Read Sangir YEREMIA 31 Bible Online

YEREMIA 31 - Sangir bible

YEREMIA 31

¹MAWU e něhengetang, ”Sarung marěnta tempone Iạ makoạ Duatam patikụ tau Israel, dingangu i sire makoạ umatẹ̌-Ku.

²Su wanua l᷊inggi e Iạ manodẹ u kakěndagẹ̌-Ku e si sire kụ seng nal᷊iwirẹ̌ bọu papate. Piạ e kawanuang Israel mẹ̌dẹ̌deạ e karal᷊enehẹ̌,

³bọu maraune Iạ e nẹ̌těngkatodẹ u watangeng-Ku si sire. Ei kawanuang Israel, nạung den dokeng Iạ e hanesẹ̌ kụkěndagi kamene, dingangu sarang karěngụ e Iạ e sarung těbe mělahẹ u Iạ sarung hanesẹ̌ kụ kěndagi kamene.

⁴Kawanuanu e sarung Takụ i pakatul᷊ende kere kal᷊imona. Sěnsul᷊eko l᷊ai i kamene sarung měngal᷊ạ arạbanạ, mase mẹ̌sal᷊ai kahian dal᷊uasẹ̌.

⁵I kamene sarung mělirị baelu anggorẹ̌ su wawul᷊urangu Samaria, ringangu mẹ̌sasuange sarung lai měnanipo wuane.

⁶Mamben těngadẹ̌, sarung mịdatingu tempone apang měndariagạ soa e sarung kumahiorọ su wul᷊udu Efraim, ’Ěndaị e i kitẹ sumaka sarang Sion, sarang anung MAWU Ruatang kitẹ e.’ ”

⁷MAWU e něhengetang, ”Pẹ̌kantarịen daral᷊uasẹ̌ baugu Israel, kawanua-Ku e — kawanuạ e kụ limembong kapiane wọu kawanua wal᷊ine. Pẹ̌kantarịkong kakantarị daralo, ringangu habarẹ̌ko: ’MAWU e seng napakasal᷊amatu apang lěmbene wọu kawanua-Ne.’

⁸Bọu sawěnahẹ̌ Takụ bawaěng kạpia i sire; Takụ tampungang i sire e wọu manga pondol᷊u dunia. Tau wuta ringangu peosẹ̌ e sarung tumol᷊e si sire, kerene lai manga wawine kụ buhu pělahěnding dingangu piạ kal᷊uwaenge marěngụ ene. I sire kěbị e sarung duměnta kạpia kụ apạe piạ kakạkěpal᷊e sarang banua ini.

⁹I sire kạpahundal᷊enge, apidu kạpahuntědọe akẹ u matan sire e, Takụ hiborang dingangu ahakeng i sire. Takụ ahakeng i sire e lumiu kal᷊awọu tampạ kụ mahuakẹ, lumiu ral᷊eng matene su tampạ i sire kụ tawe mitangga. Waugu Israel, Iạ e al᷊ingkai i amang; kụ i Efraim e kai ahusẹ̌-Ku i akang.”

¹⁰MAWU e něhengetang, ”Daringihẹ̌ko ei manga wansa! Ul᷊ịko tatanata-Ku sarang pai sěmběkan taghal᷊oang: Kawanua-Ku e apan Takụ pinẹ̌tal᷊ei e sarung Takụ tampungang dingangu Takụ hikinang kere lukadẹ̌ mẹ̌děndiagạ dombane.

¹¹Kawanuang Israel sen Takụ nipakasal᷊amatẹ̌, dingangu Takụ nipakal᷊iwirẹ̌ bọu wansa matoghasẹ̌ e.

¹²Sarang Bongkon Sion i sire sarung duměnta dingangu ghatin sire matatilang, kapẹ̌kẹ̌kantarị e ringangu mal᷊uasẹ̌ ual᷊ingu patikụ gaghěllị-Ku e si sire, kụ kai gandung, lana, anggorẹ̌, sapi, ringangu domba. I sire kai sarung kere winal᷊aenge kụ mahuakẹ, ringangu tawe kakawusangu apa.

¹³Su tempo ene, manga mahuala e sarung měmpẹ̌sal᷊ai ringangu naung i sire maral᷊uasẹ̌. Maghaghurang dingangu mangangudạ e mẹ̌sul᷊ung lawọ makariangkamang, batụu Iạ e sarung měhiborẹ̌ si sire. Ral᷊umpasiang i sire e Takụ bal᷊uiang pakakoạ karal᷊uasu naung, susan dal᷊ungu naung i sire e Takụ i pakakoạ makariangkamang.

