Read Sangir YEREMIA 32 Bible Online

YEREMIA 32 - Sangir bible

YEREMIA 32

¹ Su taung kapul᷊one wọu pẹ̌paparentan Zedekia ratung Yehuda, kụ kai taung kapul᷊o ual᷊une wọu pẹ̌paparentan Nebukadnesar datum Babel, MAWU e nẹ̌bisarang iạ.

²Su tempo ene, sordadon datum Babel kạpẹ̌ngalone su Yerusalem. Iạ e niarang su rělahu wal᷊en datu

³kahian Datu i Zedekia ual᷊ingu niěnsilangu seng němokạ u MAWU e nẹ̌bera kirini, ”Ratuʼm Babelẹ̌ e Takụ i wala pẹ̌kawasa ringangu apakaiang su soa ini,

⁴ringangu Ratu i Zedekia e tawe mal᷊iwirẹ̌. I sie sarung i sarakang su ratum Babel, ringangu pẹ̌těngon datu ene ringangu pẹ̌bisara hala ringang i sie.

⁵Bọu ene i Zedekia sarung hengketang sarang Babel kụ pẹ̌tanạ paịse sarang Iạ měhukung i sie. Manilaing i sie sumekẹ tau Babel, i sie tawe makaumal᷊ẹ̌. Iạ e kai MAWU kụ seng něhengetang.”

⁶MAWU e něhengetang si siạ

⁷u i Hanameel, anạ i empoku i Salum esẹ e, sarung duměnta mẹ̌gausu iạ e apěmělli ěntanane su Anatot su ěntanaʼm Benyamin. Batụu kai iạ e anạu sěngkataune karaniange piạ hakẹ̌ e měmělli ěntana ene.

⁸Mase nẹ̌kětạewe kere seng piněhengetangu MAWU e, děntako i Hanameel su anuku su rělahu wal᷊en datu, kụ pẹ̌dorong tadeạu iạ apěmělli ěntanane. Ual᷊ingu ene iạ maiakingu MAWU e kahěnga-hěngang seng něhengetang si siạ.

⁹Tangu iạ e namělli ěntana ene wọi Hanameel arěgane roitẹ̌ sal᷊aka mapul᷊o pitu su kal᷊ěpane. Takụ kinuiang kal᷊awọu sahidi kụ su těngon sire e takụ nitekenang suratu pěmamělli e, wọu e takụ nirěkatengu segele dingangu roite takụ nitimbang.

¹⁰

¹¹Bọu ene iạ měngal᷊ạ suratu pěmamělli ene kụ seng piạ segele ringangu piạ lohone kal᷊awọu tiahane ringangu kal᷊awọu apan seng tinantu. Takụ lai al᷊akeng salinangu suratẹ̌ kụ tawẹ segele,

¹²dingangu suratẹ̌ darua kụ takụ nionggọ si Barukh anạ i Neria pulung i Mahseya. Iạ měnarakang ene su těngon Hanameel ore lai kal᷊awọu sahidi kụ seng něnekeng manga suratẹ̌ ene ringangu su těngon taumata kạpahungkaiange su rělahẹ̌ ene.

¹³Su těngon sire ene kěbị e iạ mẹ̌bera si Barukh,

¹⁴”MAWU Kụ Limembong Kawasa, Ruatang Israel, nẹ̌parenta tadeạu i kau e pěngal᷊ạ suratẹ̌ darua ini e, baewe tutune arau lai salinange, kụ měnuẹ̌u ene su ral᷊ungu kuring ěntana nihawengangu porseleng tadeạu matahang marěngụ.

¹⁵MAWU Kụ Limembong Kawasa e Duatang Israel něhengetangu, wal᷊e, ěntana, ringangu waelu anggorẹ̌ e sarung i pahumbal᷊ụ i pẹ̌bawělli lai su wanua ini.”

¹⁶Sarangke manga suratu pẹ̌bawawělli ene takụ nionggọ si Barukh, iạ e mẹ̌kal᷊iomaneng

¹⁷”O MAWU Kụ Limembong Karangetange, seng i Kau e něndiadi langị dingangu dunia dingangu kawasa, ore katoghasʼU e masaria. Tawẹ apa sarang sěmbaụ kụ makětị e si Kau.

