Read Sangir YEREMIA 29 Bible Online

YEREMIA 29 - Sangir bible

YEREMIA 29

¹ Iạ e namohẹ u suratẹ̌ su manga imang, manga nabi, apang pangahạ u wansa kụ bědang biahẹ̌, dingangu su patikụ taumata wal᷊ine kụ seng nihengkẹ bọu Yerusalem sarang Babel kahian Nebukadnesar.

²Suratẹ̌ ene takụ niwohẹ sarạen Datu i Yoyakhin, i ninange, mangạ e sawohị u istana, apan těmbonangu kawanua su Yehuda ringangu Yerusalem, apam basẹ̌, apang mělahal᷊ẹ̌ matatahuěnna e nihengkẹ sarang piněmembangeng.

³Iạ e makiwawan suratẹ̌ ini e si Elasa, anạ i Safan, dingangi Gemarya anạ i Hilkia kụ nirolohi Zedekia ratun Yehuda si Nebukadnesar ratum Babel. Suratẹ̌ ene, wawerane,

⁴”Kirini angkuěngu MAWU Kụ Limembong Kawasa, Ruatang Israel su patikụ taumata kụ seng nirěmmẹ e wọu Yerusalem sarang Babel:

⁵’Kengkatanạ e sene. Pětịko manga wal᷊eng kamene. Pělirịko pẹ̌sasuangeng i kamene ringangu pěmpẹ̌temangko lětạ e.

⁶Pěmpẹ̌kawingke tadeạu i kamene e makaěbạ anạ, dingangu walạekere manga anạ i kamene lai pẹ̌kawing tadeạu i sire lai makaěbạ anạ. Kal᷊awọ i kamene e harusẹ̌be lai pahuntinamba kụ tawe wotonge mal᷊intụ.

⁷Pěmunarako waugu kapiam manga soa tampạ pinamembangeng i kamene karạ-Ku. Pěmpẹ̌doako si Siạ baugu pandungangu manga soa ene, u kereu kal᷊awọu soa ene masorogạ, i kamene e mal᷊aing masorogạ.

⁸Iạ e kai MAWU Kụ Limembong Kawasa, Ruatang Israel, mạnal᷊ěntihọ si kamene tadeạu kumbahang mapakawalang batangengu e kụ kontiangu manga nabi kụ mạtanạ su tal᷊oarang kamene arau kahian sai lai e kụ mẹ̌bẹ̌bera u i sire e makatěbal᷊ẹ̌ tempo ramahi. Kumbahang měngkai měnẹ̌naung manga ipin sire.

⁹I sire mẹ̌pẹ̌pakẹ u areng-Ku waugu mẹ̌bẹ̌běkeng hal᷊ẹ̌ tạ katěngade si kamene. Iạ e tawe měndarolohi sire. Iạ e kai MAWU, kụ seng něhengetang.’

¹⁰ MAWU něhengetang, ’Kereu seng naghanapẹ̌ tempone 70 su taunge waugu Babel, Iạ e sarung měnaung si kamene lai, ringangu mapakasěhụ u kědo-Ku waugu mẹ̌bawa kapia si kamene sarang tampạ ini.

¹¹I kamene kai wěga Iạ sẹ̌saku e masingkạ u kal᷊awọu karaki-Ku e si kamene? Karaki tamai ene wal᷊inewe waugu i panilakạ si kamene, kaiso kawe waugu kapianu, ringangu waugu mangonggọu tempo ramahi napinunụ u pělaharapẹ̌.

¹²Tangu i kamene sarung makitul᷊ung si Siạ. I kamene sarung duměnta mẹ̌deạu mẹ̌kal᷊iomaneng si Siạ, dingangu Iạ sarung sumimbahẹ̌ daroang kamene.

¹³ I kamene sarung mẹ̌deạ si Siạ dingangu mẹ̌sombangu Iạ, u i kamene e mẹ̌dẹ̌deạbe ringangu naung gẹ̌guwạ.

¹⁴Těngadẹ̌, i kamene sarung makaěbạ si Siạ. I kamene sarung Takụ tampungang bọu tal᷊oarang apam bansa ringangu wọu apam banua tampạ i kamene i pẹ̌tal᷊ei ringangu i rěmmẹ. I kamene sarung Takụ i sul᷊e kạpia sarang banuang kamene ini, ringangu měngul᷊ị kapia kakakoạ i kamene. Iạ e kai MAWU, kụ seng něhengetang.’

¹⁵Tumuhụ si kamene, MAWU e seng něngonggọu manga nabi si kamene su Babel.

¹⁶Daringihẹ̌ko apang kụ niwerang MAWU mạanung datu kụ seng nẹ̌parenta orasẹ̌ ini, kụ kai ratu hěnton Daud, dingangu mạanun tumanạu soa ini, kụ kai manga anạu sěngkataunu kụ nạung tawe nihengkẹ sarang piněmembangeng dingang i kamene.

¹⁷MAWU Kụ Limembong Kawasa e něhengetang, ’Iạ e sarung mapakarěntang pẹ̌sasekẹ, karal᷊unusẹ̌, dingangu sahindạ, si sire. I sire sarung Takụ koateng kere manga wuang ara kụ tumanịu mawuhụ hakịu tawe i kakaěng.