¹⁴Manga imang e Takụ i pakaidopu kaěng natimu; dingangu patikụ apang gausangu kawanua-Ku e Takụ sarungbe ghěllikang. Iạ e kai MAWU kụ seng něhengetang.”

¹⁵ MAWU e něhengetang, ”Su Rama e kinaringihẹ̌ tingihu ral᷊umpasiang, dingangu kakiaratagẹ̌ natimbuhungu ral᷊ahunsusa. I Rahel rụdal᷊umpasiangu manga anạ e, i sie mạdiri hiborang batụu i sire kawe sen tawẹ dise.

¹⁶Ědoko sasangịu e ringangu emụko akẹ u matanu e! Wal᷊inewe sia-sia liaghang gatinu e waugu manga anạu e. Baugi kau e sarung piạ papahange, manga anạu e sarung měngkapul᷊ẹ bọu wanuan sědụ.

¹⁷Piạ pělẹ̌harapeng i kamene su tempo ramahi; manga anạ i kamene e sarung mẹ̌sul᷊e kapia sarang soa piněmitingang puidẹ̌ e.

¹⁸Kinaringihẹ̌-Ku e umatu Israel mẹ̌bẹ̌bera napinunụ u susa naung, ’O MAWU, i kami e mẹ̌sul᷊ungu binatang kụ bědang tawe nilẹ̌haroěng katewe nipakanarangʼU e i kami waugu tumuhụ, kụ orasẹ̌ ini e i kami sadia mẹ̌sul᷊e su anu-Nu. Kụ ahạko i kami e mẹ̌sul᷊e kạpia, o MAWU, Ruatang kami.

¹⁹I Kau e seng nital᷊ikudang i kami, kaiso kakanoạ ene pẹ̌sasěsili kami. Sarangke i Kau něhukung i kami, těmbọ i kami kimakurung ual᷊ingu mạsusa. I kami mạmea ringangu nakoạ masanạ ual᷊ingu seng nẹ̌barạdosa wědang su tempong mangudạ.’

²⁰Israel, i kau e kai anạ Takụ kẹ̌kapiang, anạ i kẹ̌kěndagẹ̌, buang naung-Ku e. Apan tempo Iạ e mạpakatakụ i kau Iạ e hanesẹ̌ mẹ̌kẹ̌karalọ i kau e su tatahěndung. I kau e sarung Takụ apakariadi ringangu napenẹu kakěndagẹ̌.

²¹Tialaiko manga ral᷊eng, kụ sangẹko apan tatialane deakeko ral᷊eng kụ sarung dal᷊engangu e kal᷊imona. Ei Israel, kapul᷊ẹe! Pẹ̌sul᷊eko sarang manga soanu e nạung kal᷊imona.

²²Sarang kạděngụ e i kau e měngkai ria-ria, ei kawanua kụ tawẹ satiane si Siạ e? Iạ e seng napakariading hal᷊ẹ̌ buhu sěmbaụ su dunia, hal᷊ẹ̌ e makạdal᷊inaụ al᷊ingkai — karal᷊inaụ u wawine mẹ̌tẹ̌tanudẹ̌ esẹ.”

²³MAWU Kụ Limembong Kawasa, Ruatang Israel něhengetang, ”Kereu kawanua-Ku e seng Takụ pinakatul᷊ende kere nạung kal᷊imona e, tangu su ěntanang Yehuda e ringangu su manga weọ e sarung i karingihẹ̌ taumata mẹ̌bera, ’Karimạko MAWU e měngal᷊amatẹ̌ bukide susi[19] su Yerusalem tampạ katatanakeng tani waugi Sie.’

²⁴Taumata e sarung matanạ su Yehuda ringangu manga weọ e. Paị sene sarung piạ manga mělahěnsinuang, mělahiking binatang dingangu sapi ore lai dombane.

²⁵I sire apang něngkarul᷊ěpe e sarung Takụ pakahuweka, dingangu apang kụ němpělome ual᷊ingu kinal᷊unusange sarung Takụ i pakal᷊aedẹ̌.

²⁶Su tempo ene taumata sarung mẹ̌bera, ’Samuring mẹ̌tikị mal᷊ěnabẹ̌ e, iạ makạpěndang mạhuweka.’

