něhengetang.

⁶Si Siạ e istanan datung Yehuda e mal᷊ěngi-lěnggihẹ̌, kal᷊ěnggihe kere ěntanang Gilead, dingangu manga wul᷊udu Libanon; arawe tampạ ene e sarung Takụ i pakakoạ kere wanua l᷊inggi kụ sen tawe pẹ̌tanakeng u taumata.

⁷Iạ e sarung měndingọ u taumata i pěnggolang. I sire sarung měmpẹ̌bawa wal᷊iung dingangu měmpěhaka manga rihine kụ maral᷊ěnggihẹ̌ e nikoạ bọu kalun cěmarang Libanon. Bọu ene i sire e sarung měmahungu ene sarang dal᷊ungu putung.

⁸Bọu ene lawọ taumata raghị sarung sumaheng ene e, kụ mẹ̌kakiwal᷊o sěmbaụ su wal᷊ine, unụ e Iạ, MAWU e seng nẹ̌koạ kerene waugu soa mal᷊ěnggihẹ̌ ene.

⁹Bọu ene taumata e sarung sumimbahẹ̌ u kěbị ene nariadi e ual᷊ingu i kamene seng nělanda pẹ̌kakakireng kamene ringang-Ku, Ruatang kamene, ringangu seng něněmba ore lai nẹ̌kal᷊iomaneng su manga ruata wal᷊ine.”

¹⁰Tau Yehuda, kumbahang be masusa waugu kapapohongu Ratu i Yosia. Pěmpẹ̌sangịen Yoahas ahuse u i sie seng niwawa ringang kụ semben tawe saụ mẹ̌bal᷊ị. Ěntana kinawantelange semben tawe saụ i kasilone.

¹¹ Mạanung Yoahas, ahusi Yosia, kụ nakoạ datung Yehuda e něngaweng si amange, MAWU e nẹ̌bera kirini, ”I sie e seng mapul᷊ẹ bọu ini, dingangu sen ta saụ mẹ̌bal᷊ị.

¹²I sie sarung mate su pinamembangeng, kụ sen tawe saụ makasilo wanua ini e lai.”

¹³Kạěngkěhang taumata kụ mamětị bal᷊ene ringangu tawẹ kạadile, mase mapakasariang ene e, su tawẹ katul᷊ide. Kạěngkěhang i sie kụ měndolohu taumata i pěhal᷊ẹ̌ tawẹ tatendenge.

¹⁴Kạěngkěhang be lai taumata kụ mẹ̌bera, ”Iạ e měmětị istana ghẹ̌guwạ dingangu manga kamare maral᷊oahẹ̌ su wowone rasị,” bọu ene, su istana ene e nikoạ e janela kụ bingkene wọu kalun cěmarang Libanon, dingangu nilaburangu mahamụ.

¹⁵Daringihẹ̌ko ei Ratung Yoyakim! Kereu i kau e měmangung istana ringangu kalun cěmarang Libanon kal᷊enggihange, ěnnaěng ene e kai karal᷊ahẹu i kau e kai ratu kụ limembong kapiane wọu manga ratu wal᷊ine e tangu? Kěnang pẹ̌tahěndung si amangu: I sie nakatemang pẹ̌bawiahe mataghupia e ringangu nakaual᷊i su patikụ tawakal᷊ine, ual᷊ingu i sie e matul᷊idẹ̌ dingangu adilẹ̌ ore lai mẹ̌gěngguta pěrkaran tau kasiang e su kạadile. Mambeng kerene hinone kakanoạ u taumata kụ masingkạ u MAWU e.

¹⁷Arawe i kau e Yoyakim, wal᷊ine wue. I kau e tumbạeng mẹ̌dẹ̌deạ kal᷊auntu waugu watangengu hala e. I kau e mạmate taumata tawẹ sal᷊ane, ringangu měnẹ̌nědạ kawanuanu e ringangu mahasa.

