Read Sangir YEREMIA 33 Bible Online

YEREMIA 33 - Sangir bible

YEREMIA 33

¹Piạ iạ nạung bědang niarang su rělahẹ̌, iạ nakahombang tatanata wal᷊ine wọu MAWU

²kụ nakakariadi wanua, ringangu nẹ̌koạ mase něměllọu ene su tampạ e. I Sie nẹ̌bera,

³”Pěmpẹ̌kahiorọ e si Siạ, kụ Iạ e sarung sumimbahẹ̌; hědon Takụ i habarẹ̌ si kamene apang kụ maral᷊enggihẹ̌ dingangu makạdal᷊inaụ kụ den tạ kinạsingkatengu.

⁴Wal᷊en datung Yehuda e ringangu manga wal᷊e su soang Yerusalem seng nigholang mẹ̌deạu mapakatoghasu těndạ bọu pěnanekehẹ̌ dingangu pěngangalon sekẹ. Kaiso Iạ e kai MAWU Ruatang Israel, něhengetangu,

⁵tawẹ kěhase Iạ lumawang tau Babel, u hal᷊ẹ̌ ini e tumbạeng sarung mapakariadin soa ini e napenẹ u kasuangu taumata kụ pinakapateng dal᷊angehẹ̌ dingangu libutu-Ku e si sire. Iạ e seng madiri relaing makasilo soa ini, ual᷊ingu taumatane seng němpẹ̌koạ dal᷊akisẹ̌.

⁶Kaiso Iạ hědon sarung mapakul᷊ịu kakakoạ u soa ini e kạpia ringangu tumanạ e; i sire sarung lai matoghasẹ̌ kạpia. Iạ e sarung lai měngonggọ si sire kasasorogạ dingangu karal᷊enehẹ̌ kụ mẹ̌dẹ̌dal᷊embo.

⁷Yehuda ringangu Israel sarung Takụ i pakakoạ pakapia kere nạung kal᷊imona ringangu i sire sarung dumarisị kạpia kere umatẹ̌-Ku.

⁸Iạ e sarung mapakawurěsin sire wọu kal᷊awọu rosa kụ seng nikoạ i sire si Siạ; manga rosa ringangu duruhakan sire e sarungbe Takụ ampungang.

⁹Yerusalem sarung makoạ karal᷊uasẹ̌-Ku ringangu kal᷊ahimpulu-Ku. Patikụ bansa su dunia e sarung matakụ dingangu měngkawintogẹ̌ dingangu měngadatẹ̌ si Siạ, kereu makaringihẹ̌ mạanung kal᷊awọu kapia kụ Takụ kinoạ baugu tumanạu Yerusalem, dingangu mạanung hal᷊ẹ̌ u katataghupia nạung Takụ nionggọ su soa ene.”

¹⁰MAWU e něhengetang, ”Taumata e nẹ̌bera u tampạ ini mẹ̌sul᷊ungu wanua l᷊inggi, kụ tawẹ apa taumata arau binatang kụ mạtanạ sene. Baweran sire e mambeng kahěngang, u manga soang Yehuda ringangu manga ral᷊eng su Yerusalem kěbị e seng tawẹ lohone; tawẹ apa taumata arau lai binatang delaing mạtanạ sene.

¹¹ Kaiso su apan tampạ sene sarung lai i karingihẹ̌ tingihu ral᷊uasẹ̌ dingangu ral᷊iagẹ̌ ore lai tingihu sal᷊iwangu kawing. Sarung lai i karingihẹ̌ kakantarị u taumata mẹ̌bẹ̌bawa sasěmba tatarimakasẹ su wal᷊e-Ku. I sire sarung mẹ̌bera, ’Pakitarimakasẹ su MAWU Kụ Limembong Kawasa, ual᷊ingu i Sie mapia, ringangu kakěndagʼE sarang marěngụ-děngụ.’ Banua ini e sarung Takụ i pakasorogạ kere nạung kal᷊imona. Iạ e kai MAWU kụ seng něhengetang.”

