Read Sangir YEREMIA 23 Bible Online

YEREMIA 23 - Sangir bible

YEREMIA 23

¹MAWU Ruatang Israel nẹ̌bera, ”Masilakạ i kamene manga těmbonang kụ mapakawinasa ringangu mapẹ̌tal᷊eing manga umatẹ̌-Ku! I kamene hinong měpadul᷊i manga umatẹ̌-Ku e, kaiso i kamene e tawe němpẹ̌koạ ene; i kamene e němala pinẹ̌kal᷊iaesẹ̌ dingangu nahuntal᷊ang. Ini e Iạ měhukung si kamene ual᷊ingu karal᷊akisi kamene e.

³Arawe manga lěmbeng umatẹ̌-Ku e sarung Takụ tampungang bọu kal᷊awọu wanua su tampạ i sire Takụ piněnděmekang. I sire e Takụ i sul᷊e kạpia sarang banuan sire e ringangu pal᷊ahiten sire e sarung mahuntinambang kal᷊awọ e.

⁴Iạ e hědo měhengkẹ těmbonange waugu i pẹ̌padul᷊i si sire. Umatẹ̌-Ku selain tawe matakụ arau ghumiantang; tawẹ u sarang sěngkatau wọi sire e kụ mailang. Iạ e MAWU, kụ seng nẹ̌bisara.”

⁵ MAWU e něhengetang, ”Sarung marěnta tempone, Iạ e měhengkẹ u sěngkatau ratu kụ adilẹ̌ e wọu hěnton Daud. Datu ene sarung mẹ̌parenta ringangu kapelesa, ringangu mẹ̌koạ apang kụ adilẹ̌ dingangu su katul᷊ide, su patikụ beọ e.

⁶Kereu i sie mẹ̌parenta e, tau Yehuda e sarung masal᷊amatẹ̌, dingangu tau Israel sarung mẹ̌biahẹ̌ mal᷊enehẹ̌. Datu ene sarung i sěbạ ’MAWU, Kasasal᷊amati Kitẹ e’.

⁷Sarung marěnta tempone, taumata e tawe lai mẹ̌salu su areng-Ku, Ruata kụ biahẹ̌ e, kụ seng napasěbangu tau Israel bọu Misirẹ̌ e,

⁸kaiso su ral᷊ungu areng-Ku, Ruata kụ biahẹ̌ e kụ seng napasěbangu tau Israel bọu wanua sěmbaụ su sěmběkan sawěnahẹ̌, dingangu wọu kěbị banua wal᷊ine su apang i sire e sen Takụ pinẹ̌sal᷊iawuhẹ̌. I sire e sarung matanạ su wanuan sire hala e.”

⁹Ini e tatanataku mạanung manga nabi: Naungku e nal᷊ahěmpung dingangu timaghawahẹ̌. MAWU e ringangu hengetangʼE kụ susi e nakakariading iạ e kere taumata wukang kụ tumanịu nal᷊awọ něnginung anggorẹ̌ e.

¹⁰Banuang kitẹ e napenẹ u taumata kụ tawẹ satiane su MAWU. I sire e mẹ̌bẹ̌biahẹ̌ dal᷊akisẹ̌ dingangu mẹ̌sẹ̌sal᷊a pakẹ u kawasan sire e. Ual᷊ingu laaneng MAWU e, rěmpugẹ̌ su wimbaenge nahěgu ringangu kal᷊awọu wanua e lụl᷊ahunsusa.

¹¹MAWU e něhengetang, ”Nabi ringangu imang mạdiri tumuhụ si Siạ e. Su Wal᷊e-Ku ewe lai Iạ e seng nakaěbạ si sire e mẹ̌kẹ̌koạ dal᷊akisẹ̌ e.

¹²Ual᷊ingu ene, ral᷊eng i sire e sarung mal᷊ewehẹ̌ dingangu marěndung, hakịu i sire e masangkong kụ manawo. Iạ e sarung maparěntan silakạ si sire, kereu seng marěnta tempone waugu měhukung si sire. Iạ e kai MAWU kụ seng nẹ̌bisara.