¹⁸ Ual᷊ingu ene, kụ mihino si Yoyakim datung Yehuda, ahusi Yosia, MAWU e něhengetang kirini, ”Papatene e tawẹ sasangị e; tawẹ apa kụ deng mẹ̌bera u, ’Kasiang, hapịku, kasiang.’ Tawẹ apa kụ deng masusa arau mẹ̌bera u, ’Pirua wue i tuang lẹ̌adateng!’

¹⁹I Yoyakim sarung suhudang kụ i rěmmẹ sarang likudu tukadu pasěllangengu Yerusalem, kerẹewe seng kinoạ u taumata su kasuangu kalide.”

²⁰MAWU e něhengetang, ”Ei tumanạu Yerusalem, kakoạko sarang Libanon dingangu Basan, dingangu pěmpěmansage paị sene. Pahuheọ e su wawul᷊urangu Moab, u patikụ pinẹ̌těngkasěmbaukangu e seng kinawatạ.

²¹Iạ e seng nẹ̌bisarang kamene e su tempong i kamene e mapia e, kai i kamene e tawe mapulu rumaringihẹ̌. Mambeng kerene lulunu e dokeng kạngerẹ e sarang orasẹ̌ ini; tawẹ sarang sěnsul᷊ẹ i kau e timuhụ si Siạ.

²²Ual᷊ingu ene manga měnaněmbonangu e sarung mapuạ tabidạu tiukangu anging. Apang pinẹ̌těngkasěmbaukangu e sarung hengketang kere tinaweng dingangu soanu sarung hinakaneng dingangu tahumeang ual᷊ingu kěbị karal᷊akisu.

²³I kamene e mạtanạ marěmasẹ̌ nal᷊ikụ u manga rihing kalung cěmarang Libanon, kaiso kamagengu i kamene e sarung kahombangengu sakị e, i kamene e sarung masigěsạ kere sěngkatau wawine kụ kapělẹ̌hěndinge.”

²⁴ MAWU e něhengetang su Ratu i Yoyakhin, ahusi Yoyakim, datung Yehuda e, ”Su ral᷊ungkeng Iạ e, Ruata kụ biahẹ̌ e, Iạ e měngasagẹ̌ u manilaing i kau e si Siạ kai kere sinsing laikị su l᷊ima-Ku koaneng e, kaiso i kau man sarung Takụ sawukang

²⁵kụ i sarakang su taumata kụ i kẹ̌katakụ u ringangu lai mapulu měmate si kau. I kau e sarung Takụ i sarakang si Nebukadnesar datuʼm Babel, dingangu manga taumatane.

²⁶I kau e ringangu i ninangu e sarung Takụ tokol᷊ang dingangu Takụ i rěmmẹ sarang banua kụ bal᷊inewe kinawantelangu e, kụ paị sene e i kau e sarung mate.

²⁷I kamene e sarung dumareạ u wanua ini, kaiso i kamene e tawe sarung masul᷊e.”

²⁸Iạ e kai i Yeremia, kụ nẹ̌bera u, ”Datu i Yoyakhin sarung mariadi ngae mẹ̌sul᷊ungu kuring nạběka kụ i rěmmẹ dingangu sen tawe lai kapulune taumata e? Kai ual᷊ingu ene i sie ringangu manga anạ e nitokol᷊ẹ̌ dingangu nirěmmẹ sarang banuan tau l᷊iwụ baugi sire e?”

²⁹Oh, wanuaku e, daringiheko waweraʼm MAWU e,

³⁰”Tau ene e sen tinantu waugu kailangengu manga anạ e ringangu hanesẹ̌ kẹ̌kapinsul᷊ange su ral᷊ungu pẹ̌bawiahe. Bọu hitene tawẹ apa kụ sarung mẹ̌barạuntu su pẹ̌paparentane su Yehuda e, kere sěngkatau ratu pal᷊ahěnton Daud. Iạ e kai MAWU, kụ seng něhengetang.”