Read Sangir YEREMIA 36 Bible Online

YEREMIA 36 - Sangir bible

YEREMIA 36

¹ Su taung kaěpạ e samuring Yoyakim anạ i Yosia nakoạ datung Yehuda, MAWU e nẹ̌bera si siạ,

²”Al᷊ạko bukẹ̌ dul᷊ung[20] sěmbaụ kụ bohẹko sene kěbị apang kụ Takụ pinẹ̌bera si kamene maạnung Israel dingangu Yehuda, dingangu mạanung patikụ bansa. Bohẹko kěbị bawera-Ku dokeng Iạ kahumotongange nẹ̌bisara si kamene su tempong pẹ̌paparentan Datu i Yosia sarang ěllo ini.

³Aramanung tau Yehuda sarung měngirul᷊e mẹ̌koạ dal᷊akisẹ̌ kereu i sire makaringihẹ̌ habaru kal᷊awọu hombang kụ sarung Takụ i pakawuạ si sire. Tangu Iạ e sarung měngampung dosa ringangu karal᷊akisi sire.”

⁴Ual᷊ingu ene iạ e nẹ̌kui si Barukh anạ i Neria kụ naul᷊ịu kěbị apang nipẹ̌berang MAWU e si siạ. Tangu i Barukh e němohẹu kěbị ene su bukẹ̌ dul᷊ung ene.

⁵Bọu ene iạ něngoro si sie kirini, ”Iạ e seng tawe saụ pinakawala simuẹ̌ su Wal᷊em MAWU.

⁶Ual᷊ingu ene, kereu marěnta tempone taumata e mẹ̌puhědang, i kau e harusẹ̌ kakoạ sarang pai ene, ringangu pẹ̌basan tingihẹ̌ pakaihạ apang kụ seng pinakirěndengele si kau, tadeạu i sire makaringihẹ̌ kěbị apaʼn niweraʼm MAWU e si siạ. Koạe ene su tampạ kụ botonge i kau e i karingihu taumata kụ apang ene su ral᷊ungu Wal᷊em MAWU, nasowa lai tau Yehuda kụ apan seng nahunděnta wọu manga soan sire.

⁷Aramanung ual᷊ingu ene i sire sarung mẹ̌kal᷊iomaneng su MAWU, dingangu mẹ̌tobatẹ̌ bọu kakanoạ i sire kụ dal᷊akisẹ̌ e. MAWU e lumangehẹ̌ marasai si sire ringangu měmatakụ si sire.”

⁸Tangu i Barukh nẹ̌basạ e wawerang MAWU e su Wal᷊em MAWU e kerẹewe semben takụ nioro si sie.

⁹Su wul᷊ang kasione su taung kal᷊imane su parentan Yoyakim datung Yehuda, kawanua e nẹ̌puhědang[21] mědeạu makahombang kakendagu MAWU. Tumanạ u Yerusalem dingangu apan taumata nahunděnta wọu manga soang Yehuda, kěbị e němpẹ̌puhědang.

¹⁰Mase i Barukhẹ̌ e nẹ̌basạ e wọu bukẹ̌ dul᷊ung ene kal᷊awọu sạbarang kụ sen takụ niwera, ringangu kěbị taumata e nakaringihẹ̌. Bawasaěng ene e kinoạ e su ral᷊ungu Wal᷊em MAWU su kantorẹ̌ i Gemarya, anạ i Safan tulị u něgara. Kantorẹ̌ ene kaẹ̌bakeng su rělahe watuhu rasị, maranin dal᷊eng sumuẹ̌ sarang Tukadu Pasěllangeng Buhu su Wal᷊em MAWU.

¹¹I Mikhaya anạ i Gemarya dingangu pulung i Safan nakaringihẹ̌ i Barukh něbasang bawerang MAWU wọu bukẹ̌ dul᷊ung ene.

¹²Bọu ene i sie nakoạ sarang istana, sarang kantorẹ̌ u pěmamohekangu wanua. Sene kal᷊awọu těmbonange kạpẹ̌dẹ̌dal᷊ahintaune. I Delaya anạ i Semaya, i Elnatan anạ i Akhbor, i Gemarya anạ i Safan, i Zedekia anạ i Hananya, i Elisama sěngkatau tulị, dingangu manga těmbonange lai wal᷊ine kụ ene sene.

¹³I Mikhaya něhabarẹ̌ si sire, kěbị apang niwasang Barukh su Wal᷊em MAWU.

¹⁴Mase manga těmbonange ene něndolohi Yehudi (kụ kai anạ i Netanya, pulungi Selemya, dingangu i tata i Kusyi) sarang anung Barukh dingangu parenta tadeạu aparěnta apẹ̌bawa bukẹ̌ dul᷊ung ene si sire kụ seng niwasane ene. Tangú i Barukh nẹ̌bawa bukẹ̌ ene.

¹⁵”Kaiangko,” angkuěng i sire, ”pẹ̌basangkom bukẹ̌ dul᷊ung ene si kami.” I Barukh mal᷊ain timuhụ.