²⁷Iạ e MAWU, mạul᷊ịu sarung marěnta tempone wanuang Israel dingangu Yehuda Takụ i pakapenẹ u taumata ringangu binatang.

²⁸Kerẹewe nạung kal᷊imona Iạ seng něndiagạ si sire tadeạu wọu ene Iạ e měnawụ, mapakal᷊ei ringangu mapakagholọ i sire, kerene lai Iạ sarung měndiagạ si sire, tadeạu Iạ mapakatoghasẹ̌ dingangu mapẹ̌pětị i sire kạpia.

²⁹ Su tempo ene taumata e sen tawe lai sarung mẹ̌bera, ’Taumata maghurang kụkaěng buang kalu mal᷊ahaesẹ̌ e, ising anạ e makapěndang mangirasẹ̌,’

³⁰kaiso i saing kumaěng buang kalu mahaesẹ̌ e, i sie sẹ̌sane sarung makapěndang mangirasẹ̌ isine. Sěngkatau-sěngkatau e sarung mate ual᷊ingu rosane sẹ̌sane.”

³¹ MAWU e něhengetang, ”Sarung marěnta tempone Iạ e mẹ̌taingu pẹ̌dariandi wuhu ringangu taumatang Israel dingangu Yehuda.

³²Kaiso pẹ̌dariandi ene wal᷊inewe kere pẹ̌dariandi kụ Takụ nikoạ dingangu manga i upung i sire Takụ niahạ pinakasěbang bọu Misirẹ̌ e. Manilaing Iạ e kere sěngkatau kawing esẹ baugi sire, kaiso i sire e kawe mělẹ̌landa kire-Ku ringang i sire.

³³ Seng ini e pẹ̌dariandi wuhu kụ Takụ kinoạ dingangu tau Israel: Kal᷊awọu tita-Ku sarung Takụ i taho su ral᷊ungu ěndumang i sire, ringangu Takụ bohekang su ral᷊ungu naung i sire. Iạ e sarung makoạ Duatan sire, ringangu i sire sarung makoạ umatẹ̌-Ku.

³⁴ Tawahal᷊uasu lai piạ u sarang sěngkatau wọi sire maněntiro sěndinganenge waugu mẹ̌kiral᷊a MAWU. Watụ u i sire kěbị e, ghaghuwạ arau rarodọ e sarung makakiral᷊a si Siạ. Kal᷊awọu pẹ̌sasal᷊an sire e sarung Takụ i pakawul᷊e, kal᷊awọu rosan sire e sarung Takụ ampungang. Iạ e kai MAWU, kụ seng něhengetang.”

³⁵Matangěllo e sinadiam MAWU; waugu měnualagẹ̌ ěllo e; bul᷊ang dingangu manga wituing baugu měnualagẹ̌ hěbi. Laudẹ̌ e nikuahe hakịeweng galumbang e nạbesẹ e, MAWU Kụ Limembong Kawasa ene e arengʼE.

³⁶MAWU e nẹ̌diandi, ”Karěngụ u tiahang banua e tawe mẹ̌bal᷊ui Israelẹ̌ e mal᷊aing sarung těbe ene kere sěmbaụ bansa.

³⁷Mangawe sěnsul᷊ẹ tempo e langị e i kaukurẹ̌, dingangu wal᷊an dunia e kasẹ̌suiang e, su tempo ene lai Israelẹ̌ e sarung Takụ suhudang ual᷊ingu kal᷊awọu kakanoạ i sire e ral᷊akisẹ̌. Iạ e kai MAWU seng něhengetang.”

³⁸MAWU e něhengetang, ”Sarung marěnta tempone kasěllahu Yerusalem i wangung kạpia kere soa-Ku, wọu Měnara Hananeel sarang Tukadu Pasěllangeng u Wukune.

³⁹Bọu ene kěhịu pẹ̌saraěnge mẹ̌tẹ̌timona Wongkong Gareb, bọu ene němiku sarang Goa.

⁴⁰Kạguwạu wurase ene, kụ nipakẹ kere lěbing dingangu tampạu pěndarěmekang onasẹ̌ e, ringangu kal᷊awọu rahami su wiwihu Sal᷊ụ u Kidron sarang Tukadu Pasěllangengu Kawal᷊o watuhu sěmběkan daki, sarung itani waugu Iạ. Soang Yerusalem tawe lai sarung i pakawatang arau i pakagholọ.”