¹⁸I Kau e naněbọu kakěndagʼU e kụ kakalẹ̌ suhiwune su kataune, kaiso i Kau e mal᷊aing měhukungu taumata ual᷊ingu rosang gaghurange. I Kau e Ruata kụ mawantugẹ̌ dingangu pěrkasa, arengʼU e MAWU Kụ Limembong Kawasa.

¹⁹Kal᷊awọu karaki-Nu e wal᷊inewe mal᷊ongkọ, ringangu patikụ kakanoạʼU e makạdal᷊inaụ; i Kau e makạsilo kal᷊awọu apang kẹ̌koatengu taumata, ringangu měmal᷊isẹ̌ si sire e natuhụ ewe kere su kakanoạ i sire.

²⁰Nạung kạngerẹ i Kau e mẹ̌kẹ̌koạ karal᷊inaụ dingangu hal᷊ẹ̌ makạl᷊aherang su Misirẹ̌, dingangu sarang orasẹ̌ ini e mang i Kau e turusẹ̌ mẹ̌kakoạe, baewe su tal᷊oaran tau Israel arau lai su tal᷊oarang patikụ bansa wal᷊ine. Ual᷊ingu ene orasẹ̌ ini e, i Kau timeleng suapan tampạ.

²¹Dingangu kawasa ore lai katoghasʼU e masaria i Kau e něngahạ kawanuang Israel siměbang bọu Misirẹ̌. I Kau e mẹ̌kẹ̌koạ hal᷊ẹ̌ makạdal᷊inaụ dingangu makạl᷊aherang ore lai apang kụ makạkawintogẹ̌ manga sědụ e.

²²Banua kụ mapia ringangu matawa ini e nionggọʼU si sire kerẹe seng niriandi-Nu su manga i upung i sire.

²³Kaiso su tempong i sire e riměnta su wanua ini e ringangu němul᷊aho e, i sire tawe rumararingihẹ̌ suapan tita-Nu, ringangu tawe nẹ̌biahẹ̌ tụtuhụ kal᷊awọu těntiro-Nu. Patikụ apang ilẹ̌oro-Nu e si sire tawẹu sarang sěmbaụ nịkakoạ i sire e. U i Kau e naparěntang kal᷊awọu hombang ini e si sire.

²⁴Taumatang Babelẹ̌ e seng němětị manga meselu pěngaloěng mạngělikụ soa e waugu měmul᷊aho e, kụ orasẹ̌ ini e i sire kạpěngalone. Pẹ̌sasekẹ, karal᷊unusẹ̌, dingangu sahindạ sarung makakariadin soa ini manawo su l᷊iman sire. I Kau nakasilo u kěbị apan niwera-Nu e seng nakoạ karal᷊ahẹ.

²⁵Maning kerene, o MAWU Kụ Limembong Kawasa e, i Kau e něndolohu iạ apẹ̌mělli ěntana ini su těngong kal᷊awọu sahidi, manilaing tamararěnna e soa e sarung pul᷊ahoěngu tau Babel.”

²⁶Bọu e MAWU něhengetang si siạ,

²⁷”Iạ e MAWU, Ruatang kěbị taumata. Tawẹ apa kụ deng makětị si Siạ e.

²⁸ Soa ini e sarung Takụ i wala pakipẹ̌kawasai si Nebukadnesar datum Babel dingangu wuntuange. I sire sarung měmul᷊aho soa ini,

²⁹dingangu měnutung sarang pakaupu ringangu manga wal᷊e suapan taumata makasongkahẹ̌ dal᷊angehẹ̌-Ku, ual᷊ingu su wowong atụ u manga wal᷊e ene e i sire e měmpěnutung buwụ su Baal, dingangu maměmbingu anggorẹ̌ e waugu sasěmba su manga mahang duata.

³⁰Nanětạ bọu wěken sire, tau Israel dingangu tau Yehuda e seng napakariading Iạ e tawẹ dal᷊uase. I sire nakasongkahẹ̌ dal᷊angehẹ̌-Ku ringangu manga kakanoạ i sire ral᷊akisẹ̌ e.

³¹Nanětạ soa ini e nipětị, tumanạ e seng nakawodaị si Siạ e limangehẹ̌ marehe. Iạ e seng němutusẹ̌ baugu mapakawinasang ene,

³²ual᷊ingu kal᷊awọu karal᷊akisẹ̌ kụ kinoạu tau Yehuda ringangu Yerusalem ringangu manga ratu, apan těmbonangu kawanua, manga imang, dingangu kal᷊awọu nabin sire.