¹⁶Sarětạeng i sie nasuem basane, i sire němpẹ̌papanda ringangu sahene kal᷊inso mase nẹ̌bera si Barukh, ”I kami e harusẹ̌ měhabaru hal᷊ẹ̌ ini e su ratu.”

¹⁷Bọu ene i sire e nakiwal᷊o, ”Kenangko paul᷊ị si kami kai kereapa i kau e měmohẹ kěbị ene. Arau kai i Yeremia naparěndengelu ene si kamene tangu?”

¹⁸”Kahěngang, apang bawera kụ mạbawohẹ sini seng niaparěndengeli Yeremia si siạ, kụ iạ e němohẹ u tinta su bukẹ̌ dul᷊ung ini e,” angkuěng i Barukh.

¹⁹”I kau ringangu i Yeremia harusẹ̌ pẹ̌kěmbuni. Kumbahangbe sarang taumata masingkạ u tampạu pẹ̌kakěmbuniangu ene,” angkuěng i sire.

²⁰Apang mapapangkatẹ̌ e němpẹ̌tahong bukẹ̌ dul᷊ung ene su kamari Elisama, tulị ene, bọu ene nakoạ sarang anun datu kụ naul᷊ị u kěbị ene.

²¹Mase ratu něngoro si Yehudi piněngal᷊ạ bukẹ̌ dul᷊ung ene, bọuten něngal᷊ạ su kamari Elisama e, i Yehudi e nẹ̌basang ene su ratu ringangu su kěbị mapapangkatẹ̌ kụ kạpahundarisị e mạngělikụ e.

²²Tempo ene wul᷊ang kasione, dingangu ratu e kụkaiang su těngon dapuhang su wal᷊en datu su musungu matěho.

²³Sarangke i Yehudi e nasuẹem basane tatěllu arau ěpạ u wěhị, datu e něnahing bageang ene ringangu pisọ kạdodọ mase niwahunge sarang dal᷊ungu putung. Kerene nikoạ e turusẹ̌-turusẹ̌ sarang kěbị bukẹ̌ dul᷊ung ene e nasue natutung.

²⁴Manilaing i Elnatan, i Delaya, ringangu i Gemarya mẹ̌dẹ̌dorong sěngapam botonge tadeạu ratu e kumbahang měnutung bukẹ̌ dul᷊ung ene, kaiso i sie e tawe mapulu rumaringihẹ̌ si sire. Baẹbe ratu arau lai mapapangkatẹ̌ kụ makaringihẹ̌ lohoʼm bukẹ̌ ene tawe matakụ arau tawe manodẹ u pẹ̌sasasěsilẹ̌.

²⁶Datu katewe mẹ̌parenta ahuse, i Yerahmeel, sěngkasio ringangi Seraya anạ i Azriel dẹ̌duang Selemya anạ i Abdeel, tadeạu pěnamẹ si siạ dingang i Barukh tulịku e. Kaiso MAWU e němuning kami e.

²⁷Sarangke Ratu i Yoyakim něnutung bukẹ̌ dul᷊ung kụ takụ pinakirěndengele si Barukh ene, MAWU e něngoro si siạ

²⁸piněngal᷊ạ bukẹ̌ dul᷊ung bal᷊ine, kụ piněmohẹ̌ kěbị apan seng kạbawohẹ su bukẹ̌ dul᷊ung humotong ene.

²⁹MAWU e něngoro si siạ apẹ̌bẹ̌bera kirini su ratu, ”I kau e seng něnutung bukẹ̌ dul᷊ung ene, ringangu i kau e nakiwal᷊o si Yeremia, unụ e i sie němohẹ u ratuʼm Babel sarung duměnta kụ mapakawinasaʼm banua ini ringangu měmate tumatanạ e ringangu manga binatange.

³⁰Ual᷊ingu ene, Iạ e MAWU, něhengetang si kamene, ei Ratu Yoyakim, u tawẹu sarang sěngkatau wọu hiteng kamene sarung mẹ̌parenta kere sěngkatau ratu hěnton Daud. Maietu e sarung i rěmmẹ sarang likude, kahinoěngu tětị su tempong ěllo, ringangu namuhẹ̌ matěho su tempong hěbi.

³¹I kau, hitenu, ringangu apaʼm mapapangkatu e sarung Takụ hukunang ual᷊ingkeng kal᷊awọu rosa kinoạ i kamene. Iạ e sarung mapakarěntang kal᷊awọu hombang kụ sen Takụ piněmatakụ si kamene, watụ u waebe i kau arau lai tumanạ u Yerusalem dingangu Yehuda tawe měnanaung kal᷊awọu papatakụ-Ku.”

³²Tangú iạ e měngal᷊ạ bukẹ̌ dul᷊ung buhu, kụ měngonggọu ene si Barukh tulịku e. Bọu e i sie měmohẹ u kěbị apaʼn takụ pakịrěndengele si sie, kụ kai lohong bukẹ̌ dul᷊ung humotong tambaěngu tatanata pira-pira wal᷊ine mẹ̌papangawẹ u ene.