Read Sangir YEREMIA 30 Bible Online

YEREMIA 30 - Sangir bible

YEREMIA 30

¹MAWU, Ruatang Israel,

²něhengetang si siạ, ”Bohẹko su ral᷊ungu bukẹ̌ sěmbaụ kěbị apan Takụ niwera si kau.

³U sarung marěnta tempone Iạ e mapakaul᷊eng kakakoạu umatẹ̌-Ku Israel dingangu Yehuda. Iạ e sarung mẹ̌bawa si sire kạpia sarang banua kụ sen Takụ nionggọ si upung i sire. Banua ene sarung taghuaneng i sire kapia. Iạ e kai MAWU kụ seng něhengetang.”

⁴MAWU e něhengetang su tau Israel dingangu Yehuda,

⁵”Iạ e seng nakaringihẹ̌ kiaratagu taumata kụ něngkawintogẹ̌, kiaratagu taumata kụ mạtakụ kụ tawe měnanaghuang pẹ̌darame.

⁶Kěnangko tiněnnai ringangu sẹ̌suie! Botonge ngae esẹ e měhanạ u rariọ kạdodọ? Kamageng kerene, unụe Takụ i kasilo apang manga esẹ e manga ghatin sire kawe wilosẹ̌ e ringangu měnẹ̌nahang tiang i sire ringangu l᷊ima, al᷊ingkai wawine kụ seng měhanạ?

⁷Ěllo mahuagatẹ̌ e seng narěnta, ěllo kụ tawẹ sihinge. Baugu umatẹ̌-Ku e, ene kai ěllo makạgaghěnggang; kaiso i sire e sarung Takụ i pakasal᷊amatẹ̌.”

⁸MAWU Kụ Limembong Kawasa e nẹ̌bera kạpia su manga umatʼE, ”Kereu marěnta ěllo ene, papasanengang kụ nilěngkang su rěhụku e sarung Takụ pědiang, dingangu wawěntungu e Takụ lukaěng. Kụ i kamene selain tawe makoạ ěllangu tau l᷊iwụ e.

⁹I kamene sarung mẹ̌karạdiahang baugu Iạ, MAWU Ruatanu, ringangu waugu sěngkatau hěnton Daud, kụ sarung Takụ i hengkẹ makoạ datu.

¹⁰ Kawanua-Ku Israelẹ̌ e, kumbahang gumiantang! Ěllang-Ku i Yakub abe katakụ! I kamene ringangu hiteng kamene e sarung Takụ i pakasal᷊amatẹ̌ bọu wanua marau, tampạ i kamene nitaweng. I kamene sarung měngkapul᷊ẹ kụ matanạ su wanuang kamene e kụ tawẹ konsange apa. I kamene sarung mẹ̌biahẹ̌ mal᷊enehẹ̌, kụ tawẹ apa kụ hinong i katakụ i kamene.

¹¹Iạ e sarung duměnta kụ i kamene sarung Takụ i pakasal᷊amatẹ̌. Manga wansa, tampạ i kamene kụ Takụ nipẹ̌kal᷊iaesẹ̌ e kěbị e sarung Takụ i pakawinasa, kaiso i kamene tawe Takụ koateng kerene. Mamben těngadẹ̌ i kamene man tawe mal᷊iu wọu hukumang kaiso hukumang-Ku e si kamene ute kai adilẹ̌ tuhụ ewe su tiahane. Iạ e kai MAWU kụ seng něhengetang.”

¹²MAWU e něhengetang su manga umatʼE: ”Sakị u e tumanịu matědụ, baugu lesẹ u e tawẹ apa undange.

¹³Tawẹu sarang sěngkatau e reng mapulu měsal᷊imaẹ kal᷊aul᷊em badangu e, tawẹ apa manga undangu wisul᷊u e, tawẹ apa harapu i kau e relaing mapia.

¹⁴Kal᷊awọu i tatuno naungu e seng niwul᷊eng kau e; i sire seng madiri mẹ̌tahuěnnang kau. Mẹ̌sul᷊ungu sědụ Iạ seng něngalo ringangu něhukung i kamene pinakatědụ, ual᷊ingu mal᷊awọ dosang kamene ore lai masaria pẹ̌sasal᷊ang kamene.

¹⁵Kumbahang delaing mẹ̌kurateng manga lesẹ u e, u sen tawẹ apa harapu i kau e relaing mapia. I kamene Takụ i hukung kerene ual᷊ingu mal᷊awọ dosang kamene ringangu masaria pẹ̌sasal᷊ang kamene.

¹⁶Arawe orasẹ̌ ini e patikụ apang kụ měngěllụ si kamene e sarungbe ěllukang, ringangu kal᷊awọu sědụu e sarung hengketang sarang tampạu pinamembangeng. Iạ e sarung měnědạ apang kụ mạnẹ̌dạ si kamene, Iạ e sarung měhampasẹ̌ si saing kụ mělẹ̌hampasẹ̌ si kamene.

¹⁷Manilaing sědụu e mẹ̌bera, ’Sion seng nirěmmẹ, kụ semben tawẹ apa kụ deng měnẹ̌naung ene,’ kaiso i kamene sarung Takụ i pakahuweka kapia, dingangu manga lesẹ i kamene e sarung Takụ undangeng.”

¹⁸MAWU e něhengetang kạpia: ”I kamene umatẹ̌-Ku Takụbe tal᷊entukang dingangu Takụ i pakaul᷊e kakakoạ i kamene su wanuanu e hala. Yerusalem sarungbe pětikang kapia, ringangu wal᷊en datu e ul᷊ikang kạpia.

¹⁹Tumanạ e sarungbe mẹ̌dalo si Siạ dingangu kakantarị, kụ mẹ̌gẹ̌giọe ringangu ral᷊uasẹ̌. Iạ e mapakariadin sire e adateng kụ seng tawe lai hinakaneng, dingangu kal᷊awọ i sire e sarung turusẹ̌ matamba.

²⁰Kawanuanu e Takụ i pakariadi matul᷊ende kere nạung kal᷊imona e, dingangu l᷊ai tụtindagẹ̌ kere umatẹ̌-Ku. Patikụ apang měnanědạ e sarung lai Takụ i hukung.

²¹Datu kụ mẹ̌pẹ̌parenta si kamene e kai wọu kawanuang kamene. Tawẹ apa sahaghene i sie ruměduhẹ̌ si Siạ e mạengu i sie Takụ kuiang mẹ̌těngong Iạ. U kai sai tangú wahani mẹ̌tětěngong Iạ kụ kawe ual᷊ingu kapulune hala e? I kamene sarung makoạ kawanua-Ku ringangu Iạ e makoạ Duatang kamene. Iạ e kai MAWU kụ seng nẹ̌berang ene.”

²³Dal᷊angehu MAWU e al᷊ingkai rěllang, tạbidạeng anging maihạ kụ nẹ̌tondaisẹ̌ himombang su taumata ral᷊akisẹ̌, kụ tawe mal᷊ěda kal᷊imonang kal᷊awọu apang i lẹ̌ol᷊ange e mariadi. Kụ bọu ene tangu kawanua-Ne sarung makahěngang hal᷊ẹ̌ ene.