Read Sangir YEREMIA 37 Bible Online

YEREMIA 37 - Sangir bible

YEREMIA 37

¹ Su tempong i Nebukadnesar datum Babel nělohosi Yoyakhin anạ i Yoyakim, i sie něhengkẹ i Zedekia anạ i Yosia nakoạ datung Yehuda.

²Kaiso baewe i Zedekia, arau lai apan těmbonange dingangu kawanuane tawe tumatuhụ tatanatang MAWU kụ nitanatanʼE siạ.

³Datu i Zedekia něndolohi Yukhal anạ i Selemya, ringangu Imang i Zepanya anạ i Maaseya apẹ̌dẹ̌dorong tadeạu iạ apẹ̌kal᷊iomaneng su MAWU Ruata, waugu pandungangu wansa.

⁴Su tempo ene iạ bědang tawe nạtahungkụ dingangu wědang makapẹ̌kakanoạ su tal᷊oarang kawanua.

⁵Sordadoʼm Babel kạpěngalone su Yerusalem, kaiso piạ i sire nakaringihẹ̌ u sordadom Misirẹ̌ e seng nẹ̌buạ bọu Misirẹ̌ kụ mẹ̌sekẹ, tangu i sire e němpẹ̌sohọ.

⁶MAWU, Ruatang Israel, něngoro si siạ

⁷pẹ̌bera kirini su rarolohangu Ratu i Zedekia: ”Pẹ̌berako si Zedekia, ’Sordadong Misirẹ̌ kụ kạpẹ̌tẹ̌timonane ramahi e mẹ̌deạu montolẹ̌ si kamene e, sarung mẹ̌sul᷊e kụ mapul᷊ẹ.

⁸Mase tau Babel sarung mẹ̌sul᷊e kụ mangalo su soa ini, měmatạ ore lai měnutung.

⁹Iạ, MAWU, maul᷊ị si kamene, tadeạu kumbahang měngakal᷊ẹ̌ batangengu e kụ měngěnna u tau Babelẹ̌ e seng napul᷊ẹ kụ semben tawe saụ mẹ̌bal᷊ị. U i sire nal᷊ahẹ u sarung mẹ̌bal᷊ị.

¹⁰Manga andene i kamene měmatạ kal᷊awọu sordadoʼm Babelẹ̌ e hakịu nal᷊ěmbe kate apang lesẹe ghaghuwạ su ral᷊ungu tentan sire, katewe i sire sarung mẹ̌bangung dingangu měnutung soa ene pakasue.’ ”

¹¹Sordadom Babelẹ̌ e simohọ bọu Yerusalem ual᷊ingu sordadom Misirẹ̌ kimanoạ mẹ̌timona soa ene.

¹²Tangu iạ naněntangu Yerusalem kụ nakoạ sarang banuaʼm Benyamin, baugu měnarimạ u papahiạ u pusakạ bọu ěntanaʼm pamili.

¹³Ene sarangke iạ nahumpạu Tukadu Pasěllangeng i Benyamin, tuměllangu sordado kụ mělẹ̌hal᷊ẹ̌ sene něngaresẹ̌ si siạ dingangu nẹ̌bera, ”I kau e mapulu tumal᷊ang sarang sěmběkan tau Babel!” (Pěrwira ene arenge i Yeria; i sie anạ i Selemya ringangu pulung i Hananya.)

¹⁴Iạ němal᷊isẹ̌, ”Kai konti! Iạ tawẹ karakiku tumal᷊ang sarang sěmběkan sědụ.” Kaiso i Yeria e madiri rumaringihẹ̌. I sie něnamẹ dingangu nẹ̌bawa si siạ nẹ̌těngong manga těmbonangu pěměrenta.

¹⁵I sire e mambeng němpẹ̌bawal᷊uang kahěngang si siạ, kụ nẹ̌parenta tadeạu iạ pakịlimadẹ̌ dingangu pakịkurung su wal᷊eng Yonatan tulịu něgara. Bal᷊e ene seng nakoạ tahungkụ.

¹⁶Iạ e nịsasuẹ̌ su ral᷊ungu liwuạ e sěmbaụ su al᷊ungu ěntana, kụ marěngụ mạl᷊aaresẹ̌ sene.

¹⁷Bọu ene Ratu i Zedekia e něngoro taumata apẹ̌bẹ̌bawa si siạ pẹ̌tẹ̌těngon sie su wal᷊en datu. Sene pakạděmasẹ̌ i sie e nakiwal᷊o si siạ měnsang piạ tatanata wọu MAWU. ”Piạ,” angkuěngku. Bọu e takụ nitambaěng, ”I Tuang e sarung i sarakang su ratum Babel.”

¹⁸Bọu ene iạ nakiwal᷊o, ”Apa karal᷊akisẹ̌ku e waugi Tuang arau waugu manga mapapangkati Tuang arau kawanua, hakịu i Tuange něnuẹ̌ u iạ su ral᷊ungu tahungkụ?

¹⁹Suapa manga nabin Tuang ene kụ nẹ̌bera u ratum Babelẹ̌ e tawe sarung měngalo si Tuang dingangu wanua ini?

²⁰Ini e, i Tuang kụ lẹ̌adateng, karimạko reng dumaringihẹ̌ kakindoạku ini e. Kumbahangbe i Tuang měndingọu iạ kạpia sarang tahungkụ su wal᷊eng Yonatan ene, kụ iạ sarung mate paị sene.”

²¹Tangu Ratu i Zedekia nẹ̌parenta tadeạu iạ e pakịtahungkụ su rělahu wal᷊en datu. Kụ iạ e matanạ paịse, ringangu apang kal᷊aěllo e onggotangu borotẹ̌ bọu tampạu pẹ̌kakoateng borotẹ̌ sarang sạdiang borotẹ̌ su soa ene e seng nasue kěbị.