Read Sangir YEREMIA 38 Bible Online

YEREMIA 38 - Sangir bible

YEREMIA 38

¹MAWU e něngoro si siạ pělẹ̌habaru ini e su kawanua, ”Soa ini sarung Takụ i onggọ su sordadong Babel, dingangu i sire sarung měmatạ. I saing kụ sarung matanạ su ral᷊ungu soa sarung mawihua su ral᷊ungu pẹ̌seketang, arau ual᷊ingu karal᷊unusẹ̌ arau ual᷊ingu sahindạ. Kaiso i saing suměbang dingangu měnarakangu watangenge su tau Babel, tawe pateěng; niawane sarung masal᷊amatẹ̌.” I Sefaca anạ i Matan, i Gedalya anạ i Pasyhur, i Yukhal anạ i Selemya, ringangu i Pasyhur anạ i Malkia nakaringihẹ̌ kěbị apan Takụ niwera ene.

⁴Tangu rimal᷊engke apang mapapangkatẹ̌ ene sarang anun datu ringangu nẹ̌bera, ”Tau ini hinong hukunang pakapate. U, ual᷊ingu nẹ̌bera kerene i sie nakapělome ghiangu patikụ sordado ringangu taumata wal᷊ine kụ bẹ̌dang mạtanạ su soa ene. I sie tawe mẹ̌tul᷊ungu kawanua, kaiso kawe mapakasilakạ i sire.”

⁵Ratu i Zedekia simimbang, ”Mapia! Apakariadiko i sie matuhụ kere su kapulunu, iạ e tawe makasěding i kamene.”

⁶Bọu ene i sire e něngal᷊ạ si siạ kụ něngul᷊uhu iạ e ringangu tal᷊i sarang dal᷊ungu sumung Malkia ahusu ratu, kụ su rělahu wal᷊en datu. Tawẹ apa akẹ su ral᷊ungu sumu ene, kětạeng lěbo, ringangu iạ sumuẹ̌ su ral᷊ungu lěbo ene.

⁷Su tempo ene piạ tau Sudan sěngkatau kụ mělẹ̌hal᷊ẹ̌ su wal᷊en datu. Arenge i Ebed-Melekh. I sie nakaringihẹ̌ u iạ seng bọu nisuẹ̌ su ral᷊ungu sumu ene. Piạ nạung datu e kạpěngahạ e pal᷊ahumbisara su Tukadu Pasěllangeng i Benyamin,

⁸i Ebed-Melekh nakoạ sarang pai ene kụ nẹ̌bera su ratu,

⁹”I Tuangku Lẹ̌adateng, pẹ̌kakoạ i sire ene e ral᷊aị. I sire e seng napasuẹ̌ u Nabi i Yeremia sarang dal᷊ungu sumu; i sie nal᷊ahẹ u sarung mateng karal᷊unusẹ̌ sene, watụ u kaěng seng nasue su soa ini.”

¹⁰Bọu ene ratu e nẹ̌parenta si Ebed-Melekh, ”Pẹ̌bawako těllung[22] katau kụ sěbangko i Yeremia wọu sumu ene těntal᷊ang i sie rem biahẹ̌.”

¹¹Tangu rimal᷊engke i Ebed-Melekh dingangi sire těllu ene sarang gudangu wal᷊en datu, dingangu něngal᷊ạ manga pedesẹ̌ těbe wọu ene, mase něngul᷊uhu iạ dingangu tal᷊i sarang dal᷊ungu sumu.

¹²I Ebed-Melekh něngoro si siạ piněměllọ u manga pedesẹ̌ ene su al᷊ungu nggal᷊eạku kere laěmping, tadeạu tal᷊i ene tawe makatědụ si siạ. Tangu iạ e timuhụ parentang Ebed-Melekh.

¹³Bọu ene i sire e němol᷊eng si siạ taraị, pinakasěbang bọu sumu ene. Bọu ene iạ e niaresẹ̌ su rělahu wal᷊en datu ene.

¹⁴Su tempo lai wal᷊ine e, Ratu i Zedekia e něngoro taumata pinẹ̌bawa si siạ pẹ̌těngon sie su tukadu pasěllangeng katěllune su Wal᷊em MAWU. I sie nẹ̌bera si siạ, ”Iạ e mapulu makiwal᷊o si kau, dingangu i kau e harusẹ̌ simbahẹ̌ pakatul᷊idẹ̌. Kumbahang měmuning apa-apa.”

