Read Sangir YEREMIA 35 Bible Online

YEREMIA 35 - Sangir bible

YEREMIA 35

¹ Piạ i Yoyakim anạ i Yosia naratu su Yehuda, MAWU e něhengetang si siạ,

²”Dakọko pẹ̌bisarang taumata wọu ghal᷊ipohong Rekhab. Pẹ̌bawako si sire sarang kamarẹ̌ sěmbaụ bọu tal᷊oarang kamarẹ̌ su ral᷊ungu Wal᷊e-Ku, kụ sadiaiko anggorẹ̌ e i sire.”

³Tangu rimal᷊engke iạ e naněnsomahẹ̌ kal᷊awọu ghal᷊ipohong Rekhab, kụ kai i Yaazanya (anạ u sěngkatau arenge i Yeremia anạ i Habazinya) ringangu kal᷊awọu anạu sěngkataune ringangu anạ manga esẹ.

⁴Iạ nẹ̌bawa si sire sarang Bal᷊em MAWU sarang dal᷊ungu kamaru manga muriti Nabi Hanan anạ i Yigdalya. Huange ene kaẹ̌bakeng dasị su huangu Imang Maaseya anạ i Salum, maraning huangu mapapangkatẹ̌ bal᷊ine. I Maaseya e kai sawohị marangẹ kụ měnẹ̌nahimata manga tukadu Wal᷊em MAWU.

⁵Bọu ene iạ e naměllọ u kal᷊awọu manga wohogẹ̌ napenẹ u anggorẹ̌ su těngon tau Rekhab ene, ringangu manga galasẹ̌. Bọu e iạ nẹ̌bera si sire, ”Sal᷊amate měnginung.”

⁶Kaiso i sire e simimbang, ”I kami e tawe něnginung anggorẹ̌. I upung i kami i Yonadab anạ i Rekhab nẹ̌sěding i kami ringangu pal᷊ahiteng kami e měnginung anggorẹ̌. Sasěding ene e waugu sarang marěngụ-děngụ.

⁷I kami e tawe wotonge mahěnsinuang, dingangu tawe wotonge lai měmuka arau měnaghuang baelu anggorẹ̌ e. Kanandung biahẹ̌ e i kami e lai tawe wotonge měndarisị bal᷊e. I kami e harusẹ̌ mẹ̌tanạ su ral᷊ungu tenta, tadeạu makapẹ̌tanạ tatapẹ̌ su ěntana ini kere taumata raghị.

⁸Kěbị apang niparentang Yonadab si kami e seng nituhukang i kami. Kanandung biahẹ̌, i kami ringangu anạ dingangu kawing i kami e tawe měnganginung anggorẹ̌.

⁹I kami tawe něndarisị bal᷊e waugu tampạ katatanakeng i kami, kaiso i kami e mạtanạ su ral᷊ungu wal᷊en tenta. Si kami e mal᷊ain tawẹ apa waelu anggorẹ̌, dahami arau lai wineng gandung baugu suangeng. Nimbụ e, patikụ apang niparentang i upung i kami i Yonadab ene, mambeng niitukang i kami e ringangu kạguwạu naung.

¹¹Kaiso piạ e nạung Datu i Nebukadnesar něngalo su wanua ini, i sire němutusu tumal᷊ang bọu sordadoʼm Babel dingangu sordadoʼn Siria ringangu tumal᷊ang měnguntang su Yerusalem. Hakịu ene i kami e orasẹ̌ ini mạtanạ sini.”

¹²Bọu e MAWU Kụ Limembong Kawasa, Ruatang Israel dimolohu iạ apạkakoạ sarang anun tau Yehuda ringangu Yerusalem, kụ pělẹ̌habaru tatanatang MAWU ini e si sire, ”Iạ e kai MAWU, makiwal᷊o unụ e i kamene mạdiri rumaringihẹ̌ si Siạ, dingangu tawe tumuhụ manga tita-Ku.

¹⁴I Yonadab nẹ̌sědingu manga hitene měnginung anggorẹ̌, dingangu i sire e matuhụ su sasěding ene e. Sarang orasẹ̌ ini e tawẹ u sarang sěngkatau kụ deng měnginung anggorẹ̌ e. Arawe Iạ e sěntiniạ mang mẹ̌bẹ̌bisarang kamene, kai i kamene mang tawe mapulu rumaringihẹ̌.

¹⁵Sidutu mang turusẹ̌ Iạ e rumolohu kal᷊awọu manga ěllang-Ku, apang nabi, dingangu i sire kụ seng něnasa si kamene mẹ̌deạu měmal᷊ui lulunu ringangu měngědo mẹ̌koạ dal᷊akisẹ̌. I sire mạnal᷊ěntihọ si kamene tadeạu kumbahang maněmba manga ruata wal᷊ine, ringangu tawe mẹ̌tangkiang si sire, tadeạu i kamene turusẹ̌be makapẹ̌tanạ su wanua ini kụ seng Takụ nionggọ si kamene ringangu su manga i upung i kamene. Kaiso i kamene e tawe mapulu měnaung ene ringangu tawe mapulu rumaringihẹ̌ si Siạ.

¹⁶Pal᷊ahiten Yonadab mararingihẹ̌ su parentang i upung i sire, arawe i kamene e tawe mapulu rumaringihẹ̌ si Siạ.

¹⁷Ual᷊ingu ene Iạ e kai MAWU Kụ Limembong Kawasa, Ruatang Israel, sarung maparěntang kal᷊awọu haghing hombang si kamene — tau Yehuda ringangu Yerusalem — kụ seng Takụ nitilakehẹ̌ baugi kamene, kerẹewe seng Takụ piněhengetang. Hal᷊ẹ̌ ene kinoạ-Ku ual᷊ingu i kamene mạdiri rumaringihẹ̌ kereu Iạ e mẹ̌bisarang kamene, dingangu i kamene e mạdiri sumimbahẹ̌ su tempong Iạ e kumui si kamene.”

¹⁸Mase iạ e nẹ̌bera su taumatang ghal᷊ipohong Rekhab u MAWU Kụ Limembong Kawasa, Ruatang Israel, nẹ̌bera kirini, ”I kamene seng timuhụ si upung i kamene i Yonadab; kal᷊awọu parentane seng nikoạ dingangu nituhukang i kamene.

¹⁹Ual᷊ingu ene, Iạ MAWU Kụ Limembong Kawasa, Ruatang Israel, nẹ̌diandi u wọu hěnton Yonadab anạ i Rekhab sarung hanesẹ̌ piạ tau esẹ kụ mẹ̌tangkiang si Siạ.”