¹³Dosang manga nabing Samaria e seng Takụ kinasilo. I sire e mạhumbisara su arengi Baal dingangu mapakạpal᷊idu Israel, umatẹ̌-Ku e.

¹⁴ Arawe su Yerusalem Iạ e nakasilo manga nabi e mẹ̌kẹ̌koạ něngalembong karal᷊akise lai. I sire e němpẹ̌konti ringangu nawuang, ore lai mạněgadẹ̌ taumata e pẹ̌kẹ̌koạ dal᷊akisẹ̌ e, hakịu tawẹ u sarang sěngkatau e mapulu mẹ̌tobatẹ̌. Si Siạ i sire kěbị e ral᷊akisẹ̌ mẹ̌sul᷊ungu tumanạu Sodom dingangu Gomora.”

¹⁵MAWU Kụ Limembong Kawasa e něhengetang, ”Sarung Takụ onggotang su manga nabi su Yerusalem ene e sasuang mapaị mạengu kanengang, dingangu makạkilu mạengu inungang, batụu i sire e seng nakakariadin taumata su kạguwạ u wanua e tawe měngangadatẹ̌ si Siạ e.”

¹⁶Su tumanạu Yerusalem, MAWU Kụ Limembong Kawasa e nẹ̌bera, ”Kumbahang dumaringihẹ̌ bawerang manga nabi kụ měngkai mẹ̌gẹ̌gěllịu antibẹ̌ tawẹ lohone. I sire kětạeng mělẹ̌habaru pěnaněbal᷊i sire hala e kai wal᷊inewe tatanata-Ku.

¹⁷Baugu taumata kụ mạdiri rumaringihẹ̌ manga wawera-Ku, i sire masau mẹ̌bera u, ’I kamene e masal᷊amatẹ̌.’ Dingangu waugu taumata kụ těmbọe makakětị e, i sire mẹ̌bẹ̌bera u, ’I kau e tawe makahombang silakạ.’ ”

¹⁸Iạ e mẹ̌bera, ”Tawẹ u sarang sěngkatau wọu manga nabi ene e, masingkạ u apang kụ kạl᷊aunidẹ̌ su ral᷊ungu sipirangu MAWU e. Tawẹ apa wọi sire e kụ bọu nakaringihẹ̌ dingangu nakaěnna kal᷊awọu karaki-Ne; tawẹ u l᷊ai měmpěnaung arau měmpẹ̌pandung apang hengetangʼE.

¹⁹Dal᷊angehu MAWU e al᷊ingkai anging timiụ maihạ kụ nẹ̌tondaisẹ̌ dingangu něngěmmụ kal᷊awọu taumata ral᷊akisẹ̌ e.

²⁰Dal᷊angehʼE tawe mal᷊ẹ̌da těntal᷊ang kěbị apang karaki-Ne e mariadi. Su samurine umatu MAWU e sarung makaěnna hal᷊ẹ̌ ene e mal᷊ahẹ.”

²¹MAWU e něhengetang, ”Manga nabi ene e maghaghising kahěngang, sumbal᷊iau i sire e tawe Takụ nioro. Su areng-Ku e i sire měmpạněpasu habarẹ̌ e, sumbal᷊iau tawẹ apa tatanata-Ku e nionggọ si sire.

²²Kai manga i sire e masingkạ u apang kụ kạl᷊aunidẹ̌ su ral᷊ungu tiněnna-Ku e, semben tantu i sire e seng něhabarẹ̌ su manga umatẹ̌-Ku e kal᷊awọu apan sen Takụ niwera e. Tangu umatẹ̌-Ku e sarung měmpẹ̌tobatẹ̌ bọu kal᷊awọu rosa ringangu kakanoạ i sire ral᷊akisẹ̌ e.

²³Iạ e kai Ruata ene suapan tampạ, bal᷊inewe kětạeng su tampạ sěmbaụ samatang.

²⁴Tawẹ u sarang sěngkatau kụ makapěmuning batangenge wọu mata-Ku e, u Iạ e ene suapan tampạ: su sorga ringangu su dunia.

²⁵Kal᷊awọu apang niwerang manga nabi ene e Iạ e seng masingkạ. Su areng-Ku e i sire němpẹ̌konti u tatanata-Ku e seng kinatarimạ i sire e wọu ipi.