¹⁵Iạ e sumimbang, ”Kereu iạ e maul᷊ị kahěngang, nal᷊ahẹ u i Tuang sarung mapakanawong hukumang papate si siạ; dingangu kamagengu iạ e měngonggọu sasasa e, i Tuang e tawe mapulu rumaringihẹ̌ sasasa ene.”

¹⁶Datu i Zedekia e ringangu marěmasẹ̌ nẹ̌diandi si siạ, angkuěnge, ”Baugu Ruata kụ biahẹ̌ e, Duata kụ měngẹ̌ngonggọu wiahẹ̌ si kitẹ e, iạ e mẹ̌salu u iạ e tawe měmate si kau arau měnarakang i kau su taumata kụ mapulu měmate si kau.”

¹⁷Bọu ene iạ e nẹ̌bera si Zedekia u MAWU Kụ Limembong Kawasa, Ruata kụ isẹ̌sěmbang tau Israel, nẹ̌bera kirini, ”Kereu i kau e měngkate wala koạe su mapapangkatu ratum Babel, i kau e tawe pateěng, dingangu soa ini e mal᷊aing tawe tutungang. I kau e ringangu ral᷊ohom bal᷊enu e sarung masal᷊amatẹ̌.

¹⁸Kaiso kamagengu i kau e mạdiri mẹ̌těngkasanạ, soa ini e sarung manawo su l᷊imang tau Babel. I sire sarung měnutung sarang pakasue, ringangu i kau e tawe mal᷊iwirẹ̌.”

¹⁹Datu e simimbang, ”Iạ e matakụ su kawanuang kitẹ e kụ seng nahuntal᷊ang kụ nanumběka su tau Babel. Kiwuạu iạ sarung i sarakang si sire, ringangu tingkaitang.”

²⁰”Tala wue,” sasimbangku, ”I Tuang e tawe i sarakang si sire. Iạ e mẹ̌dorong sěngapam botonge tadeạu i Tuang rumaringihẹ̌be tatanatang MAWU; kụ kěbị ene e sarungbe maurusẹ̌, kụ i Tuang e tawe pateěng.

²¹Kaiso kereu i Tuang tawe mapulu měnarakangu watangeng, MAWU e seng napakal᷊ahẹ u apa sarung mariadi si siạ e.

²²Su ral᷊ungu papasilo ene iạ e nakasilo kěbị manga wawine kụ bědang ene su istanang Yehuda nihiudẹ̌ sarang likude sarang anung mapapangkatu kararatuangu Babel. Apidu kạdal᷊enge, i sire e nẹ̌bera, ’Ratu e niakal᷊eng u manga hapị e kantalẹ̌, dingangu pinẹ̌kawasaěng i sire. Orasẹ̌ ini e, sarětạu laede nahěbọ su ral᷊ungu lěbo e, i sire kěbị e němpẹ̌sohọ.’ ”

²³Iạ e nẹ̌bera kapia, ”Kěbị e anạ dingangu kawing i Tuange sarung bawaěng sarang likude su anun tau Babel. I Tuang hala e mal᷊aing tawe mal᷊iwirẹ̌ bọi sire. I Tuang e sarung samekangu ratum Babel, dingangu soa ini e tutungang pakasue.”

²⁴Bọu e i Zedekia nẹ̌bera, ”Kumbahang maul᷊ị si sai-sai pẹ̌bawisarang kaduạ ini e, tadeạu niawanu e tawe mẹ̌kapura.

²⁵Kereu mapapangkatẹ̌ e makaringihẹ̌ u iạ e seng nẹ̌bisara ringangu, i sire sarung sumongo kụ sarung makiwal᷊ong pẹ̌bawisarang kaduạ e si kau. I sire sarung mẹ̌diandi mẹ̌deạu tawe měmate si kau, kereu i kau e mẹ̌běke kěbị si sire.

²⁶Měngkate paul᷊ị u i kau e něngologẹ̌ si siạ tadeạu iạ e tawe měndingọ i kau e kapia sarang tahungkụ dingangu mate paịse.”

²⁷Tawe nararěnnạ wọu ene kěbị mapapangkatẹ̌ ene e riměnta ringangu nakiwal᷊o si siạ. Iạ e něhabarẹ̌ si sire naitụewe kere suparentan datu e si siạ. Ual᷊ingu kerene tangú i sire tawe makakoạ manga apa, u tawẹ u sarang sěngkatau kụ masingkạu pẹ̌bawisarang kanduan datu e.

²⁸ Iạ e těbe kạl᷊aaresẹ̌ su rělahu istana sarang ěllong pěmamul᷊ahong Yerusalem kahiang sědụ.