Read Sangir YEREMIA 34 Bible Online

YEREMIA 34 - Sangir bible

YEREMIA 34

¹ Piạ i Nebukadnesar datum Babel dingangu wuntuangu mẹ̌sasekẹ e kụ nitoghasengu manga pasukang bọu patikụ bansa ringangu něgara kụ mẹ̌samal᷊ẹ si sie riměnta něngalo Yerusalem dingangu manga soa mạngělikụ e, MAWU e nẹ̌bisara ringangku.

²I sie e něngoro si siạ kakoạ sarang anung Zedekia ratung Yehuda, ringangu pẹ̌bera kirini, ”Iạ e kai MAWU Ruatang Israel, kụ sarung měnarakangu soa ini su ratung Babel kụ sarung tutungange.

³I kau e tawe makakatal᷊ang, kaiso kawe samekang dingangu i sarakang si sie. I kau e sarung mẹ̌sombang dingangu mẹ̌bisara hala ringange, wọu e i kau sarung makoạ sarang Babel.

⁴Kaiso raringiheko wawera-Ku ini e mạanung kau, Zedekia! I kau e tawe mawihua su pẹ̌seketang,

⁵kaiso kawe mate kere wiasa. Dingangu kerẹewe kawanua e měnutung kamania e su tempong mělebingu manga i upungu kụ nẹ̌parenta kal᷊imonang kau, kerene lai kawanua sarung měnutung kamania waugi kau. I sire sarung mělutu ringangu mẹ̌bera u, ’Iridi! Ratung kami e seng tawẹdise!’ Iạ e kai MAWU, kụ seng nẹ̌bisara.”

⁶Tangu tatanatang MAWU ene takụ nihabarẹ̌ su Ratu i Zedekia su Yerusalem,

⁷piạ buntuangu ratum Babel kạpẹ̌ngalone soa ene. I sire mal᷊aing něngalo soang Lakhis, dingangu Aseka, soa rarua piạ těndạ e wědang nẹ̌daragẹ̌ su Yehuda.

⁸Datu i Zedekia ringangu tumanạu Yerusalem nẹ̌koạ pẹ̌dariandi waugu mapakal᷊iwiru

⁹manga ěllang i sire tau Ibrani, baewe manga esẹ arau lai manga wawine tadeạu tawẹu sarang sěngkatau wọu tau Israel kụ mětahuěllangu wansane.

¹⁰Patikụ kawanua ringangu manga těmbonange mẹ̌paparenta e seng nẹ̌koạ pẹ̌dariandi ringang waugu mapakal᷊iwiru manga ěllang sire dingangu semben tawe lai mapẹ̌tahuěllang i sire kạpia, kụ kahěnga-hěngang mapakal᷊iwiru manga ěllang i sire ene.

¹¹Kaiso wọu ene i sire něbawal᷊ui tiněnnan sire e, kụ něngal᷊ạ kạpia manga ěllang ene e, kụ nisihasane nakoạ ěllang kạpia.

¹²Tangu MAWU, Ruatang Israel, něngoro si siạ apẹ̌bẹ̌bera kirini si sire ene, ”Piạ Iạ nẹ̌bawa si upung i kamene siměbang bọu Misirẹ̌ dingangu napakal᷊iwiri sire wọu pẹ̌tatahamawuang, Iạ e seng nẹ̌koạ pẹ̌dariandi ringang i sire.

¹⁴ Iạ e mẹ̌bera u patikụ ěllang tau Ibrani kụ seng nẹ̌tangkiang ěnnungu taung karěngụe, harusẹ̌ i liu su pěngěnsuengu taung kapitune. Arawe i upung i kamene e tawe měnaung dingangu tawe rumaringihẹ̌ apang Takụ nipěhengetang ene.

¹⁵Pira ěllo tamai nal᷊iu i kamene němal᷊ui kalakuang i kamene e ringangu nẹ̌koạ apang kụ makạl᷊uasẹ̌ naung-Ku. I kamene kěbị matuhụ baugu mapakal᷊iwiru manga ěllang kawanua sěmbaụ u e, ringangu mẹ̌koạ pẹ̌dariandi ringang-Ku su ral᷊ungu Wal᷊e-Ku.

¹⁶Mapapangkatu kawanuang Yehuda ringangu Yerusalem dingangu manga sawohịu wal᷊en datu e, manga imang dingangu kal᷊awọu měnanitị ěntananu seng napěngakung pẹ̌dariandi ene ringangu měmotọ sapi, měmotọ makoạ darua, dingangu rimal᷊eng su tal᷊oarang sapi ene ruam potọ. Kaiso wọu ene i kamene nẹ̌bawal᷊ui naung i kamene ringangu něhinakang si Siạ. Manga ěllang kụ seng niliwiri kamene tuhụewe kapulun sire e, nial᷊ạ i kamene kạpia ringangu nisihasa mẹ̌deạu saụ i pakakoạ ěllang kạpia. Ual᷊ingu ene Iạ e kai MAWU kụ seng něhengetang u i kamene seng limampa tita-Ku, ringangu tawe tumatuhụ tiahane, batụu i kamene tawe napakal᷊iwiru sěndinganengu tau Israel. Kụ ini e mapiawe Iạ měngonggọu l᷊oahe si kamene: loahe mẹ̌deạu mawihua su ral᷊ungu pẹ̌seketang arau ual᷊ingu sahindạ, arau kahiang lunusẹ̌. Iạ e sarung miěbạ si kamene mẹ̌sul᷊ungu i kamene miěbạ sapi kụ potokang i kamene ene. Iạ e sarung mapakariadim patikụ bansa e su dunia e makapěndang maghiadẹ̌ apang kụ nikoạ-Ku si kamene.

²⁰Iạ e sarung měnarakang i kamene su sědụ kụ mapulu měmate si kamene. Maietu e sarung kinasengu manụ u winalangeng dingangu binatang dul᷊u.

²¹I Zedekia ratung Yehuda ringangu manga mapapangkatu těmbonangu kawanua e sarung Takụ i sarakang su taumata kụ mapulu měmate si sire. Iạ e sarung měnarakang i sire su sordadong Babel, kụ orasẹ̌ ini e seng naněntang i kamene.

²²Iạ e sarung měngonggọu parenta tadeạu i sire e pẹ̌sul᷊e sarang soa ini, wọu ene pěngalo, pěmul᷊aho, ringangu pěnutung. Manga soang Yehuda e sarung Takụ i pakariadi kere wanua l᷊inggi kụ tawe pẹ̌tanakengu taumata. Iạ e kai MAWU, kụ seng něhengetang.”