Read Sangir YEREMIA 27 Bible Online

YEREMIA 27 - Sangir bible

YEREMIA 27

¹ Tawe nararěnnạ sarětạeng i Zedekia[16] ahusi Yosia nakoạ datung Yehuda, MAWU e něngoro si siạ e

²pẹ̌kẹ̌koạ manga tal᷊i wọu pisị ringangu papasanengang bọu kalu ringangu pẹ̌taingu ene e su pol᷊ohẹ̌ku e.

³I Sie lai něngoro si siạ e pělẹ̌habaru tatanata-Ne su manga ratung Edom, Moab, Amon, Tirus dingangu Sidon, dingangu lumiung manga rarolohang i sire kụ seng nahunděnta su Yerusalem mẹ̌tiwo Ratu i Zedekia.

⁴Iạ e harusẹ̌ měhabarẹ̌ si sire u MAWU Kụ Limembong Kawasa Ruatang Israelẹ̌ e, nẹ̌bera,

⁵”Ual᷊ingu kawasa-Ku e masaria, ringangu katoghasẹ̌-Ku Iạ e seng něndiadi runia ringangu taumata ore lai manga binatang, dingangu Iạ e makaonggọ ene waugi sai-saing kụ i kẹ̌kapulu-Ku e.

⁶Seng Iạ e něnarakangu patikụ bansa ini e su ral᷊ungu kawasang ěllang-Ku, i Nebukadnesar, datuʼm Babel. Sarangbe lai manga binatang sen Takụ nisarakang si sie pakikawasai.

⁷Kal᷊awọu wansa e sarung mẹ̌samal᷊ẹ si sie, su ahuse, ringangu su manga pulunge sarang marěnta tempone něgaran sire hala e manawo. Su tempo ene tau Babelẹ̌ e sarung mẹ̌samal᷊ẹ su manga wansa matatoghasẹ̌ e ringangu manga ratu kụ masasěllahẹ̌ e.

⁸Bansa arau kararatuang kụ tawe mapulu mẹ̌samal᷊ẹ si Nebukadnesar sarung Takụ i hukungu pẹ̌sasekẹ, karal᷊unusẹ̌, dingangu sahindạ, sarang pěngěnsueěnge wansa ene e mẹ̌tumpěkuhẹ̌ si sie.

⁹Kumbahangbe rumaringihẹ̌ manga nabi arau si sai-saing kụ mẹ̌sẹ̌sěding i kamene mẹ̌tumpěkuhẹ̌ su ratuʼm Babel, manilaing i sire e měngaku seng nakatarimạu sasal᷊ěntihọ bọu ipi, manga himukudẹ̌, arau mẹ̌pẹ̌pakẹu kawasang kararěndung.

¹⁰I sire e měngẹ̌ngakal᷊ẹ̌ si kamene e hakịu i kamene e ingkateng pakarau wọu wanuang kamene e. Iạ e sarung měnokol᷊i kamene e wọu wanuang kamene ringangu i kamene e sarung mawinasa.

¹¹Arawe wansa kụ mapulu mẹ̌tumpěkuhẹ̌ dingangu mapulu mẹ̌samal᷊ẹ su ratuʼm Babelẹ̌ e Takụ i pakawala pẹ̌tanạ su wanuan sire hala e, ringangu pěhěnsinuang sene e. Iạ e MAWU kụ seng něhengetang.”

¹²Baugi Zedekia ratung Yehuda e, iạ i Yeremia, mělẹ̌habaru hal᷊ẹ̌ mẹ̌sul᷊ung. Iạ e mẹ̌bera u, ”Pẹ̌těngkakohọ e su ratuʼm Babelẹ̌ e. Tuhụe si sie ringangu su wansane, tadeạu i Tuang e masal᷊amatẹ̌.

¹³MAWU e seng něhengetang u wansa kụ tawe mẹ̌tumpěkuhẹ̌ su ratuʼm Babelẹ̌ e sarung mateʼm pẹ̌sasekẹ, kal᷊unusang, dingangu kahian sahindạ. Unụ e i Tuang, dingangu kawanua e mapulu mateng kakakoạ e kerene e?

¹⁴Kumbahangbe rumaringihẹ̌ manga nabi kụ mẹ̌sẹ̌sěding i Tuang e mẹ̌tumpěkuhẹ̌ su ratuʼm Babel, u i sire e kai mẹ̌ngakal᷊ẹ̌ si Tuang.

¹⁵I sire mạul᷊ịu i sire e kai nẹ̌bisara su arengu MAWU, kutẹu kawe němpẹ̌konti e i sire. MAWU e hala nẹ̌bera u i Sie tawe něndolohi sire e. Ual᷊ingu ene i Sie e sarung mapẹ̌tal᷊ei ringangu mapakawinasan Tuang dingangu manga nabi apan seng němpẹ̌konti e si Tuang.”

¹⁶Bọu ene iạ e měhabarẹ̌ su manga imang dingangu su patikụ kawanua u MAWU e něhengetang kere ini, ”Kumbahang daringihang manga nabi e kụ nẹ̌berau tawẹ kararěngụ e lai manga apal᷊iwụ u Wal᷊e-Ku e sarung bawaěng kạpia wọu Babel. Makakonti wue i sire e.

¹⁷Abe raringihe si sire! Pẹ̌těngkakohọe su ratuʼm Babel, tadeạu i kamene e masal᷊amatẹ̌. Baugu apa wue soa ini e kụ harusẹ̌ magholang e tangu?

¹⁸Kereu i sire e mambeng kahěngang nabi, dingangu seng nakahombang tatanata wọu Iạ e, nal᷊ahẹ u orasẹ̌ ini e i sire mẹ̌dẹ̌dorong si Siạ MAWU Kụ Limembong Kawasa e, tadeạu manga apal᷊iwụ kụ bědang ene su Wal᷊e-Ku e ringangu su istanan datu e su Yerusalem tawe i hengkẹ sarang Babel.

¹⁹Ual᷊ingu Iạ e, MAWU Kụ Limembong Kawasa, Ruatang Israel, seng němutusu kěbị apal᷊iwụ ene e sarung hengketang sarang Babel, dingangu sarung těbe paị sene sarang Iạ e měnẹ̌naungbe kapia. Su tempo ene, wuhụewe Iạ e nẹ̌bawa kạpia sarang tampạ ini e. Iạ e MAWU kụ seng nẹ̌bisara.” Manga apal᷊iwụ kụ bědang ene su Wal᷊eʼm MAWU e ute kai: manga rihi, wěnsadẹ̌ tambaga kal᷊aukangu timběha, manga kareta, ringangu manga apal᷊iwụ bal᷊ine e pira-piram baụ apal᷊iwụu Wal᷊eʼm MAWU. Apal᷊iwụ tamai ene e tawe nawawa ringang sarang Babelẹ̌, piạ i Yoyakhin ahusi Yoyakim datung Yehuda ore manga pangahạ u kawanuan Yehuda ringangu Yerusalem nihengkẹ sarang Babel kahiang Datu i Nebukadnesar.