Read Sangir YEREMIA 3 Bible Online

YEREMIA 3 - Sangir bible

YEREMIA 3

¹MAWU e něhengetang, ”Kereu sěngkatau wawine nisindoěng u kawinge, bọu e wawine ene e nakoạ kawingu esẹ bal᷊ine e, ute esẹ kụ nạung kawinge kal᷊amona e tawe wotonge mẹ̌saụ mẹ̌bal᷊ị makoạ kawinge e, watụ u hal᷊ẹ̌ ene e kai makạkagholang soa ini e. I kau Israel, kai seng mẹ̌naghuang i kẹ̌kěndagu l᷊awọ, kụ tumanịu wue i kau e mẹ̌bal᷊ị sarang anu-Ku.

²Kěnang tatingang taraị sarang manga wongkoʼm bawul᷊udange! Kai tampạ sude wědang ta pinẹ̌dumatingang pinẹ̌sundal᷊eng? Kerẹewe tau Arabẹ̌ su kěhu l᷊inggi, kerene lai i kau kụkaiang su wiwihu ral᷊enge, dụdal᷊ahědo taumata mapulu mẹ̌tangumbaseng. Pẹ̌tatěngkawuang dingangu karal᷊akịu e, nakal᷊amuhụ soa ini.

³Hakịu ene akẹ u l᷊angị e natuẹ̌ e, ringangu tahitim pěngangasị e tawe riměnta. I kau e měngẹ̌ngawẹ bawine sundal᷊ẹ̌ e dingangu wěga mamea.

⁴Su tempong kasasěsẹ u e, i kau e mẹ̌bera si Siạ, u kai Iạ i amangu, batụu Iạ e kụkěndagi kau e ren dokeng kạdodọ.

⁵I kau e mal᷊aing makawera u, Iạ e wal᷊inewe sěntiniạ pědu si kamene. Kai ene waweranu e Israel, kai těntal᷊ang ene e mal᷊aing nịkakoạ u patikụ karal᷊akisẹ̌ kụ apạeweng ikakoạ u.”

⁶ Su tempọen Datu i Yosia mẹ̌pẹ̌parenta e, MAWU e kai nẹ̌bera kerei si siạ, ”I kau e seng bọu nakasilo apạ e nikoạu Israel, bawine kụ tawẹ satiane ene? I sie naněntang u Iạ e, dingangu i sie mẹ̌kẹ̌koạ pẹ̌sasundal᷊ẹ̌ e su manga wongkone mararangẹ e, dingangu su al᷊ungu manga kakaluang masasuhampạ.

⁷Su tiněnna-Ku e, wọeteng i sie nẹ̌koạ kěbị tamai ene e, i sie kai mẹ̌bal᷊ị su anu-Ku. Kaiso i sie e tawe mẹ̌sul᷊e, kaiso kawe tamai mẹ̌koạ pẹ̌sasundal᷊ẹ̌ e. Kai ene nakakariading Iạ něnal᷊ein sie e, dingangu Takụ tinokol᷊ẹ̌. I Yehuda anạ u sěmbaụ i Israel tạ satiane ene e, tawe natakụ nakasilo kěbị apang nikoạ e. I sie kai timol᷊e nẹ̌sundal᷊ẹ̌ dingang,

⁹dingangu i sie mamben tawe namea. I sie nawuang e, kai ual᷊ingu nẹ̌suba watu ringangu kalu e, sarangkewe soa ini e nal᷊amuhụ.

¹⁰Bọu nẹ̌koạ kěbị tamai ene ute, i Yehuda kụ tạ satiane ene e mẹ̌sul᷊e su anu-Ku kaiso kawe mẹ̌mělle, watụu naunge tạ katul᷊ide. Iạ e, MAWU, kụ seng něhengetang.”

¹¹Samuring ene e, MAWU e niapakasingkạ si siạ u, manilaing Israel seng něnal᷊ikudẹ̌ si Sie e, kai Israelẹ̌ e mangkeng mal᷊ahẹ u wědambe limembong kapiane wọi Yehuda tạ satiane ene.

¹²Iạ e nirolohu MAWU sarang Israel, pělẹ̌habarẹ̌ kerei: ”Ei Israel tạ kasatiang kamene, pěmpẹ̌bal᷊ị e sarang anu-Ku! Iạ e napenẹ u kakěndagẹ̌ kụ tawe sarang kạděngụ e Iạ lumangehẹ̌ si kamene e.

