Read Sangir YEREMIA 24 Bible Online

YEREMIA 24 - Sangir bible

YEREMIA 24

¹ Sěnsul᷊e tempo samuring Yoyakhin ahusi Yoyakim datung Yehuda e ringangu manga mapapangkatu těmbonangu kawanuang Yehuda, manga mělahal᷊ẹ̌ dingangu apang masasingkạu hal᷊ẹ̌ e nịlahengkẹ i Nebukadnesar, datuʼm Babel, kụ niwawa kere tinaweng bọu Yerusalem sarang Babel, MAWU e, něngonggọu sěmbaụ papasilo e si siạ. Iạ e nakasilo kimpạ darua lohong buang ara kạpapěllọ su těngoʼm Bal᷊eʼm MAWU e.

²Kimpạ humotong e piạ lohone wuang ara maral᷊ěnggihẹ̌, al᷊ingkai wuang ara nitipo humotong, arawe kimpạ karuane tangu piạ lohone wuang ara mawawuhụ, kụ semben tawe i kakaěng.

³Bọu e MAWU nẹ̌bera si siạ, ”Yeremia, kai apa kinasilonu e tangu?” Iạ e simimbang, ”Buang ara, MAWU. Maral᷊ěnggihẹ̌ e mambeng mapaelẹ̌ kahěngang, kụ apang mawuhụ e mambeng mawuhụ-buhụ hakịeweng sen tawe i kakaěng.”

⁴Tangú MAWU e nẹ̌bera kapia,

⁵”Taumata kụ apan seng Takụ niwala pinakihengkẹ sarang Babelẹ̌ e Takụ nikoạ kere wuang ara kụ maral᷊ěnggihẹ̌ ini e; ual᷊ingu ene Iạ e MAWU, Ruatang Israel, sarung pakapia miěbạ i sire e.

⁶Iạ e sarung mělukadẹ̌ si sire měnul᷊e si sire kapia sarang banua ini e. Iạ e kai měmětị, bal᷊inewe mapakaghoghahi sire e; Iạ e kai mẹ̌suang, bal᷊inewe měngěbụ si sire.

⁷Iạ e kai měngonggọu wawahansang si sire e mẹ̌deạu makaěnna u kai Iạ e MAWU. Kụ i sire sarung makoạ umatẹ̌-Ku, ringangu Iạ e makoạ Duatan sire e, watụ u i sire e sarung mẹ̌sul᷊e su anu-Ku ringangu kạguwạu naung.

⁸Arawe i Zedekia e ratung Yehuda e, ringangu manga mapapangkatẹ̌ kụ maranin sie, ringangu lěmben tau Yerusalem kụ těbe mạtanạ su wanua ini e, arau němpěngal᷊ing sarang Misirẹ̌ e, i sire kěbị e sarung Takụ koateng kere wuang ara kụ daral᷊akisẹ̌ ini e, kụ seng tawe i kakaěng. Iạ e kai MAWU, kụ seng nẹ̌bisara.

⁹Iạ e sarung mapakasilakạ i sire e sěngapaʼm botonge hakịu kal᷊awọu wansa su kasěllahu dunia e něngkatakụ. Kụ balạewe suapa i sire Takụ i pẹ̌sawuhẹ̌, i sire e sarung heghesang, koateng parahul᷊ěge ringangu pẹ̌bawaheau. Areng i sire e sarung koateng kere laane.

¹⁰Iạ e sarung maparěntang pẹ̌sasekẹ si sire e, karal᷊unusẹ̌, dingangu sahindạ, hakịu i sire kěbị e nate, ringangu tawẹ apa kụ natěntang su wanua ini kụ seng Takụ nionggọ si sire ringangu manga i upung i sire e.”