²⁶Sarang kạděngụ e manga nabi ene e mapakapal᷊idu umatẹ̌-Ku e ringangu habarẹ̌ nilanging i sire hala e?

²⁷Su naung i sire e ual᷊ingu kal᷊awọu ipi i wẹ̌běken sire e, umatẹ̌-Ku e miwul᷊eng Iạ e, mẹ̌sul᷊ungi upung i sire e niwul᷊eng Iạ e ringangu něněmba Baal.

²⁸Nabi kụ nipi e hinong mẹ̌bera u, ’Ini e kětạeng ipi.’ Arawe nabi kụ nakahombang tatanata wọu Iạ e hinong měhabaru tatanata ene e tuhụ hinone. Gandung e tawe i kasul᷊ung su kawene.

²⁹Bawera-Ku e mẹ̌sul᷊ungu putung, dingangu mẹ̌sul᷊ungu rarupa kụ makahěmpung batu!

³⁰Iạ e sarung dumokạ manga nabi kụ měhabaru tatanata wọu lawọ dingange, kụ bọu ene e mẹ̌bera u ene e kai tatanata wọu Iạ e.

³¹Iạ e mal᷊ain dumokạ manga nabi kụ měhabaru kal᷊awọu wawerane hala e, kụ bọu ene mẹ̌bera u ene kai wọu Iạ e.

³²Iạ e, MAWU, kụ sarung dumokạ manga nabi ene e kụ mělẹ̌habaru kal᷊awọu ipine napenẹ u konti e. I sire e napakapal᷊idu umatẹ̌-Ku e ringangu konti arau leohi sire e. Iạ e tawe něngoro su manga nabi ene. I sire mamben těngadẹ̌ tawẹ gunane su manga umatẹ̌-Ku e. Iạ e MAWU, kụ seng něhengetang.”

³³MAWU e něhengetang, ”Yeremia, kereu sěngkatau wọu umatẹ̌-Ku e, arau sěngkatau nabi, arau imang, makiwal᷊o si kau, ’Kai apa tatanatang MAWU e?’ I kau e harusẹ̌ simbahẹ̌, ’I kau e wawawaěng[12] u MAWU; ual᷊ingu ene i kau e sarung i rěmmẹe.’

³⁴Kereu sěngkatau wọu umatẹ̌-Ku e arau nabi, arau imang bědang mạhumbisarang hal᷊ẹ̌ u ’wawawaěngu MAWU’, tangu i sie ringangu ral᷊ohoʼm bal᷊ene e Takụ sarung i hukung.

³⁵Su sěmběkane, apan taumata e hinong makiwal᷊o su hapị e ringangu su manga walage, ’Kai apa sasimbange wọu MAWU e?’ arau ’Kai apa niweraʼm MAWU e?’

³⁶I sire sen tawe lai wotonge mẹ̌pakẹ u wawera ’wawawaěngu MAWU’. Kereu wědang piạ u mẹ̌pakẹ u wawera ene e, tangu, Iạ e sarung mapakariading tatanata-Ku e kahěnga-hěngang bawawaěng si sie. Taumata kụ mẹ̌berang ’bawawaěngu MAWU e’ samatang měmpěmal᷊ịu wawera-Ku e, Ruatan sire, Duata kụ biahẹ̌, MAWU Kụ Limembong Kawasa.

³⁷I sire e tumbạeng botonge mẹ̌bera su manga nabi, ’Kai apa sasimbangu MAWU e si kamene? Kai apa niwerang MAWU e?’

³⁸Kereu piạ u tawe tumuhụ tita-Ku ene e, ringangu mẹ̌pẹ̌pakẹ u wawera ’wawawaěngu MAWU e’,

³⁹tangu Iạ e sarung měmurụ[13] si sire e dingangu měmahung i sire e pakarau-rau, baewe i sire, arau lai soa kụ seng Takụ nionggọ si sire ringangu manga i upung i sire e.

⁴⁰Iạ e sarung mapakamea ringangu mapakahinan sire e sarang kạrěngụ e ringangu kakakoạu pẹ̌bawiahi sire e tawe i pakawul᷊en sire e.”