³³I sire seng naněntangu Iạ, dingangu manilaing Iạ e turusẹ̌ maněntiro si sire, i sire e mạdiri rumaringihẹ̌ dingangu mạdiri matualagẹ̌.

³⁴ Sarangkate wal᷊e nipětị baugu tampạ u pẹ̌kakal᷊iomanengang si Siạ e seng nipakal᷊amuhụ i sire ual᷊ingu naměllọu kal᷊awọu mahang duatan sire kụ makamuta su tampạ ene.

³⁵ I sire němpamangung manga pananěmbaěng baugu Baal, su Wal᷊ang Hinom, ringangu maněmbang manga anạ i sire su mahang duata i Molokh. Sumbal᷊iau, Iạ tawẹ běke něndolohi sire pẹ̌kẹ̌koạ hal᷊ẹ̌ ene, dingangu tawẹ banạu simẹ̌sěpụ su tiněnna-Ku u i sire sarung mẹ̌koạ tindakang kụ marangěngisẹ̌ kerene ringangu makakariading kawanuang Yehuda e mẹ̌barạdosa.”

³⁶MAWU, Ruatang Israel, nẹ̌bera si siạ, ”Yeremia, tau Israel nẹ̌bera u pẹ̌sasekẹ, karal᷊unusẹ̌, dingangu sahindạ, e sarung mapakariadin soa ini e manawo su l᷊imang datum Babel. Orasẹ̌ ini e daringihẹ̌ko l᷊ai apang kụ Takụ iwera.

³⁷Iạ e sarung mapakatampungu wansa ini e bọu apam banua tampạ i sire Takụ pinẹ̌tal᷊ei ual᷊ingu ral᷊angehẹ̌-Ku ringangu lahěgisẹ̌-Ku e si sire. I sire Takụ ahakeng kạpia sarang tampạ ini, dingangu wotonge mariadi Takụ i pakatanạ sini tạ konsange apa.

³⁸I sire e sarung makoạ umatẹ̌-Ku, ringangu Iạ e makoạ Duatan sire.

³⁹Iạ e kětạeng měngonggọ u timonang pěbawiahẹ̌ si sire e sěmbaụ: kụ kai měngadatẹ̌ si Siạ e sarang marěngụ-děngụ; hal᷊ẹ̌ ene ute, sarung makawawa kapia waugi sire hala, ringangu waugu manga pal᷊ahiten sire.

⁴⁰Iạ e sarung mẹ̌taingu pẹ̌dariandi kụ kakalẹ̌ dingangi sire. Iạ e tawe měngědo mẹ̌koạ mapia si sire. Iạ e sarung mapakariadin sire e mạtakụ dingangu měngadatẹ̌ si Siạ dingangu kạguwạu naung i sire e tadeạu i sire e tawe mẹ̌těngkaraung Iạ e.

⁴¹Iạ e sarung mal᷊uasẹ̌ mẹ̌koạ mapia si sire, ringangu mapakariadin sire e měnatapẹ̌ su wanua ini sarang marěngụ-děngụ.

⁴²Kerẹewe Iạ seng napakarěntang hombang baugu wansa ini, kerene lai Iạ e sarung měngonggọu kěbị apang mapia kụ seng Takụ niriandi si sire.

⁴³Taumata e mẹ̌bẹ̌bera u wanua ini e seng nakoạ kere wurase linggi e kụ tawe pẹ̌tatanakengu taumata ringangu binatang, dingangu uade wanua ini e seng nanawo su l᷊iman tau Babel. Kaiso Iạ e mẹ̌bera u kal᷊awọu manga wimbaenge ene sarung i pahumbal᷊ụ i pẹ̌bẹ̌bawělli lai su wanua ini;

⁴⁴suratu pẹ̌bawawělli e sarung tekenang, i segelẹ̌, dingangu i pakatoghasu manga sahidi. Kụ ene sarung mariadi su wanuang Benyamin, su manga weọ e mạngělikụ Yerusalem, su manga soang Yehuda, su manga soa su wawul᷊urange, su manga pentọu wawul᷊urange, ringangu su Yehuda sěmběkan timuhẹ̌. Kawanua ini e sarung Takụ i pakaul᷊e kakakoạe su wanua ini. Iạ e kai MAWU kụ seng něhengetang.”