¹⁸I sire sarung Takụ sahusuang dingangu pẹ̌sasekẹ, karal᷊unusẹ̌ dingangu sahindạ hakịu patikụ bansa su dunia e sarung makapěndang humiasẹ̌ makasilo kakakoạ i sire. Baewe suapa Iạ mapẹ̌tal᷊ein sire, taumata sarung makapěndang humiasẹ̌ dingangu matakụ makasilo apa seng nariadi si sire. I sire sarung heghesang, dingangu areng i sire paketang kere laane.

¹⁹Kěbị ene nariadi si sire, ual᷊ingu i sire tawe tumatuhụ tatanata-Ku e turusẹ̌-turusẹ̌ Takụ i lẹ̌habarẹ̌ si sire limiung manga nabi manga ěllang-Ku. I sire tawẹ kanaunge su tatanata-Ku ene.

²⁰Dingangu i kamene kěbị e seng Takụ nirěmmẹ sarang Babel, daringihẹ̌ko apan Takụ niwera, u Iạ e kai MAWU.’

²¹MAWU Kụ Limembong Kawasa, Duatang Israel, seng nẹ̌bisarang mạanung Ahab ahusi Kolaya, ringangu mạanun Zedekia ahusi Maaseya kụ mẹ̌pẹ̌pakẹ u arengu MAWU waugu měhabaru apan tạ katěngade si kamene. MAWU e něhengetang u i Sie sarung měnarakang i sire su kawasang Nebukadnesar datum Babel, kụ sarung měmate si sire, su těngon matang kamene.

²²Ene kamagengu taumata kụ seng nihengkẹ bọu Yerusalem sarang Babel, kụ měngane taumata, i sire sarung mẹ̌bera, ’Karimạko MAWU e miěbạ i kau e kere i Zedekia rẹ̌duang Ahab, kụ seng nitongkạ biahẹ̌ kere ratum Babel.’

²³Kerene kakakoạ i sire watụ u i sire kai seng nẹ̌koạ dosa masaria su Israel: i sire nawuang, dingangu mẹ̌pẹ̌pakẹ u arengu MAWU waugu měmpẹ̌běkeng hal᷊ẹ̌ tawẹ katěngade. Ene e kai mẹ̌dẹ̌dal᷊ewangu kapulum MAWU. I sie masingkạ u apang kụ kinoạ i sire, ringangu i sie hala e nakoạ sahidin dimokạ si sire.[18] MAWU e seng něhengetang.”

²⁴MAWU Kụ Limembong Kawasa e, Ruatang Israel, timanata si siạ baugi Semaya, tau Nehelam, ual᷊ingu i Semaya seng něndingọ u suratẹ̌ su arenge sẹ̌sane baugu kal᷊awọu tumanạu Yerusalem, si Imang i Zepanya anạ i Maaseya, ringangu waugu patikụ imang bal᷊ine. Su ral᷊ungu suratẹ̌ ene i Semaya němohẹ kirini si Zepanya:

²⁶”MAWU e seng něhengkẹ i kau nakoạ imang něngaweng si Yoyada, dingangu orasẹ̌ ini e, seng i kau e mapapangkatẹ̌ karangetange su Wal᷊em MAWU. Hal᷊ẹ̌u e ute kai mẹ̌parenta, tadeạu apan taumata kụ pulu, kụ mangakung batangenge kai nabi e, běntungangu hante uase, su l᷊ehẹe.

²⁷Kaiso kawe unụ e i kau tawe nẹ̌kakanoạ baugi Yeremia tau Anatot ene kụ seng nariadi kere nabi su tal᷊oarang bansang kitẹ e?

²⁸Tau ene harusẹ̌ pěnggěmmingu mohonge, batụu i sie nẹ̌bera suapang taumatang kitẹ su Babel, u i sire wědang marěngụ matanạ paị sene. Dingangu ual᷊ingu ene tangú angkuěnge, i sire harusẹ̌ mamětị bal᷊e ringangu měmuka sasuang dingangu mẹ̌temang lětạ e.”

²⁹Suratẹ̌ ene niwasang Imang i Zepanya si siạ.

³⁰Ual᷊ingu ene MAWU e něngoro si siạ

³¹pẹ̌děndingọu habarẹ̌ mạanun Semaya su kěbị taumatang Israel kụ nirěmmẹ sarang Babel. Kai ini e habarẹ̌ ene, ”I Semaya seng nẹ̌bisarang kau u i sie al᷊ingkai nabi; sumbal᷊iau kawe Iạ, MAWU, tawe rimolohi sie. Ual᷊ingu i sie seng napakariading kamene nangimang su wawera konti,

³²ringangu ual᷊ingu i sie seng něngoro si kamene piněndokạ si Siạ, tangu Iạ e sarung měhukung i sie ringangu manga hitene. Tawẹu sarang sěngkatau wọu tal᷊oaran sire e kụ sarung matanạ su tal᷊oarang kamene e waugu makasilo hal᷊ẹ̌ mapapia kụ sarung Takụ koateng baugu kal᷊awọu umatẹ̌-Ku. Iạ e Kai MAWU, kụ seng něhengetang.”