¹³Měngkate pěmpěngaku, u i kau e seng nẹ̌sal᷊a ringangu nẹ̌koạ sasugal᷊ẹ̌ su těngom MAWU Ruatanu e. Měngkate pěmpěngaku, u su al᷊ungu kakaluang masuhampạ i kau e napẹ̌bosong kakěndagu su manga mahang duatam bansa wal᷊ine e, dingangu tawe tumatuhụ kal᷊awọu parenta-Ku e. Iạ e, MAWU seng něhengetang.”

¹⁴MAWU e něhengetang, ”Ei kal᷊awọu taumata tạ satiane, pěmpẹ̌bal᷊ị e su anu-Ku! I kamene e kai tataghuaneng-Ku. Iạ e sarung měngal᷊ạ si kamene, pẹ̌sěngkatau wọu apan soa, ruang katau wọu apang komol᷊ang, dingangu mẹ̌bawa si kamene sarang Bul᷊udu Sion.

¹⁵Iạ e mẹ̌gěllị u měnaněmbonang i kamene matatuhụ si Siạ. I sire e sarung makoạ těmbonang i kamene mapapelẹesa dingangu matatahuěnna.

¹⁶Kereu i kamene e seng kạpahuntinambane su soa ene e, ute taumata e sen tawe saụ mahumbisarang Petiʼm Pẹ̌dariandi-Ku. I sire e tawẹ tahuěnnane ringangu tawe lai saụ mẹ̌tatahěndung, kaiso kawe lai tawe mẹ̌papandung, sarạeweng lai kawe mẹ̌koạ Peting Pẹ̌dariandi wal᷊ine e.

¹⁷Su tempo ene e, soang Yerusalem e kai nisěbạ ’Kal᷊aianengu MAWU’, ringangu kal᷊awọu wansa e sarung mẹ̌komol᷊ẹ̌ su soa ene waugu mẹ̌tahamawu si Siạ e. I sire sen tawe saụ tumol᷊e kapulun dal᷊ungu naung i sire makakětị e dingangu ral᷊akị ene.

¹⁸Israelẹ̌ kai sarung mẹ̌těngkal᷊aụ dingangi Yehuda e, kụ sěngkapahunděnta wọu wanuaʼm pěmamembangeng su sěmběkan sawěnahẹ̌. I sire sarung mẹ̌sul᷊e sarang banua kụ sen Takụ nionggọ kere ěntana pusakạ su manga i upung i kamene.”

¹⁹MAWU e něhengetang, ”Israel, Iạ e mapulu rumaẹ i kau kere anạ-Ku, dingangu i kau e kai Takụ pẹ̌gěllikangu wanua makạl᷊uasẹ̌, dingangu něngalembong kal᷊ěnggihange su kěbị dunia. Iạ mapulu i kau e pẹ̌sěbạu Iạ e i amang, dingangu i kau e selain tawe tumal᷊ang bọu Iạ.

²⁰Katewe mẹ̌sul᷊ungu kawing kụ tawẹ satiane, kerene i kau e mal᷊aing tạ satiane si Siạ. Iạ e MAWU, kụ seng něhengetang.”

²¹Su wowọeʼm pusigu manga wul᷊ude kẹ̌karingihẹ̌ gahẹ; kụ ene kai tingihu tau Israel mạhungkiạ dingangu měmpẹ̌dẹ̌dorong, ual᷊ingu i sire e kai wọu němpẹ̌dosa ringangu nẹ̌timbul᷊eng MAWU Ruatan sire.

²²Ei kamene kěbị kụ němpẹ̌timbul᷊eng MAWU e, pěmpẹ̌bal᷊ịe! I Sie sarung mapakapiang kamene, dingangu mapakariading kamene e satia. I kamene e pěmpẹ̌bera u, ”Orasẹ̌ ini e i kami riměnta su anuʼm MAWU e, batụu i Sie Ruatang kami e.

²³U kai tawẹ gunane i kami měgẹ̌giong pẹ̌sasuba awẹ su manga pusigu wul᷊ude! Tul᷊umang baugu Israel kětạeng dụděnta wọu anung MAWU Ruatang kami.

²⁴Pěnaněmba su Baal, mahang duata makạmea e, kai makạkariading kal᷊ailangu manga anạ i kami e, manga sapi ringangu domba, kụ kěbị tamai ene ute kai něnggạ u tawakal᷊ing manga i upung i kami e, rokeng kal᷊imona-mona e.

²⁵Kụ, balạete i kami e měnal᷊udẹ̌ mea, ringangu walạ e i kami e maral᷊akisẹ̌. U i kami e ringangu manga i upung i kami kai nẹ̌dosa su MAWU Ruatang kami, ringangu tawe timẹ̌tuhụ su kal᷊awọu tita-Ne.”