Read Sangir YEREMIA 28 Bible Online

YEREMIA 28 - Sangir bible

YEREMIA 28

¹ Taung ene lai[17] su wul᷊ang kal᷊imane taung kaěpạ u pẹ̌paparentan Datu i Zedekia, i Hananya ahusi Azur, sěngkatau nabi wọu soang Gibeon, mẹ̌bẹ̌bisarang iạ su Wal᷊em MAWU. Su těngong manga imang dingangu kawanua i sie mẹ̌bẹ̌bera si siạ

²u MAWU Kụ Limembong Kawasa, Ruatang Israel, nẹ̌bera kere ini, ”Katoghasu ratum Babel sen Takụ pinakapeho.

³Su ral᷊ungu tempo rua taung ini Iạ sarung mapakasul᷊eng manga apal᷊iwụ bọu Wal᷊e-Ku, kụ nạung seng nihengkẹ sarang Babel kahian Datu i Nebukadnesar.

⁴Iạ mal᷊aing sarung manul᷊e kapia si Yoyakhin ahusi Yoyakim datung Yehuda, ringangu kal᷊awọu kawanuang Yehuda kụ seng nihengkẹ sarang Babel. Mamben těngadẹ̌, Iạ sarung mapakapeạu katoghasu Babel. Iạ, kai MAWU e seng něhengetang.”

⁵Tangu su těngong manga imang dingangu patikụ kawanua kụ dụdarisị su Wal᷊em MAWU ene, iạ nẹ̌bera su Ratu i Hananya,

⁶”Mapia! Karimạko apang nitěbal᷊u ene e, mambeng makoạ karal᷊ahẹ e, ringangu MAWU e kahěnga-hěngang měngul᷊e kạpia wọu Babel manga apal᷊iwụ u Wal᷊em MAWU ringangu kal᷊awọu taumata kụ apan seng nirěmmẹ sarang pai ene.

⁷Arawe i kau e Hananya, ringangi kamene kěbị kawanua e, raringihẹ̌ko ini:

⁸Manga nabi kal᷊imonang kitẹ e seng naněbal᷊u pẹ̌sasekẹ, silakạ masaria, ore lai sahindạ, sarung humombang su taumata l᷊awọ, dingangu kararatuang apang matatoghasẹ̌.

⁹Arawe nabi kụ měnẹ̌něbal᷊u kakakoạu pědarame e kětạeng i kaaku kere nabi kụ těnga-těngadẹ̌ nirolohu MAWU, kereu apang nitěbal᷊e kawe nakoạ kahěngang.”

¹⁰Bọu e i Hananya namul᷊aho kalu papasanengang bọu rěhụku namaměding ene.

¹¹Su těngong kal᷊awọu kawanua apang něngkarěnta sene, i sie nẹ̌bera, ”MAWU e nẹ̌bera u seng kirini kakakoạu i Sie e sarung mamědi papasanengang kụ nisakẹ u Ratu i Nebukadnesar su rěhụ u kal᷊awọu wansa e; MAWU e sarung mẹ̌koạ ene su ral᷊ungu tempo rua taung ini.” Wọu ene iạ mal᷊aing tamai.

¹²Ta nararěnnạ wọu karariading hal᷊ẹ̌ ene, MAWU e něngoro si siạ

¹³apạkakoạ sarang anung Hananya apẹ̌bẹ̌bera kirini, ”MAWU e něhengetangu i kau e wotonge wue mamamědi kalu papasanengang e, katewe i Sie hědo měngawengu papasanengang uase.

¹⁴MAWU Kụ Limembong Makawasa, Ruatang Israel, nẹ̌hengetangu i Sie sarung měmasẹ̌ u papasanengang uase su rěhụ u patikụ bansa ini e, ringangu i sire e sarung měmunara waugi Nebukadnesar datum Babel. MAWU e mal᷊aing něhengetang u binatang dul᷊u e mal᷊aing sarung i sarakange su kawasang Nebukadnesar.”

¹⁵Patikụ ene e takụ nihabarẹ̌ si Hananya, mase iạ nẹ̌bera lai, ”Daringihẹ̌ko, ei Hananya! MAWU e tawe rimolohi kau; i kau e seng napakariadim bansa ini e nahimang su wawera konti.

¹⁶Ual᷊ingu ene, MAWU e hala něhengetang u i kau e sarung ipakatạdise-Ne wọu dunia ini. Taung ini lai i kau e sarung mate, batụu i kau e seng něngoro wansa ini e apẹ̌děndokạ MAWU.”

¹⁷Tangú taung ini e lai su wul᷊ang kapitune, i Hananya e nate.