¹²MAWU Kụ Limembong Kawasa e něhengetang, ”Banua ringangu manga soane kụ kere wanua l᷊inggi ini e kụ tawẹ pẹ̌tatanakengu taumata arau binatang. Kaiso maningbe kerene, su tempo ramahi e sarung lai piạ manga wimbaengu rěmpugẹ̌ tampạu pěngangahakengu taumata e manga dombane.

¹³Su manga soa su wawul᷊urange, pentọu wawul᷊urange, wanuang Yehuda sěmběkan timuhẹ̌, dingangu su wanuang Benyamin ore lai manga weọ e mạngělikụ Yerusalem, dingangu su manga soang Yehuda, manga měndal᷊ukadẹ̌, sarung lai měndekeng manga domban sire. Iạ e kai MAWU kụ seng nẹ̌hengetang.”

¹⁴ MAWU e něhengetang, ”Sarung marěnta tempone Iạ mapakasěhụ u riandi kụ sen Takụ kinoạ su tau Israel dingangu Yehuda.

¹⁵Su tempo ene sěngkatau kụ adilẹ̌ e wọu hěnton Daud, sarung Takụ i pile makoạ datu. Datu ene sarung mẹ̌koạ apang kụ adilẹ̌ dingangu matul᷊idẹ̌ su kasěllahu wanua.

¹⁶Tau Yehuda ringangu tumanạu Yerusalem sarung i pakasal᷊amatẹ̌ dingangu mẹ̌biahẹ̌ mal᷊enehẹ̌. Soang Yerusalem sarung i sěbạ ’MAWU Měnanal᷊amatẹ̌ si kitẹ’.

¹⁷ Iạ e kai MAWU, nẹ̌diandi u hanesẹ̌ sarung piạ sěngkatau wọu hěnton Daud, kụ makoạ datung Israel;

¹⁸ sarung hanesẹ̌ piạ manga imang bọu hěnton Lewi kụ mẹ̌tangkiang si Siạ dingangu měngonggọu sasěmba binatang, gandung dingangu sasěmbạewe tẹ̌tutungang.”

¹⁹MAWU e něhengetang si siạ,

²⁰”Iạ e seng něngikị u pẹ̌dariandi waugu ěllo ringangu hěbi, tadeạu ěllo ringangu hěbi e hanesẹ̌ mạsongo su tempone; pẹ̌dariandi ene e tawe i kahipe.

²¹Kerene lai Iạ e seng něngikị u pẹ̌dariandi su ěllang-Ku i Daud, u hitene sěntiniạ sarung piạ u sěngkatau kụ kakuiang makoạ datu; dingangu Iạ e seng něngikị u pẹ̌dariandi ringangu manga imang hěnton Lewi u i sire e hanesẹ̌ sarung mẹ̌tangkiang si Siạ. Patikụ diandi ene tawe i kaěmụ.

²²Iạ e sarung měnamba hěntong ěllang-Ku i Daud, dingangu manga imang hěnton Lewi, hakịu kal᷊awọe makoạ kere kal᷊awọu ěne su apeng dingangu wituing su l᷊angị kụ tawe i karekeng.”

²³MAWU e něhengetang si siạ,

²⁴”Seng kinatinganengu apa nạung niweran taumata su tau Israel dingangu Yehuda tangu? I sire nẹ̌bera u Iạ seng něnděmmẹu wansa rarua kụ seng Takụ nipile ene. Kai ual᷊ingu ene, hakịu i sire mạmanda umatẹ̌-Ku e masanạ, dingangu tawe měngangěnna u i sire kawe sěmbaụ kawanua.

²⁵Kaiso kerẹewe lai Iạ e kai MAWU, seng nẹ̌koạ sěmbaụ laikị pẹ̌dariandi ringangu ěllo arau hěbi, ringangu mẹ̌koạ tiahang atorangu langị dingangu dunia,

²⁶kerene lai Iạ e sarung tatapẹ̌ mangumpaedẹ̌ diandi-Ku ringangu hěnton Yakub ore lai ringangu ěllang-Ku i Daud. Sěngkatau bọu hěnton Daud sarung Takụ pileěng baugu mẹ̌parenta hěnton Abraham, Ishak dingangu i Yakub. Iạ e sarung kuměndagu umatẹ̌-Ku, ringangu mapakasorogạ i sire kạpia.”